After all, tomorrow is another day!

Súludans

2007-02-01T10:45:00.001Z

Nýjasta æðið í líkamsræktinni er súludans sem á að koma konum í rokform. Ég var að velta fyrir mér af hverju ekki væri boðið upp á slíkt fyrir karlmenn líka. Þeir hljóta að vera til karlarnir sem hefðu áhuga á slíku námskeiði. Veit ekki hvort það væri samt sniðugt að kenna konum og körlum á sama námskeiði. Myndi sjálfsagt henta betur að hafa þetta kynjaskipt. Sjáið þið fyrir ykkur feita og sveitta karla á slíku námskeiði, umkringdir gyðjum á súlum. Þvílík sjónmengun og þvílík sóun á súlum því það vita allir að þeir karlar sem myndu skrá sig á slíkt námskeið væru líklegast bara að leita eftir ódýrri skemmtun. Svo er það ekkert launungamál að þessi grey eiga oft erfitt með að leyna því hversu illa gefnir og frumstæðir þeir eru og gæti það orðið vandræðalegt í sameiginlegum súlutíma þegar eitthvert dýrið rynni til í eigin slefi og brákaðist á rófubeini. Þar fyrir utan eiga þeir erfitt með að halda einbeitningunni meðan þeir vaska upp, hvað þá að vefja sig utan um súlu, hálfnaktir og umkringdir glæsilegum og kynþokkafullum konum í eggjandi dansi. Hrein og bein ávísun á stórslys að mínu mati. Persónulega held ég að þessi líkamsrækt henti mér ekki og þá kannski vegna þess að nærvera mín myndi sjálfsagt slá flestar konur út af laginu líka.

Sprettur

Teygja teygja teygja

2007-01-29T14:12:00.001Z

Vorum barnlaus um helgina þar sem Prinsessan var boðin í bústað með ömmu og afa og Skottunni líka. Fórum í bíó bæði föstudags- og laugardagskvöld að sjá Apocalypto og Blood diamond. Báðar alveg fantagóðar og mæli eindregið með að fólk láti ekki fram hjá sér fara.

Æfingar eru hafnar hjá Sprettinum sem þó tekur því rólega og er ekki mikið í lyftingum, en þeim mun meira á brettinu bara í staðinn. Spangarbúar allir voða kátir með að hafa endurheimt þennan fagra kropp sem nú má berja þar augum eftir langt og strangt hlé. Eitt sem ég hef alltaf verið alveg óskaplega löt við er að teygja eftir æfingar. Þegar tímamörkin nálgast þá einhvernveginn dett ég alltaf frekar í að lyfta meira eða hlaupa lengra í stað þess að taka nokkrar góðar teygjur á dýnunni. Og þó ég sé ógurlega sterk og ægifögur þá er ég nú samt stirð sem staur þegar kemur að því að teygja á mínum fögru limum. Markmiðið er því að bæta þar úr og vera dugleg í teygjum og togum eftir hverja æfingu og þar sem ég er einstaklega aðlögunarhæf og frábær í flestu, bara svona frá náttúrunnar hendi, þá verð ég ekki lengi að verða kattliðug og mun fara í splitt og flikkflakk niður Fannafoldina eftir nokkrar vikur, sjálfsagt við mikil fagnaðarlæti frá nágrönnum mínum sem nota einmitt hvert tækifæri til að berja kvendið augum og dæsa og andvarpa af aðdáun í hvert sinn (getur samt verið mjög þreytandi líka). Ég mun skipta mér á milli Lauga- og Spangarbúa næstu vikurnar svo ljóta og óaðlaðandi fólkið getur nú mætt á báða staði svo framarlega sem það er ekki mikið að þvælast fyrir augunum á mér, því slík sjónmengum getur truflað einbeitninguna í teygjunum.

Sprettur

Örvæntið ekki

2007-01-25T14:53:00.000Z

Ég er svo löt í blogginu núna að ef ég kynni að skammast mín, þá myndi ég gera það núna.

Jæja, minns er farin að geta mætt í ræktina á ný eftir tæplega þriggja vikna hlé vegna bakmeiðsla. Ætla samt að kalla það íþróttameiðsl héðan í frá, hljómar miklu betur. Fór með Prinsessuna í Laugar í gær þar sem sú stutta tók netta æfingu í SHOKK salnum á meðan ég fór í mitt prógramm. Unglingurinn mætti líka svo meirihluti fjölskyldunnar fékk sína hreyfingu í gær. Brjáluð stemning í salnum þar sem ca. 200 upphitunartæki voru öll full og köll og klapp reglulega, þar sem Íslendingar voru að taka Túnismenn í.....

Körfubolti hjá Folanum í gærkveldi, Unglingurinn útí bæ að horfa á enska boltann svo við mæðgurnar kúrðum okkur í sjónvarpherberginu og horfðum á okkar vikulegu amerísku lágmenningu, öðru nafni America´s Next Top Model. Nigel alltaf jafnfallegur, Ms. Jay alltaf jafngay, Twiggy alltaf jafn krúttleg og tútturnar alltaf jafnsætar, en missætar þó .

Kíkti örlítið á útsölurnar núna í janúar, keypti smá í Karen Millen, smá í Debenhams og svo ekki meir. Fór svo einn stuttan hring síðustu helgi og niðurstaðan er sú að 90% af þeim varningi sem eftir er á útsölum er drasl af gömlum lagerum verslanna. Fann eina skó sem mig langar í og nú er ég að sjálfsögðu búin að sannfæra sjálfa mig um að mig vanti eitt stykki brún stígvél.....en ekki hvað :/ Ég á bara ein hvort eð er, nema maður telji flatbotna stígvél og kúrekastígvél með....þá eru það þrenn pör, af brúnum, og ég held að flestar konur sem eru með eitthvað vit í kollinum myndu halda því fram að það væri fyrir neðan allar hellur og jafnvel hægt að ganga svo langt að segja að það sé frekar fátæklegt að eiga ekki eitt par af brúnum stígvélum í viðbót. Enda verða svona ógurlegar skutlur eins og ég að eiga nóg af skóm.

Kíki í Spöngina í dag þegar Prinsessan fer á körfuboltaæfingu. Verð ekki lengi að koma mér í fullan gang aftur, nú mega Spangarbúar fara að rífa sig upp á rassgatinu og reyna að gera eitthvað í ræktinni, þýðir ekkert að leggjast í leti og þunglyndi þó svo Spretturinn hafi ekki mætt í nokkra daga. Endalaust álag á manni.

Sprint out

Helgin framundan

2007-01-19T09:05:00.001Z

Í gærkveldi komu saman glæsilegustu og kynþokkafyllstu gleðipinnar landsins heima hjá G-strengnum. Strengurinn bar fram dýrindis veitingar eins og henni einni er lagið og held að flestar okkar verði vel settar fram á haustið svona matarlega séð, að minnsta kosti tók ég hraustlega til matar míns og borðaði eins og fullvaxin kona.
Mér þykir nefnilega alveg ógurlega leiðinlegt að gefa konum sem borða eins og fuglar mat, rétt tína í sig nokkra pínulitla bita, horfa svo á diskinn, andvarpa og segjast vera pakksaddar. Það skal tekið fram að flestar svoleiðis konur eru náttúrulega 110 á hæð og 3 kíló, en það er víst það heitasta í dag. Nema á tískuvikunni í Milanó, þar þurfa þær víst að vera 4,5 kíló til að fá að vera með. EN, matarlystin er eitthvað sem alltaf hefur verið í lagi hjá okkur Siglotúttum, enda hlægjum við svo mikið að við verðum að hafa eitthvað til að brenna.

Ennþá hef ég ekki komist á æfingu, en úr því verður bætt í fyrramálið því þá ætla ég að skella mér í Laugar og taka þar létta æfingu hvort sem bakið verður komið í lag eða ekki. Stend ekki í svona vitleysu lengur, andleg heilsa mín er í húfi.

Fegurðarkóngurinn hefur komið með þá yfirlýsingu að hann ætli að höfða skaðabótamál gegn forsvarsmönnum Herra Ísland, þar sem hann telur sig hafa orðið fyrir ærumeiðingum og misst vinnunna vegna þessa máls. Úff, sá hann einhver í sjónvarpsviðtali í fyrra vegna málsins? Ég get bara ekki skilið hvernig hann gat stamað út úr sér við einhvern aumingjans lögmann, að hann hafi viljað fara í mál, því miðað við orðaforðann í umræddu viðtali er ég mest hissa á að hann viti hvað “ærumeiðingar” og “skaðabótamál” þýði. Ætli hann hafi einhvern tímann heyrt svona orð áður, kannski í sjónvarpsþættinum sínum? Sjálfsagt ágætisnáungi strákurinn, en hverjum er ekki sama þótt hann hafi misst þennan titil, enda hallæriskeppni og hallæristitill að bera.

Sprettur fagri :)

Ónýt

2007-01-15T13:43:00.001Z

Líður svolítið eins og vél í gömlum Willy´s jeppa þessa dagana. Bakið alveg að fara með mig og hef ekkert komist á æfingu í heila 9 daga. Bólaði því örlítið á klínísku þunglyndi hjá Sprettinum, sem helst kom fram í formi súkkulaðiáts og var botninum náð þegar morgunmaturinn í gær var einn pakki af Remi súkkulaði ásamt ískaldri undanrennu. Mér til varnar verður þó að koma fram að Folinn stökk alsprækur upp úr rúminu til að fara í körfubolta með félögunum eins og alltaf á sunnudagsmorgnum. Við hlið hans lá hrakið hún ég og vældi yfir eymslum mínum og aumingjaskap sem vonandi sér nú fyrir endann á svona fyrir lok vikunnar að minnsta kosti.

Helgin var annars ágæt þar fyrir utan, Unglingurinn er fluttur í borgina á ný eftir útlegð á haustönn. Fékk hann inngöngu í þann skóla sem var efst á óskalistanum og mætti í sinn fyrsta tíma núna í morgun. Prinsessan bíður spennt eftir að fá að mæta á æfingar í Laugum þar sem opnaður verður salur með tækjum fyrir börn á aldrinum 8-14 ára núna í vikunni. Ógurlega flott og spennó og verður hún án efa fastagestur þar milli körfuboltaæfinga, hún er að minnsta kosti búin að bíða spennt frá því að Folinn tilkynnti að von væri á slíku.

Við fórum annars í leikhús á laugardaginn sem var alveg ágætt. Átti svolítið erfitt með að sitja kyrr svona þegar fór að líða á leikritið, sökum bakverkja. Fórum á viltu vinna miljón sem var alveg þokkalegt og hægt að hlægja af. Eggert Þorleifsson og Laddi voru frábærir í sínum hlutverkum en það sama er ekki endilega hægt að segja um Helgu Brögu. Hún var ágæt framanaf, en þegar kom að því að leika ofurölvi kvenmann þá varð þetta bara vandræðalegt. Kannski Prinsessunni og hennar vinum hefði þótt þetta fyndið, dónt nó. Hvaða fullorðna kona steypist á hausinn ofan í sófa, stendur og hoppar í stofustól eins og bjáni, með orðaforða á við 3ja ára gamalt barn og tóninn sömuleiðis, notar gamla vínflösku sem gítar og baular og raular eins og hálfviti. Ég hef nú séð nokkrar drukknar kellur í gegnum tíðina, en aldrei neitt í líkingu við þetta. Get ímyndað mér að krakki sem dytti í bjórtunnu myndi kannski sýna svipuð viðbrögð við áfenginu.....þetta var svo ofleikið að það var ekki einu sinni fyndið.

Annars hef ég ákveðið að bjóða mig fram til að leysa David Beckham af í eina viku með LA Galaxy. Þarf sjálfsagt ekki að gera mikið þessa vikuna nema bara leysa út launaávísunina sem er samt ekki nema rétt um 70 millur......Annars held ég að Beckham stigi nú ekkert sérstaklega í vitið, enda leitaði maðurinn ráða hjá Tom Cruise áður en hann ákvað að flytja sig yfir og ekki er sá nú alveg heill í hausnum :/

Spretturinn

Nýtt ár

2007-01-10T11:10:00.000Z

Ég var minnt á um daginn að desember væri löngu kominn og farinn og því væri löngu kominn tími á að ég uppfyllti skyldur mínar hér á vefnum til að koma í veg fyrir frekara tjón á andlegri líðan aðdáenda minna. En þegar svona eðaltúttur eins og ég eigum í hlut er bara stundum erfitt að sinna þessum skyldum sökum anna í félags- og heimilislífinu svona rétt í árslok. Spretturinn fékk fullt af góðum gjöfum eins og von var á, enda er maður umkringdur gjafmildum og góðum fjölskyldumeðlimum og vinum. Folinn hlóð demöntum á Sprettinn eins og sönnum herramanni sæmir. Börn, systir og foreldrar gerðu einnig afskaplega vel við Sprettinn sem svaraði í sömu mynt og gladdi sitt fólk. Árinu var svo lokað með tilheyrandi sprengingum og látum hjá Systir og Oddinum. Fengum lítið að vera í friði með okkar sprengigræjur þar sem nágrannar flykktust út í glugga og götu til að fylgjast með okkur, enda sjaldan sem slíkur fjöldi fegurra kvenna og karla sést í návígi þarna í sveitinni. Vatnsendabúar eru bara ekki vanir þessháttar uppákomum, enda þarf Systir yfirleitt að yfirgefa hús sitt fyrir allar aldir bara svona til að komast óáreitt til vinnu. Jú jú, fegurðin, kynþokkinn og gáfurnar eru bara eitthvað sem við systur þurfum að læra að lifa með, en það er ekkert alltaf auðvelt.

Á dagskránni er að fara í leikhús á laugardaginn með mágkonu, karli hennar og tengdaforeldrunum. Ætlunin er að sjá “Viltu finna miljón” sem fólk segir að sé ógurlega skemmtilegt og fyndið. Mér finnst nefnilega ekkert gaman að fara í leikhús nema það sé skemmtilegt og fyndið. Við Folinn fórum einu sinni á stykki sem hét “Leitt að hún skyldi vera skækja”. Ég var ekkert að kynna mér þetta neitt sérstaklega áður en miðarnir voru keyptir, ég meina titilllinn hljómar nú ekkert afskaplega dramatískur eða leiðinlegur, en OMG hvað þetta var ekki skemmtilegt. Ég er kannski svona smituð af lágmenningu sjónvarpsins, en leikendur voru þrír, talað var í bundnu máli og fjallaði þetta um systkini sem urðu ástfanginn hvort af öðru og sváfu saman, ímyndið ykkur flækjurnar og dramatíkina í kringum þann drátt. Þetta gæti alveg verið fyndið og skemmtilegt en þess í stað var það það mjög leiðinlegt og langdregið. Svona svipað og að fara í rótarfyllingu til tannlæknis.

Æfingar hafa setið á hakanum frá því á laugardaginn síðasta þar sem Spretturinn fór eitthvað illa í bakinu og gengur því um eins og skakki turninn í Pisa. Ótrúlegt hvað ég er samt aðlaðandi og brjálæðislega sexý þrátt fyrir þetta skrítna göngulag og kvalafullan svipinn á fögru andlitinu. Vona að ég komist í leikhúsið samt.

Já, það hefur lítið breyst í lífi Sprettsins frá því síðast. Allt jafnyndislega fullkomið og skemmtilegt fyrir utan smá ”setback” síðustu daga þar sem ekki hefur verið farið í reglubundnar ferðir í Spöngina og aðdáendur mínir hafa því reitt hár sitt og emjað af vonbrigðum.

Hilsen
Sprettur

Helgin

2006-11-13T13:15:00.000Z

Við mæðgurnar skelltum okkur í jólagjafagírinn um helgina og héldum í slíkan leiðangur. Byrjuðum á því að vera ægilega menningarlegar og fórum á Laugaveginn. Þegar við stigum út úr bílnum fyrir utan Landsbankann frusum við á staðnum sökum mikils kulda. Var því skundað á aðeins meira en meðalhraða beinustu leið á Sólon þar sem við settumst niður og blésum hlýju í kalda lófa og pöntuðum okkur hádegisverð ásamt Stóru stelpunni og Tengdadótturinni, smá viðkoma við Kjörgarð þar sem maður einn sat í þessum nístingskulda og spilaði á harmónikku og fannst Prinsessunni bara sanngjarnt að staldra við og kroppa upp nokkra smápeninga til að skilja eftir handa honum svo hann gæti keypt sér eitthvað heitt að drekka. Eftir ágætis veitingar á Sólon, en hræðilega þjónustu, var farið beinustu leið upp Laugaveginn aftur, í bílinn og keyrt upp í Kringlu eins og annað venjulegt fólk sem ekki vildi frjósa í hel. Okkur tókst að kaupa þrjár og hálfa jólagjöf á laugardaginn og svo heimtaði Prinsessan að við færum aftur á sunndag, sem við og gerðum, þar sem við keyptum svo tvær og hálfa jólagjöf. Talsverður tími fór í að finna stóran vörubil handa einum litlum frænda sem á bara eina jólaósk, s.s. stóran vörubíl. Lítið var um slík ferlíki nema þá í verðflokki sem okkur fannst aðeins fyrir ofan skynsemismörkin, ég meina, hver kaupir plastvörubíl handa fjögurra ára gömlu barni á tæplega sjö þúsund krónur......allavega ekki ég.

Æfingar fengu sinn tíma alla síðustu viku og bæði á laugardag og sunnudag, mun Spretturinn því taka rólegan dag í dag og vera heima hjá sér í haugaleti og aumingjaskap, en taka upp þráðinn seinnipartinn á morgun og mæta fersk í Spöngina þar sem tekið verður á kroppnum innan um allt fallega fólkið sem þar æfir (þetta var spes fyrir þig Júlli ;o) )

Sprettur frostrós

Af unglingum og öðru fólki

2006-11-07T15:06:00.000Z

Ég tók ógurlega æfingu í gær og var Spöngin full af fólki, misfríðu að sjálfsögðu eins og vanalega. Fótleggjafegrun var tekin með trompi og er óhætt að segja að sterkari, stæltari og stórfenglegri fótleggi en mína er ekki að finna svo víða, enda fylgja þeir restinni af þessum líka hrikalega flotta kropp sem mér fylgir. Anyway, nenni nú ekki að tíunda það sem allir vita, eina ferðina enn....þarna var ég í mestu makindum í upphitun fyrir ógurlegheitin þegar ég sé útundan mér að á einu hlaupabretti fyrir aftan mig er lítill hobbiti að rembast við að hlaupa á brettinu sem var helmingi stærra en hann sjálfur, enda rétt sá í glókollinn annað slagið þegar hann stökk upp á hlaupunum. Ég hélt að sjálfsögðu að þarna hefðu skynfærin verið að hrekkja mig eitthvað og hirti því ekki frekar um það þar til upphitun glæsikroppsins var lokið. Varð mér þá aftur litið á umrætt bretti, og viti menn....þarna skoppaðist, eins og álfur, einhver krakkaskítur sem mátti hafa sig allan við að renna ekki bara af brettinu, þar sem hann hefði þá sjálfsagt flogið yfir í hinn enda salarins sökum smæðar. Stuttu síðar sá ég og heyrði útundan mér að starfsmaður Klassans var að benda föðurfígúru drengsins á þá staðreynd að Klassinn væri ekki barnaheimili, en að honum væri velkomið að setja drenginn sinn, sem var u.þ.b. 8-10 ára gamall, í barnagæsluna á neðri hæðinni ef hann vildi hafa hann með sér á æfingar. Pabbaskrípið, sem BTW leit svolítið út eins og illa klipptur og ofvaxinn asni með hýjung í ófríðu andlitinu, sagði þá eitthvað í þá áttina að hann vildi sko ekki borga í gæsluna (hundraðkallinn sko) og vildi bara taka strákinn frekar með sér að æfa í staðinn. Það mátti hann því miður ekki svo hann fór bara heim með grislinginn þar sem þeir feðgar hafa sjálfsagt gert magaæfingar á stofugólfinu fyrir framan barnatíma sjónvarpsins, ægilega sáttir.

Unglingurinn hefur verið í bænum frá því á föstudag og fer aftur norður í dag með flugi. Hann hefur verið afskaplega duglegur að sinna þeim hlutum sem unglingar gera yfirleitt mjög vel og leggja mikinn metnað í..... t.d. hefur hann verið úti eingöngu á kvöldin með félögunum, því eins og allir vita eru unglingar með ofnæmi fyrir dagsbirtu og geta því ekki hist utandyra fyrr en eftir að sólin sest. Svo voru ýmsir bráðnauðsynlegir hlutir sem þurfti að sinna í tölvunni, eins og að hlaða niður bíómyndum og spjalla við félagana, sem hann var með úti stuttu áður, á MSN fram á nótt, nú og sofið langt fram á dag til að hvíla sig eftir allt þetta spjall sem getur jú verið ansi slítandi starf til lengdar. Síðast en ekki síst þarf að horfa á eitthvað af þessum bíómyndum og þáttum sem búið er að hlaða niður svo þeir renni ekki út á tíma og verði kannski komið í bíó á klakanum eða eitthvað þaðan af verra. Annað slagið er svo komið upp til að anda að sér fersku lofti, en samt mest til að fá sér að borða því bensínið klárast jú líka í hægagangi.

Spretturinn

Vöknuð af værum blundi

2006-11-06T13:35:00.000Z

Merkilegt hvað ég get verið dugleg. Á föstudaginn var Folinn rekinn út úr húsi með Prinsessuna og fljótlega tóku að streyma að fagrar konur héðan og þaðan af höfuðborgarsvæðinu. Ákveðið hafði verið að við samstarfskonur myndum hittast og elda okkur dýrindismat og eiga góða kvöldstund saman. Þetta gerum við reglulega og höfum þá einhverskonar þema í matargerðinni. Í þetta skiptið ákváðum við að vera með “thanksgiving” dinner. Ógurlegur kalkúnn var sprautaður stútfullur af smjöri og í hann troðið fyllingu þar til út úr flæddi. Með þessu var ýmiskonar góðgæti, allt saman amerískt að uppruna og þrírétta desert til að “loka” þessu mikla matarkvöldi. Á laugardagskvöld varð hlutverkaskipting þar sem Spretturinn og Prinsessan voru send úr húsi þar sem Folinn var með nokkra vinnufélaga í dinner. Helgin endaði svo í gærkvöldi hjá Foreldrunum í humri og kjúklingi. Ekki dónalegir dagar þetta. Nú þarf ég ekki að borða fyrr en á jólunum þar sem ég úðaði svo ægilega í mig um helgina.

Jólin eru að koma svo nú er er byrjað að versla jólagjafir. Prinsessan sagði í gær, alveg í sjokki “mamma, það eru sko bara sex vikur þar til jólin koma, við verðum að fara að kaupa pakka”......okkur hefur tekist að kaupa þrjá slíka, svo nú eru ekki nema 23 eftir :/ Hugmyndin er sú að vera búin með allt ekki seinna en 1. desember, nema kannski fyrir grislingana okkar og Folann. Svo þarf að vera með eitthvað sniðugt í skóinn fyrir Prinsessuna og passa að jólasveininn skrópi ekki í gluggamætingum því sú stutta er svo ægilega samviskusöm að fara snemma í háttinn um leið og sá rauði boðar komu sína til stilltra barna. Folann verður að fara senda á veiðar ef fjölskyldan á að fá sína rjúpu á jólunum. Unglingurinn verður líklega lítið heima við í jólafríinu þar sem stefnan er tekin á vinnumarkaðinn þessar þrjár vikur sem fríið er. Líklegast verður það í einhverjum stórmarkaðinum þar sem almúginn og nemendur í jólafríi vinna 29 tíma á sólarhring þegar mest lætur í jólaösinni. Það um að gera að láta þetta lið vinna svolítið fyrir aurunum sem það fær svo útborgað, enda ekki ólíklegt að það hali nú inn hátt í hundraðkallinum fyrir þennan mánuðinn. Búið að berjast svo svakalega fyrir hærri lágmarkslaunum að þetta er að setja bankastjóralauninn úr skorðum. En almúginn hefur ekkert við hærri laun að gera, myndi bara eyða honum í óþarfa vitleysu. Vælinn er svo ógurlegur í almúganum að það heimtar alltaf meira og meira, segist þurfa að lifa eins og aðrir í þjóðfélaginu. Hvaða bull er þetta eiginlega, er ekki nóg að eiga fyrir húsaleigu og mat? Einstaka eyðslukló heimtar kannski hikstalaust að eiga bíl til umráða líka. Yfirgangurinn....

Sprettur jólasveinn

Heimskur, heimskari, heimskastur

2006-10-20T11:27:00.000Z

Sumt fólk er vitlausara en annað og svo eru það þeir sem eru mikið vitlausari en aðrir eða alveg óheyrilega heimskir og þess vegna verðum við kannski að sýna slíku fólki skilning og koma fram við það eins og óvita barn. Einn af þeim sem á heima í síðarnefnda hópnum er Paul Watson, forseti umhverfissamtakanna Sea Shephard, en hann líkir hvalveiðum Íslendinga við kjarnorkutilraunir Norður Kóreumanna. Er frekari útskýringa þörf??

Spretturinn yfir sig hneykslaður á þessu fjaðrafoki yfir 9 hvölum (eða 1.800.000 kjötbollum)

Losnaði aðeins um ritstífluna.....

2006-10-19T14:20:00.000Z

Renndi í Spöngina í gær og tók kroppinn í gegn með ógurlegum æfingum. Þar var nú líka aldeilis margt um manninn eins og alltaf er á þessum tíma dagsins. Ég byrjaði á að skella mér á brettið og fletta milli sjónvarpsstöðva þar til ég lenti á einni menningarstöðinni sem hentaði mínum hlaupahraða. Stuttu síðar kom mér við hlið kona, sem væri ekki í frásögur færandi nema að það truflaði mig svolítið hvað hún var ófríð vesalingurinn. Ég get ekki skilið af hverju ekki er hægt að takmarka aðgang svona sjónmengunar og leyfa þessu fólki til dæmis að koma á vissum tímum sólarhrings, milli 9 og 11 fyrir hádegi myndi til dæmis henta mér ágætlega. Ekki nóg með að þetta hafi truflað mig á hlaupunum, þurfti þá ekki brjótast út ægileg svitalykt af þessu svokallaða sköpunarverki almættisins sem hljóp mér við hlið. Guð minn góður, eins og það hafi ekki verið nóg að trufla þessi tvö ubernæmu skynfæri mín svona hrottalega, nei nei.....svitin rann eins og frussandi stórfljót og fór svo að skvettast í allar áttir. Þá fékk maður sko nóg, enda búið að misbjóða fegurðar- og lyktarskyni mínu svo svakalega að mér lá við yfirliði. Færði mig því yfir á crosstrainer og kláraði mitt cardio þar, í friði fyrir ófríðu og illa lyktandi fólki sem kann ekki mannasiði.

Um helgina síðustu skruppum við Folinn á ball sem var haldið á Nordica, þ.e. stjórn Siglfirðingafélagsins hélt þar árshátíð fyrir “gamla” Siglfirðinga nær og fjær. Ég hef aldrei orðið svo fræg að mæta á slíka samkomu þar sem ég hef alltaf haldið það vera meira fyrir gamla fólkið sem er flutt úr firðinum í borgina og þarf að hitta aðra gamlingja annað slagið svona til að rifja upp gamla og góða tíma þegar öll dýrin í skóginum voru vinir og ekkert verið að rífast í litlu þjóðinni okkar útaf 9 hvalakvikindum sem eru víst of tilfinninganæmir og gáfaðir til að vera étnir, svona til dæmis. Anyway, við Folinn ákváðum að skella okkur á seinni hlutann, þ.e. ballið, þar sem glæsikvendaklúbbur Sprettsins ásamt mökum og fleiri jafnöldrum ætluðu að mæta og taka tryllta dansa við undirspil Bogomil Font og miljónamæringanna. Kom í ljós að meirihlutinn var nú bara fólk á besta aldri, eða 25-40 ára og gamlar frænkur og ellilífeyrisþegar í minnihluta, enda sjálfsagt að hafa aldurstakmark á svona skemmtanir. Við skemmtum okkur og öðrum alveg ægilega vel og dönsuðum þar til hljómsveitin söng sitt síðasta. Merkilegt samt hvað ég og mín fjölskylda, sem og vinir, vorum langflottust, en maður er svosem orðin löngu vanur slíku og kippir sér ekki upp við lofræður og hylli almúgans, ónei.

Fjölskyldan borðaði kvöldverð fyrir framan sjónvarpið í gær þar sem stórleikur Barcelona og Chelsea var sýndur á matmálstíma og ekki gátum við misst af slíkum stórleik. Maður varð að halda með Barcelona þar sem Eiður var að spila (einhver dulin þjóðarrembingur) en þar sem Chelsea er mitt lið í ensku deildinni voru blendnar tilfinningar sem leituðu á Sprettinn þegar úrslitin voru kunn, 1-0 fyrir Chelsea. Það þykir nú samt ekkert sérstaklega flott að halda með Chelsea í enska boltanum þar sem liðið er byggt upp af rússneskum billjónamæringi með mafíutengsl, but who cares.....Go Chelsea J.

Kveð að sinni
Sprettur

Stríð og friður.....

2006-10-13T13:45:00.000Z

Í franska þinginu voru í dag samþykkt lög þar sem gert er að glæp að neita því að Tyrkir hafi framið þjóðarmorð á Armenum á árunum 1915-1917. Einhver tralli innan ESB fordæmir þessi lög þar sem þau muni hafa slæm áhrif á viðræður fyrrnefndra morðingja um inngöngu í sambandið. Ég er reyndar sammála því að slík lög á ekki að setja, en af öðrum ástæðum. Mér þykir alveg einstaklega mikil höft á málfrelsi manna ef þeir mega ekki hafa sínar skoðanir á hlutunum (hversu rangt sem þeir hafa fyrir sér). Það er til að mynda glæpur að halda því fram að helförin hafi aldrei átt sér stað þar sem nasistar undir stjórn Hitlers myrtu miljónir gyðinga og á fólk á hættu að sæta fangelsisvist ef það segir svo opinberlega. Aftur á móti þykir það bara sjálfsagt mál að gyðingar þessir stálu landi Palestínumanna eftir stríðið, neita að afhenda það aftur, myrða menn, konur og börn miskunnarlaust, en kalla það svo hryðjuverk þegar Palestínumenn svara fyrir sig mig einstaka flugelda og sjálfsmorðsárás. Þá eru heilu Palestínsku fjölskyldurnar gerðar heimilislausar þar sem jarðýtur ryðja niður hús og híbýli manna handahófskennt að því er virðist, bara svona af því að í dag er þriðjudagur í dag og við drápum ekki nógu marga í gær þá erum við doldið krankí sko. Ísraelar réðust inn í Líbanon og drápu hundruði ef ekki þúsundir manna og alþjóðasamfélagið gerði ekkert, af því liðsmenn Hesbollah (sem er andspyrnuhreyfing en ekki hryðjuverkasamtök) voru svo djarfir að ræna tveimur ísraelskum hermönnum....TVEIR MENN. Ísraelar ætla, og eru, að reisa einhvern ógurlegan vegg til að loka Palestínumenn inn því þeim stafar svo mikil hætta af þeim, þeir eiga náttúrulega ekki nógu stóran herafla og nógu margar sprengjur til að útrýma þeim svona á einu bretti og því betra að geyma þá bara alla á sama stað (minnir svolítið á eitthvað sem gert var við eitthvað fólk í einhverju stríði.....) Við skulum endilega leyfa þessu fólki að halda áfram að drepa, pynta, fangelsa og fara illa með Palestínumenn, en fólk verður nú aldeilis passa sig á því að halda því fram að helförin hafi aldrei átt sér stað, úff púff, þá fyrst verða vandræði.

Ekki misskilja ofangreinda færslu sem svo að ég sé eitthvað hlynnt sjálfsmorðsárásum og á móti gyðingum, hvað þá að ég sé að halda því fram að helförin hafi aldrei átt sér stað. Ég er bara að benda á þá staðreynd að það hafa fleiri verið drepnir í stríðum en bara gyðingar í seinni heimsstyrjöldinni sem enginn talar um. Til dæmis voru rúmlega 11.000.000 borgarar í Sovétríkjunum drepnir í WWII á meðan tæplega 6.000.000 gyðinga voru drepnir í helförinni. Af hverju talar enginn um þessar ellefu miljónir? Og hvað með t.d. fjöldamorðin í Súdan ekki fyrir svo löngu síðan. Að minnsta kosti sýnist mér Ísraelar ekkert betri en nasistarnir þegar uppi er staðið.

Sprettur :)

Fótbolti....

2006-10-06T14:49:00.000Z

Alveg er merkilegt hvernig sumum getur tekist að stýra umræðu heils hóps þegar ljóst er að meira en helmingur hópsins hefur ekki áhuga á umræðuefninu. Í hádeginu á vinnustað Sprettsins er heit fótboltaumræða afskaplega oft í gangi hjá nokkrum karlmönnum sem starfa með mér og er hádegið í dag þar með talið. Persónulega finnst mér allt í lagi að spjalla létt um fótbolta annað slagið, enda horfi ég á HM og einstaka leiki í ensku deildinni og hef gaman af, en þetta getur verið helvíti leiðinlegt svona endalaust að hlusta á umræðu um einhvern leik sem allir horfðu hvort eð er á, þessi leikmaður átti sko ekki að fá aukakast, þessi leikmaður var bara ekki í gírnum osfrv. Þetta er óskaplega fast í hausnum á sumum því þeim tekst meira að segja að snúa heitu slúðri um þjóðþekkta einstaklinga upp í fótboltaspjall því viðkomandi hafði einhverntímann spilað fótbolta með 3. flokki Vals!!!
Að auki eru þeir ekkert sérstaklega spenntir þegar þeir heyra okkur stelpurnar tala um fótbolta, sem ég skil ekki því við vitum nú aldeilis ýmislegt er snýr að boltanum. Fabio Cannavaro er t.d. ótrúlega flottur, ógurlega kynþokkafullur og fallegur með eindæmum og það að hann er frekar lágvaxinn skiptir ekkert svo miklu máli því það sést ekkert á vellinum þegar hann stendur við hliðina á hinum Ítölunum. Ofvaxni álfurinn hann Wayne Rooney er einstaklega óaðlaðandi drengur, smekklaus og kolvitlaus að auki. Calvin Klein auglýsingin með Freddie Ljungberg er alveg brjálæðislega vel gerð og hann er nú ekkert lítið heitur sá sænski. David Beckham þykir okkur einnig frekar flottur á kroppinn, svo framarlega sem hann talar ekki mikið. Hann er líka alltaf svo töff í tauinu. Rio Ferdinand og Michael Ballack má horfa á sér til skemmtunar þar sem þeir falla alveg í flottustrákafælinn. Ronaldinho er ógurlegt krútt, en þyrfti að heimsækja tannréttingasérfræðing við tækifæri og Ronaldo mætti nú alveg við því að slaka aðeins á í skyndibitanum, hefur bætt aðeins á sig strákurinn. Oliver Kahn þykir ekkert sérstaklega smart í tauinu utan vallarins og þyrfti að leita á náðir stílista áður en hann fer næst út á meðal fólks og þótt svo Zidane sé ekkert endilega svo myndarlegur þá er nú þessi hráa karlmennska sem gerir hann dáldið flottan, allavega í fjarlægð. Luis Figo þyrfti að koma sér upp góðum skammti af botox, hann er svo ægilega krumpaður greyið og Fernando Torres, OMG hafið þið séð lærin á stráknum.

Ekki segja að stelpur hafi ekki vit á fótbolta.

Enn og aftur verð ég að viðurkenna þá staðreynd að ég á það til að detta inn í ameríska lágmenningu þegar kemur að sjónvarpsglápi. Það sannast best á því að þegar Folinn fer í sinn miðvikudagskörfubolta þá sitjum við mæðgurnar og horfum á America´s Next Top Model, sem súperskvísan Tyra Banks stjórnar. Stelpurnar verða ómerkilegri, vonlausari og minna í þær varið með hverri þáttaröðinni. Þeir í Ameríkunni eru kannski orðnir uppiskroppa með flottar stelpur, gæti verið. Það besta við þættina, eins og ég hef áður sagt, eru síðustu mínúturnar þar sem maður fær að berja Nigel Barker ofurhönk augum og andvarpa örlítið yfir því hvað hann er flottur og svo veitir ekkert af að hafa smá karlmennsku til að vega aðeins upp á móti drottningunni Ms. Jay.

Í gær fékk ég komment frá gömlum skólafélaga, sem neitar reyndar að ljósta upp nafni sínu en ég mun komast að síðar hver er. Ýmsar minningar frá unglingsárunum spruttu upp í huganum, mismikilvægar en allar mjög skemmtilegar. Ég var óttalegur villingur á unglingsárunum og mátti minnstu muna að Foreldrarnir enduðu á hæli fyrir vikið, en þau sluppu fyrir horn. Við vinkonurnar vorum náttúrulega flottustu og heitustu stelpurnar in SigloCity, að okkur fannst, og þótti okkur bekkjarfélagarnir margir frekar lúðalegir. Stelpurnar voru t.d. ekki farnar að mála sig, klæddu sig eins og smástelpur og skrópuðu aldrei í skólanum. Strákarnir í bekknum voru flestir óttarlegir mömmustrákar og algjörir fábjánar, við umgengumst sko ekki svona litla strákalinga sem voru ekki nógu gamlir til að keyra og eiga bíl svo við höfðum hvort eð er engin not fyrir þá. Enda vorum við svo þroskaðar sko :/

Sprettur

Það er erfitt að vera ég

2006-10-05T09:38:00.000Z

Tók þétta æfingu í gær eftir vinnu, 45 mínútur í cardio og lyfti svo hraðhring á eftir þar sem ég tók vel þungt og hvíldi ekki á milli. Þetta var ógurlega erfitt og því eins gott að ég er í svona góðu formi og ægilega sterk að auki, því meðalmaður (kona) væri löngu liðinn útaf, slík voru tilþrifin. Ansi var nú margt í Spönginni seinnipartinn í gær og eins og alltaf fékk Spretturinn ómælda athygli sökum fegurðar og útgeislunar. Maður er svosem öllu vanur en þetta getur stundum verið þreytandi þegar maður er að reyna að einbeita sér að æfingunni. Þegar fólk ræður ekki við aðdáunarstunur og gláp er lítið við því að gera en þessir venjulegu verða að skilja að stundum þarf flotta fólkið bara smá breik til að sinna sínu. Sumir segja að ég sé of upptekin af eigin fegurð og glæsileika en það er bara ekki rétt. Það er mest annað fólk sem er upptekið af því, helst þá ljóta fólkið sem hefur litla aðra gleði í lífinu. Enda veit ég að sá sem fann upp orðatiltækið “fegurðin kemur innan frá” var mjög ljótur og óaðlaðandi svo það er ekki hægt að taka mark á því.

Hittingur mikill verður í Fannafoldinni í kvöld og þá er eins gott að hafa eitthvað gómsætt og huggulegt sem þessar stórfenglegu konur geta tínt í sig og var slíkur unaður undirbúinn í gærkveldi þar sem Spretturinn sauð saman dýrindisveitingar að hætti hússins. Ég er nánast orðlaus yfir eigin ágæti í eldhúsinu. Alltaf er ég samt jafn furðulostinn yfir því að það skuli vera hægt að safna saman svo mörgum yndisfögrum og elegant konum á einn stað. Allar eigum við það reyndar sameiginlegt að vera utan að landi, nánar tiltekið SigloCity, og ef ég vissi ekki betur þá hefði ég haldið að það væri bara tölfræðilega ómögulegt að svo mörg glæsikvendi kæmu frá einum og sama staðnum. Ókosturinn er hins vegar sá að undanfarin 10-20 ár hefur fólksfjölda farið snarfækkandi í þessari annars fínu borg norðan heiða og vísindalegar rannsóknir styðja þá niðurstöðu okkar að bæjarbúar hafa hreinlega gefist upp á lífinu eftir brottflutning kynþokkafyllstu kvenna bæjarins í stórum stíl. Örlítil aðlögun átti sér þó stað þar sem við fluttum ekki allar á sama tíma og var það að beiðni bæjarráðs sem biðlaði til manngæsku okkar. Nú virðist sem fólk hafi misst löngun til að hrúga niður börnum og eru æfingar þar af lútandi einnig á undanhaldi. Venjulega fólkið, a.k.a. flestir bæjarbúar, sem varð eftir hefur einfaldlega gefist upp eftir að gleðin í lífi þess yfirgaf það miskunnarlaust. Það bjargar því sem bjargað verður að örfáir ættingjar okkar auðmjúka hóps urðu eftir og reyna nú af mætti að halda uppi fegurðar- og gleðistuðli bæjarbúa mið misgóðum árangri þó.

Sprettur fagri

Titlatog

2006-10-03T14:20:00.000Z

Aldrei hef ég heyrt jafnkjánalegt starfsheiti eins og það sem getið er um á síðum mbl.is í dag, ljósfaðir! Hvaðan kom þetta? Ekki er ég hissa á að karlmenn sæki ekki í starfið þó ekki væri nema nafngiftarinnar vegna. Hvað starfar þú? Ég er ljósfaðir...ógurlega karlmannlegt. Annars eru hinir og þessir titlar oft afbakaðir og ljótir. Ég er ein af þeim sem þykir t.d. stýra (deildarstýra, skólastýra) alveg einstaklega hallærislegt og ljótt, má maður ekki bara vera stjóri þótt maður sé kona. Við hefðum sjálfsagt ekki átt að kalla Vigdísi Finnbogadóttir forseta heldur forsætu. Kona til sjós gæti þá verið stýrikona en ekki stýrimaður, nú eða hásæta. Starfsheitið kennari yrði að breytast í kennslukona og kennslumaður osfrv.

Á leið til vinnu í gærmorgun heyrði ég eitthvað sem átti að heita veðurfréttir en var eiginlega meira svona “ehh já hmmm..veðrið á landinu í dag....ehh...verður svipað....já...áfram hlýtt...öhh..hitatölur svipaðar og undanfarna daga...og verða ehh...á bilinu 5-8 stig í dag...bara nokkuð hlýtt....

Í kvöld er matarboð mikið þar sem boðið verður uppá marineraðan svartfugl sem Folinn plammaði niður á sunnudaginn. Þeir hafa legið í ægilegri marineringu sem engan svíkur og munu renna ljúft niður með flauelsmjúku rauðvíni af bestu gerð sem og íslensku vatni fyrir hænuhausana (og börnin). Æfingin verður því stutt í dag þar sem gestirnir munu mæta snemma og þá er eins gott að vera búin að skúra eldhúsið og leggja á borð fyrir þessa gamma . Ætlaði líka í badminton með vinnufélögunum í kvöld en líklega verð ég að beila á því þar sem hæpið er að ég getið annaðhvort stungið af úr eigin boði eða sent gestina heim með síðasta bitann á tungubroddinum.

Sprettur

Letilíf

2006-10-02T09:48:00.000Z

Fínasta helgi að flestu leyti. Eftir æfingu á föstudaginn var brunað heim og sláturgerðin tekin með stæl ásamt tengdó og foreldrunum. Unglingurinn tók virkan þátt þar sem hann sat og saumaði keppi. Prinsessan var einnig mjög áhugasöm og sá um að skammta mörina og rúgmjölið í blöndurnar. Laugardaginn byrjaði ég með æfingu og skrapp síðan með Unglinginn í Menningarmiðstöðina miklu, Kringluna, þar sem hann festi kaup á einhverjum fatnaði sem og tölvubúnaði sem er honum lífsnauðsynlegur til að geta spilað einhvern ógurlegan tölvuleik. Um kvöldið töfraði ég fram kjúklingapizzuna frægu og Unglingurinn bauð félaga sínum í mat. Þeir hafa ekki komist á séns það kvöldið þar sem pizzan innheldur um það bil heilan hvítlauksakur.

Sjaldan hef ég nú samt átt daga eins og í gær, sunnudag. Vaknaði fyrir allar aldir til að keyra Unglinginn á flugvöllinn þar sem hann hélt í skólann á ný eftir þessa stuttu helgarheimsókn. Fyrir hádegi fór Folinn í körfubolta eins og landslög gera ráð fyrir á sunnudögum og eftir það ætlaði hann að skjótast á svartfuglsveiðar með félaga sínum. Prinsessan ákvað að fara í Húsdýragarðinn með vinkonu sinni og var þar allan daginn. Þegar húsið var orðið tómt gerðu einhverjar undarlegar kenndir vart við sig hjá Sprettinum rétt í því sem átti að halda á æfingu, kenndir þessar eru mér er ókunnar með öllu, eða svona allt að því. Vissi því ekki fyrr en letin tók öll völd og ég fylgdi bara með eins og vel þjálfaður sirkustrúður. Ekkert varð úr æfingu, né nokkru öðru ef út í það er farið, þann daginn. Lá ALLAN daginn í lazyboy sófanum í sjónvarpsherberginu, ég og hundurinn með risaskjáinn, poppkorn og peanut butter M&M sem ég úðaði samviskusamlega í mig á meðan ég naut samvista við Carrie, Samantha, Charlotte og Miranda, Mr. Big og allar þær kynlífs- og sálarflækjur sem gera þættina einmitt svo ægilega skemmtilega. Ég rankaði við mér um hálfsjöleytið þegar Folinn kom heim með fullan poka af svartfugl, haglabyssan vel söltuð og öll skotin búin. Mér hafði tekist að klára seríu nr. 2 af Sex & the City og með henni einn popppoka, hálfan poka af M&M, tvær karamellur, 4 tekex, fjóra bita af suðusúkkulaði, eitt mjólkurglas, 2 djúsglös, eitt súkkulaðimöffins og hálfan pakka af extratyggjói. Í þokkabót var síðan ekkert eldað heldur skotist á American Style og keyptir feitir hamborgarar með frönskum og kók. Eftir þennan leti og sukkdag get ég með sanni sagt að mér leið verr en mér hafði lengi liðið, höfuðverkur, slen, illt í maganum og almennur aumingjaskapur hrjáði mig þar til ég sofnaði um kvöldið, hafði rétt rænu á að tannbursta mig áður en ég datt á koddann. Svaf ekki vel og finn að svona sukklíferni á ekki við mig. Mun líða langur tími þar til slíkt verður tekið fyrir aftur, ef þá nokkurn tíma, a.m.k. þannig að gleymt verði þvílíkan toll þessi hroðbjóður, sem sumir vilja kalla afslöppun en aðrir leti, tekur af bæði hug og kropp. Mun því mæta galvösk í Spöngina eftir vinnu í dag og taka vel á því til að hreinsa viðbjóðinn út. Úff hvað það er erfitt að lifa letilífi, mun helst ekki leggja það á mig í framtíðinni.

Sprettur haugur :/

Komin heim

2006-09-28T10:38:00.000Z

Komin aftur frá Barcelona og góða veðrinu. Mátti ekki tæpara standa æstir aðdáendur í Heimsklassanum hafa allir verið með ógurleg fráhvarfseinkenni sökum fjarveru minnar. Vil ég því minna á að ég verð í Spönginni í dag á mínum vanalega tíma að vinnudegi loknum þar sem ljóta og óaðlaðandi fólkið getur barið minn fagra kropp augum og tekið gleði sína á ný.

Prinsessan var að sjálfsögðu afskaplega ánægð að sjá foreldra sína og kyssti þau og kjassaði í bak og fyrir milli þess sem hún montaði sig af því að það hafi “sko ekki komið eitt einasta tár allan tímann”, sem er mikið afrek hjá þeirri litlu.

Sláturtíðin er í fullum gangi þessa dagana og fór Spretturinn því í búðarferð í gær þar sem keyptar voru upp birgðir Hagkaupa af sláturgerðarefni, eða svona allt að því. Framundan er því mikil sláturgerðarhelgi hjá stórfjölskyldunni sem ætti nú aldeilis að verða gaman. Unglingurinn ætlar meira að segja að reyna að komast í bæinn svo hann verður settur í að brytja mör og hræra blóð. Síðan er meiningin að litla fjölskyldan skelli sér norður í land og heimsæki piltinn og ætla amma og afi að vera með í för. Búið er að leigja hús og híbýli fyrir fólkið og er planið að hafa það bara gott, skella sér út að borða með strákinn og rölta um og skoða mannlíf stórborgarinnar Akureyri. Tvö glæsilegustu kvendi bæjarins verða kysst og knúsuð og heimta ég hér með smá hitting, ef þið eruð að lesa (eins og ykkur ber að sjálfsögðu heilög skylda til).

Rit- sem og nefstífla á hæsta stigi er að ergja Sprettinn svo ég læt þetta gott heita í bili og kveð þar til næst :o)

Unglingasápur

2006-09-19T16:10:00.000Z

Komið fram í miðja vinnuviku hjá Sprettinum sem fer í frí eftir morgundaginn. Ekkert sérstaklega langt svosem en þó fram í næstu viku. Spáin er 28° stiga hiti og sól alla vikuna í Barcelona sem vonandi gengur eftir, nenni ekki að rigna niður þessa örfáu daga sem við verðum á staðnum.

Í gær ákvað ég að sleppa æfingu og fara heim til mín og einbeita mér að því að gera ekki neitt. Kveikti á sjónvarpinu og á á Skjá einum var þá að byrja gömul unglingasápa sem flestir jafnaldrar mínir muna vel eftir, Beverly Hills 90210. Ég ákvað að fylgjast með þessum trendsetterum allra alvöruunglinga á sínum tíma. Man hvað ég var yfir mig ástfangin af Dylan sem var þessi örlítið uppreisnargjarni unglingur og töffari með meiru....eins og ég sjálf náttúrulega. Sveiflaðist stundum á milli hans og Brandon sem var þessi skynsama týpa með ógurlega sterka réttlætiskennd. Brenda tvíburasystirin var líka í uppáhaldi af aðalpíunum sem voru ásamt henni, Kelly og Donna. David þótti mér ávallt óskaplega hallærislegur og skildi aldrei hvað Donna sá við hann, en hún óð nú svosem ekki í vitinu stúlkan sú. Steve einhvernveginn bara “var”, ekkert endilega neitt sætur, stundum smá skemmtilegur en bara mest svona ....ekkert. Jim og Cindy voru draumaforeldrar allra unglinga. Í nánum tengslum við krakkana og treystu þeim og dómgreind þeirra fullkomlega, eða svona yfirleitt. Svo var það Melrose Place, en þeir þættir tóku við af BH90210 og slógu einnig í gegn hjá Sprettinum. Flottari strákar, flottari stelpur, kynlíf, svik, framhjáhald, tæling, morð, ástarflækjur og geðklofi svo eitthvað sé nefnt. Ég horfði á einn slíkan þátt og rifjaði upp gamlar MP minningar. Jake er búin að vera með Jo sem hætti með honum, síðar reyndi hann að stofna til sambands með Jane sem var systir Sidney, sem Jake hafði einnig verið með fljótlega eftir að hún hætti að starfa sem rándýr hóra. Billy var herbergisfélagi Alison, en það þróaðist fljótlega í annað og meira. Þegar því lauk, líklega vegna ofdrykkju Alison, fór Billy að vera með Amöndu sem var yfirmaður Alison á auglýsingastofunni. Eftir að þau hættu saman fór Billy einnig að vinna á auglýsingastofunni. Nýlega birtist bróðir Jake og að sjálfsögðu er hann nú farinn að vera með Jo. Amanda reyndi að eiga í stuttu sambandi við Michael, sem var fyrrverandi maður Jane en hélt framhjá henni með Kimberly og þau skildu í kjölfarið, en það gekk ekki upp svo hún fékk víst taugaáfall og var rekin sem forstjóri auglýsingastofunnar, þar sem Alison tók við starfinu. Svo er fólk forviða yfir því að unglingsárin séu ruglingsleg. Nýlega sá ég leikarann Jason Priestely (Brandon) þar sem hann leikur eitt hlutverkanna í þáttunum Love Monkey sem einnig eru sýndir á Skjá einum. Leikarinn Grant Show (Jake) birtist í þættinum Beautiful people þar sem Daphne Zuniga (Jo) leikur einmitt aðalhlutverkið. Doug Savant (Matt) leikur Tom, eiginmann Lynnette í Desperate Housewifes. Courtney Thorne Smith (Alison) er kona James Belushi í According to Jim og Shannen Doherty (Brenda) lék eina nornasysturina í Charmed. Þetta rifjaðist allt upp fyrir mér þegar ég horfði á þessar gömlu unglingasápur og svo nýrri þætti sem þetta sama fólk leikur í núna þónokkuð mörgum árum síðar og ég sá að sumir höfðu elst betur en aðrir. Segið svo að maður nýti ekki tímann í heilbrigðar og skynsamlegar vangaveltur um heimsmálin ;0).

Sprettur sápa

Helgin

2006-09-18T12:01:00.000Z

Gleðilegan mánudag og velkomin af lakinu, eins og góð vinkona mín orðaði einu sinni svo vel. Í nótt var lítið sofið og þá ekki vegna þess að ég var svo ógurlega upptekin af heitu kynlífi með Folanum, nei heldur skreið Prinsessan uppí um miðja nótt og hafði Spretturinn bara ekki rænu á að færa hana aftur í sitt eigið rúm, heldur lá ég það sem eftir lifði nætur og færði fótleggi Prinsessunnar og handleggi frá mér því einhver óstjórnleg þörf var hjá blessuðu barninu að breiða leggjum sínum í sífellu yfir hálfsofandi móður sína. Einmitt, hálfsofandi er það ástand sem Spretturinn glímdi við í um það bil 4 klukkustundir áður en fjölskyldan fór á fætur í morgun. Prinsessan útsofin að sjálfsögðu þar sem hún hafði jú breytt svo vel úr sér. Svona getur maður verið vitlaus í hálfsvefni.

Tók annars vel á því með G-strengnum um helgina þar sem við mættum galvaskar í morgunsárið bæði laugardag og sunnudag. Lyftum hundruðum kílóa og vorum að sjálfsögðu langflottustu úthverfapíurnar á höfuðborgarsvæðinu. Skil ekki fólk sem ekki nennir að hreyfa sig, kannski það sé bara haldið einhverri flottfælni því allir vita að það er kúl að vera í formi. Merkilegt hvað er mikið af fólki nennir ekki að hreyfa sig og sötrar kalt kaffi og svælir í sig heimatilbúnum sígarettum á einhverri kaffibúllu allan daginn haldandi að það sé voðalega töff og kúl. Þar fyrir utan er ég samt mjög meðmælt kaffihúsarölti og hvítvínsþambi sem því fylgir, svona annað slagið.

Á laugardagskvöld fórum við Folinn í teiti útí bæ, sem væri nú ekki í frásögur færandi nema fyrir það að í miðju samkvæmi kom askvaðandi inn í stofuna mannkríli sem ég held að sé óhætt að segja að allir Íslendingar þekki og mögulega gegn vilja sínum. Um mig hríslaðist kjánahrollur og svei mér ef ekki læddist örlítið gallbragð í munninn á mér. Þetta kríli fór stórum og fögrum orðum um eigið ágæti og meðal annars gólaði upp úr þurru "það er enginn meiri en Geiri" í miðri setningu. Já mikið rétt, þetta var hinn eini sanni Iceblue, a.k.a. Geir Ólafs, sem þarna kvað upp raust, reyndi að vera pínulítið fyndinn og flottur áður en hann söng lögin tvö sem hann kann við undirspil af geisladisk, sem btw hann sjálfsagt tekur með sér hvert á land sem er,svona bara til öryggis ef ímyndaðir æstir aðdáendur heimtuðu að hann tæki lagið í sjoppunni í Varmahlíð or sommþeing. Ég verð að viðurkenna að maður glotti nú aðeins og átti bágt með að fara ekki að hlægja því hann var bráðfyndinn maðurinn. Það versta var samt að hláturinn varð að bæla niður því hann var alls ekkert að reyna að vera fyndinn.

Fórum líka í bíó um helgina og sáum Crank með Jason Statham sem mér finnst alveg ógurlega flottur og karlmannlegur. Myndin var hin fínasta skemmtun, góður húmor svo ég hló og rýndi eins og svín og skemmti mér ægilega vel í góðum félagsskap Folans og fleiri aðdáenda.

Spretturinn kveður

Skór

2006-09-15T14:50:00.000Z

Skrapp í Kringluna í hádeginu til að kaupa eina skólabók fyrir Unglinginn sem og afmælisgjöf sem Prinsessan þarf að hafa með sér þegar hún fer í fæðingarveislu einnar vinkonu seinna í dag. Datt aðeins inn í nokkrar skóbúðir í leiðinni og pínkupons inn í Karen Millen og Kúltur. Merkilegt hvað maður á auðvelt með að detta inn í svona búðir þó maður geri allt í sínu valdi til að sneiða hjá þeim. Svo detta bara fimmþúsundkallarnir stjórnlaust upp úr veskinu þegar maður rekur augun í einhverja girnilega flík eða skó. Minn helsti veikleiki á bæjarrölti (Kringluhlaupi í þessu einstaka tilviki) eru samt skóbúðir. Finn ógurlega og jafnframt viðurkennda (a.m.k. meðal kynsystra minna) þörf fyrir nýja skó mjög reglulega eða svona um það bil í hvert skipti sem ég fletti tísku- eða slúðurblöðum, horfi á auglýsingar í sjónvarpi eða heyri í útvarpi. Þá er sko ekkert endilega verið að auglýsa skó. Kannski er konan sem er að auglýsa múrbrjótinn eða loftpressuna bara í ægilega huggulegum skófatnaði og þá er það akkúrat það sem Spretturinn tekur eftir, þ.e. skórnir. Mér þótti ég ekki eiga neitt brjálæðislega mikið af skóm samt, eða alveg þangað til skóumræða við vinnufélaga minn varð til þess að hann spurði mig hversu mörg skópör ég ætti. Ég svaraði hreinskilnislega að það væru í heildina kannski u.þ.b. 45 – 50 pör, en það væri MEÐ ÖLLUM , þ.e. íþróttaskóm, gönguskóm o.þ.h. Ég fékk bara gapandi munn upp á gátt og augu á stilkum, vesalingurinn kom ekki upp orði en þegar viðkomandi rankaði við sér sagði hann bara að ég væri sko ekki í lagi. Ég fór að hugsa minn gang og velta fyrir mér hvort kannski væri það óvenjulegt og óheilbrigt með meiru að eiga ekki bara eina íþróttaskó, eina gönguskó og eina spariskó. Eftir því sem ég velti þessu meira fyrir mér komst ég að þeirri niðurstöðu að ég væri óvenjulegur skófíkill að einu leyti og það væri að ég ætti bara alls ekki nógu mörg skópör, því allir alvörufíklar eiga sko miklu fleiri. Enda er umræddur vinnufélagi karlmaður og því augljóst mál að þó ekki sé nema sökum kynferðis hans þá get ég ekki tekið slíkar yfirlýsingar alvarlega og mun því eftir fremsta megni reyna að bæta að minnsta kosti einu pari í skósafn mitt þegar við Folinn bregðum okkur til Barcelona í næstu viku.

Gangið hægt um gleðinnar dyr,
Imelda Marcos de la Sprettur

Sjónvarpsgláp

2006-09-14T10:14:00.000Z

Gerðist svo djörf að sleppa æfingu í gær sökum tímaskorts. Prinsessan og Folinn tóku sig til og elduðu gómsætar ítalskar kjötbollur með pastalengjum. Prinsessan einstaklega lagin við að hnoða og blanda í gumsið. Foreldrarnir litu í mat og ákveðið var að ganga í sláturgerð í lok mánaðarins þar sem við vorum greinilega aðeins of fljót á okkur að ætla í slátrið um næstu helgi, því sláturgerðarefni verður ekki í boði í verslunum fyrr en eftir rúma viku .

Körfuboltaævintýri Folans er hafið á ný eftir sumarfrí og var fyrsta æfing í gærkveldi. Við mæðgurnar skemmtum okkur yfir amerískri lágmenningu sem hefur hafið göngu sýna á á Skjá einum á ný, eða America´s next top model. Það er varla að ég viðurkenni fyrir sjáfri mér að hafa gaman af þessum þáttum en svona er það bara. Þarna eru samankomnar, eins og áður, hópur af ungum stelpum sem flestar eiga það sameiginlegt að vera ógurlega mjóar og æðislega sætar. Þarna er þó ein sem fór strax alveg svakalega í taugarnar á mér, Jade, sem er hin mesti hrokagikkur og leiðindaskjóða. Voða flott á myndum en verður einhvern veginn bara hundljót af því hún er svo leiðinleg. Afríkudrottningin Nnenna er mitt uppáhald, svona í bili að minnsta kosti. Helsti kosturinn við þennan þátt í heild er að heyra og sjá hinn úbersexý ljósmyndara og dómara Nigel Barker, kynþokkinn hreinlega drýpur af manninum. Ms. Jay er alltaf jafnfurðuleg(ur) og skrýtinn. Skil ekki af hverju sumir hommar eru ósköp og venjulegir karlmenn en svo eru aðrir sem fara algjörlega overboard á hinn veginn. Ms. Jay er einn af þessum “hinn veginn” hommum. Þetta er ekki einu sinni kvenlegt, engin heilvita kona hagar sér svona svona því þetta er svo ógurlega ýkt að það er bara bjánalegt. En það er hægt að brosa að honum svo sjálfsagt gegnir hann einhverju hlutverki í þessum þáttum öðru en því að kenna þessum stelputrippum að ganga. Svo er það hinn Jay”inn”, voðalega sætur strákur, dáldið í kvenlegri kantinum, en ósköp venjulegur að öðru leyti, huggulegur strákur sem hægt er að taka alvarlega því hann kemur ekki þrammandi fram sýningarpall á 15 sentimetra háum hælum og í stuttum kjól með uppsett hár og rósir í eyrunum. Tyra Banks er bara Tyra Banks, falleg kona sem kann að nota frægðina sér (og öðrum) til framdráttar, ekkert nema gott um það að segja.
Ég ætti algjörlega að vera sjónvarpsþáttagagnrýnandi, sé það núna. Gæti allavega ekki verið dómari í svona þætti því þá tæki enginn eftir þessum stelpugreyjum sem eru að baslast við að vera sætar og sexy.

Æfing í Spönginni í dag og á morgun, síðan er það hardcore æfingar um helgina með G-strengnum sem ætlar að mæta galvösk í spandexgallanum með legghlífarnar bæð laugardags- og sunnudagsmorgun :)

Sprettur

Enginn titill

2006-09-12T09:36:00.000Z

Af því ég er svo ógeðslega falleg og töff þá er stundum svolítið erfitt fyrir mig að vera á meðal venjulega fólksins því það glápir svo mikið á mig. Í ræktinni í gær varð ég illilega vör við þessi þroskahöft . Ég var að taka brjálað á því eins og vanalega og vera ég ótrúlega flotta sjálf, en þarna voru einhverjir guttar sem voru alltaf að gjóa glyrnunum á mig. Hélt fyrst að þeir væru bara að öfundast af því ég er svo æðislega miklu sterkari en þeir. Lét það því ekki á mig fá þó þeir gláptu aðeins, en konurnar þeirra eru örugglega illa tilhafðar með aflitað hár og næntísmeiköpp úthverfamæður og maður verður að sýna slíku skilning, enda ekki allar konur sem geta verið bombur og natúral bjútís eins og ég. En þeir voru með uppglennt hvolpaaugun og slefið í munnvikunum í hvert sinn sem ég gekk framhjá þeim svo þetta var að verða vandræðalegt. Ég byrsti mig aðeins við þá og sagði ákveðið að enginn vildi renna á rassinn í aumingjaslefi á líkamsræktarstöð svo þeir yrðu bara að taka sig saman í andlitinu og fara í kalda sturtu. Þeir urðu ægilega skömmustulegir og sögðust bara ekki ráða við sig því ég væri svo ótrúlega flott og æðisleg. Aha, tell mí sommþeing æ dónt nó :/

Yfir í allt annað, m helgina ætla ég að feta í fótspor íslenskra kjarnakvenda og taka slátur með fjölskyldunni. Þá verður nú aldeilis fjör í Fannafoldinni leyfi ég mér að segja. Foreldrarnir og Tengdó mæta á svæðið stútfull af sláturfræðum sem beint verður til komandi kynslóða. Það verður nú aldeilis hressandi að geta skellt slátri í pottinn af og til þegar veturinn skellur á. Fullt af börnum sem aldrei hafa borðað heitt slátur eða svið....skil ekki svoleiðis. Verðum að viðhalda okkar gömlu góðu hefðum, sérstaklega þessum góðu Í næstu viku ætlum við Folinn síðan að skjótast til Barcelona í nokkra daga þar sem við munum rölta um stræti og torg, vonandi í góðu veðri, og láta fara vel um okkur á fimm stjörnu hóteli í miðborginni. Vorum jafnvel að spá í að fara á leik Barcelona vs. Valencia en það eru bara til miðar á dýrasta svæðið sem kosta litlar 175 EUR á mann, eða tæpar 16.000 krónur. Svo var maður að væla yfir miðaverði á landsleikina hér heima, þar sem dýrasti miðinn er á 5.000 kallinn :/
En, þar sem ég hef aldrei orðið svo fræg að koma til Barcelona og ef einhver er með góða punkta varðandi restauranta, möst sí staði eða hvað sem er....plís tell mí á kommentakerfinu.

Annars er ég eitthvað svo hugmyndasnauð og stífluð þessa dagana að ég rétt næ að merja í gegn örfáar og ómerkilegar setningar á þessu blessaða bloggi.

Farin í bili,
Sprettur fagri

Blessuð börnin

2006-09-06T13:55:00.000Z

Prinsessan tók fyrstu körfuboltaæfingu vetrarins seinnipartinn í gær og var hæstánægð með að vera byrjuð aftur. Held hún sé bara nokkuð góð sú stutta. Merkilegt hvað margar af stelpunum (og strákunum kannski líka) sem eru með henni í bekk eru latar og ræfilslegar. Fæstar nenna að stunda einhverjar íþróttir og ef þær nenna því eru þær keyrðar og sóttar á æfingar, sem eru kannski í ca. 10 mínútna göngufæri frá heimilum þeirra, ansi margar eru keyrðar í skólann á morgnana og þá jafnvel sóttar líka. Borða kókópöffs í morgunmat, taka möffins í nesti og úða í sig kökum og kexi í eftirmiðdaginn sem skolað er niður með gosi og sykruðum jógúrtdrykkjum. Er það nokkur furða að íslensk æska sé að springa úr spiki og aumingjaskap. Foreldrarnir láta þessi grey gangast upp í ræfildómi og leti þar sem friður fyrir röfli er keyptur með nammipoka og íspinnum. Prinsessan hjólar eða gengur í skólann alla daga, mögulega er hún keyrð í ausandi rigningu, en rok, snjókoma og kuldi er ekki látið standa í vegi fyrir hjóla- eða göngutúr. Hún gerir slíkt hið sama er kemur að körfuboltaæfingum, sem eru þó í næsta hverfi, þ.e. Hamrahverfinu. Hún borðar ósætt morgunkorn eða ristaða brauðsneið í morgunmat alla daga, drekkur vatn með því henni þykir það best, nestispakkinn inniheldur yfirleitt ávexti, flatkökur og slíkt sem hún rennir síðan niður með klakavatni. Á heimili Spretts er kókópöffs keypt einu sinni á ári, jólunum. Mín börn eru vön þessu og þykir ekkert tiltökumál þó ekki séu allar hillur fullar af sykurjógúrti og súkkulaðikexi. Sem betur fer.

Unglingurinn er farinn í framhaldsskólan á Laugum og er bara sáttur við lífið og tilveruna. Mikið hefði ég viljað fara í heimavistarskóla á hans aldri, þvílíkt ævintýri. Þetta var þó aðeins meira tilstand að senda drenginn norður í land heldur en ef hann hefði farið í MS, sem hann hætti svo við ca. korter í skólasetningu . Það þarf náttúrulega að merkja hverja einustu flík með einhverju fyrirfram ákveðni þvottanúmeri. Það er gert til að blessaðir unglingarnir fái nú örugglega rétt föt tilbaka úr þvottahúsinu, því ekki held ég að þessi elska tæki sig neitt sérstaklega vel út í bleikum g-streng, þröngum Tark buxum og flegnum gullbol við. Svo þurfti að pakka niður hverri einustu flík sem drengurinn á, skólabækur í bunkum sem keyptar höfðu verið á skiptibókamarkaði í borginni, handklæði, skófatnaður, íþróttataska, skólataska og guð má vita hvað. Þetta hófst þó allt að lokum þegar Spretturinn var búin að standa sveitt með merkiborða og strauja á allar flíkur. Nú á bara eftir að senda þeim stutta (eða þannig) DVD diska sem hann vildi fá, græjurnar og lítinn “Coca Cola” kæli sem Systir var svo elskuleg að lána honum svo hann gæti nú haft kannski nokkra kalda drykki eða eitthvað annað inni á herbergi. Anyways, gott í honum hljóðið og gengur bara vel, svona fyrstu vikuna að minnsta kosti.

Ekki horfði ég á Rockstar í gær frekar en fyrri daginn, en mun fylgjast með endursýningunni í kvöld. Kaus þó kappann nokkrum sinnum í morgun þar sem ég “var stödd” með tölvuna í Auckland á Nýja Sjálandi. Kíkti aðeins á frammistöðuna á netinu og þótti bara nokkuð gott hjá gaurnum.

Sprettur út

Rockstar

2006-09-05T09:09:00.000Z

Rockstar Supernova er nýjasta æðið hjá landanum þessa dagana. Magni stendur sig eins og hetja, en ég skil ekki af hverju ég var ekki beðin um að fara því þá væri búið að senda alla heim með skít og skömm því ég er svo ógeðslega góð söngkona. Miklu betri heldur en þessar glyðrur sem eru þarna núna, Dílahana og Stormur í vatnsglasi, tala nú ekki um spartzldolluna þarna með aflitaða kambinn, ómægod, kom í ljós að þetta var ekki rosalega mössuð og ófríð kona, nei nei heldur kanadískur karlmaður sem gengur um eins og útbrunninn transari sem kannski eitt sinn var dragdrottning Halifax og lifir á þeim gamla draumi ennþá. Svo er einn þarna líka sem lítur nú nokkuð eðlilega út, þar til hann fer að berjast við að tala.....er þetta eitthvað syndrome sem hann er með eða er kannski bara verið að djóka með okkur...nei, ég held að við ættum bara að senda eftir Magna til að koma heim til konu og barns því þessir geðsjúklingar geta bara ekki verið að hafa góð áhrif á svona stapílan og mikinn fjölskyldumann sem hann og er. Nei, ég get ráðist svona á aumingja fólkið...tek þetta allt tilbaka því mér finnst þau öll frábær og ótrúlega góðir söngvarar, ég er nú ekki svo hörð að ég vaki og horfi í beinni, en missi þó helst ekki af endursýningunni, því fátt þykir mér skemmtilegra en að fylgjast með góðum söngvurum sýna hæfileika sína, þótt svo ég viti innst inni að ég er miklu betri, enda ekki að ástæðulausu sem ég hef aldrei komið opinberlega fram því þá væru allir íslenskir tónlistarmenn atvinnulausir og ég nenni bara ekki að vera þessi ótrúlega hæfileikaríka og flotta sem allir öfunda. Nóg er nú samt að hafa allt ljóta fólkið gónandi á sig alla daga.

Björn Bjarnason, sá er titlar sig dómsmálaráðherra, segir Íslendinga þurfa að búa sig undir komu alþjóðlegra glæpahringja. Vísar hann til fjölda Litháa sem hafa verið handteknir undanfarin misseri. Er maðurinn asni? Auðvitað leita þessir menn hingað til lands, ef þeir nást og eru svo óheppnir að fá dóm, þá fá þeir þetta fína sumarfrí á Kvíabryggju í nokkra mánuði í fríu fæði og nýjum rúmum með kveðju frá Árna Johnsen. Kannski er það þess vegna sem við þurfum leyniþjónustu!

Nóg í bili, reyni að renna inn færslum aðeins oftar á næstunni.
Sprettur flottasti

Glænýtt grænmeti

2006-08-17T14:42:00.000Z

Prinsessan setti niður ýmisskonar grænmeti í skólagörðum Reykjavíkurborgar núna fyrr í sumar og er uppskeran nú komin í hús. Er nú ísskápur fjölskyldunnar úttroðinn af fersku grænmeti sem verður vel nýtt í matargerð á næstunni. Í gærkveldi var til að mynda búið til gómsætt salat sem úr klettasalatsblöðum og öðrum salatblöðum sem ég kann ekki að nefna, úr garði Prinsessunnar að sjálfsögðu, smjörsteiktar babykartöflur með timjani og blaðlauk, einnig úr garði þeirrar stuttu. Marineraðar svínalundir grillaðar af Folanum, sesamfræ og niðurskornar plómum kom þó frá Hagkaupum. Þar sem Prinsessan var nýkomin úr tveggja daga ferðalagi með ömmu og afa var ekki tekið í mál að leyfa mömmunni að fara á æfingu því hún hafði saknað mín svo ógurlega mikið þessi elska. Fékk ég þó örlitla hreyfingu þegar við mæðgur ákváðum að fara í smá hjólatúr og lá leið okkar í Hagkaup í Spönginni þar sem plómurnar voru keyptar, en þótti okkur helst til stutt að taka hjólatúr í Nóatún sem er í næsta nágrenni við Fannafoldina. Folinn brá sér á skotsvæði seinnipart dags til að rifja aðeins upp skothæfni áður en haldið yrði á veiðar með félögunum annað kvöld.

Mæti tvíefld til leiks í Spöngina í dag og tek góða brennslu og örlitlar lyftingar ef tími gefst því eldamennska kvöldsins er skipulögð fram í fingurgóma eins og alltaf og ætlar mamma Sprettsins að mæta í mat þar sem sá gamli þurfti að skreppa á fund í Svíþjóð. Í boði verður þorskur undir kryddþekju og verða kartöflur úr garðinum góða að sjálfsögðu meðlæti kvöldsins. Milli æfinga og eldamennsku verð ég þó að fara með Prinsessuna í leikfangabúð þar sem hún ætlar að kaupa sér playmodót fyrir peninga sem hún fékk í afmælisgjöf og tók af mér loforð um að ég færi með henni í innkaupaferð í dag.

Anyways, lítið að gerast og því lítið að segja.
Sprettur kveður

Komin úr fríinu...í bili :)

2006-08-15T11:33:00.000Z

Aldeilis sumarfríið hefur nú verið fínt. Við höfum þvælst aðeins um landið með hjólhýsið í afturdragi en þó líka verið ógurlega heimakær og haldið mikið til í borginni þar sem tíminn hefur verið notaður í æfingar, kaffihúsaferðir, afslöppun, lestur og ýmislegt annað uppörvandi og skemmtilegt. Flestir dagar hafa þó byrjað með æfingum Sprettsins sem tekur ekki í mál að sleppa slíkum munaði þó farin sé í frí, enda eru það forréttindi að nenna að hreyfa sig eins og góður maður orðaði svo vel eitt sinn. Fríið hófst með ævintýraferð í Héðinsfjörðinn sem hafði verið skipulögð ásamt tvennum vinahjónum og afkvæmum þeirra. Rennt var í Ólafsfjörðinn þar sem mágkona mín og maður hennar tóku vel á móti okkur og lánuðu hús í eigu fjölskyldunnar undir ferðamenn. Við gistum þó í hjólhýsinu en húsið kom að góðum notum þegar elda átti fyrir stóran hóp svo ég tali nú ekki um salernisferðir manna, kvenna og barna. Á laugardagsmorgni var svo nesti smurt í stórum stíl því nú skyldi haldið í langa göngu þar sem stefnan var tekin á Héðinsfjörðinn. Lentum við í hinum ýmsu veðrum á leið yfir fjallið, svosem roki, rigningu, örlítilli sól en þó var ágætis gönguveður lengst af. Þar sem snjóaði í lok maí þarna norðan heiða var þónokkur snjór í fjöllum ennþá sem við strunsuðum yfir eins og ekkert væri og renndum okkur svo niður hinum megin börnunum til mikillar ánægju. Mikil mýri var á leiðinni og þrátt fyrir góða gönguskó var maður orðin svolítið blautur í fæturna þegar á leið. Börnin 3 sem voru 5, 8 og 9 ára stóðu sig eins og hetjur, kvörtuðu aldrei og gengu alla leiðina fyrir utan þann yngsta sem borinn var í mesta brattanum og tekinn á hestbak í tví- eða þrígang á leiðinni í smátíma í senn. Í heildina tók þessi ganga okkur rétt tæpa níu tíma sem var þónokkuð lengri tími en við höfðum ætlað en við gengum alveg niður að sjó sem bætti líklega u.þ.b. 11/2 tíma við þessa venjulegu göngu sem farin er niður að Héðinsfjarðarvatni. Í fjörunni beið báturinn sem siglt hafði frá Ólafsfirði með tjöld og vistir til útilegunnar sem átti að vera 2 dagar. Um það bil 10 mínútum eftir að báturinn fór kom þvílíkt rok að ég hef aldrei á ævinni upplifað annað eins. Við ætluðum aldrei að koma tjöldunum upp og endaði með því að þurfti að bera rekaviðsdrumba að tjöldunum og binda stögin við, setja stór grjót á tjaldhælana sem ruku upp í rokinu um leið og þeir höfðu verið settir niður. Allt tókst þetta að lokum og um miðnættið fengum við okkur að borða og tóku menn og börn til við að byggja bálköst í fjörunni því nóg var um marga metra langa rekaviðsdrumba allt í kringum okkar. Logaði í bálinu allan tímann sem við dvöldum í firðinum. Ég nenni nú ekki að segja alla ferðasöguna hér, en það var veitt, drukkið hvítvín, elduð nautalund, leikið í fjörunni og ýmislegt annað þessa tvo daga áður en báturinn sótti fólkið en þá brast á með þvílkri blíðu og var siglt í Ólafsfjörðinn þar sem svaðilfararnir skelltu sér í sund með tilheyrandi stunum og andvörpum, enda fólkið ekki farið í sturtu né þvegið sér að ráði í tvo daga, eftir að hafa lent í hinum ýmsu veðrum og vaknað sveitt í svefnpokum.
Nú er maður mættur til vinnu á ný, í bili að minnsta kosti. Ætlunin er svo að taka örlítið frí í september og skella sér eitthvað út í heim í nokkra daga, bara við tvö, Berlín eða Amsterdam koma sterklega til greina en þó er ekkert ákveðið.

Á sunnudaginn var haldið ógurleg veisla fyrir Prinsessuna á heimilinu sem varð 9 ára í gær. Mikið af góðu fólki mætti og gæddi sér á góðum veitingum og færði henni pakka í tilefni dagsins og það var þreytt en ægilega ánægð stelpa sem fór í háttinn þann daginn. Í gær var henni svo boðið í ferðalag með ömmu og afa og ætla þau að vera í tvo daga í burtu svo hún kemur líklega á morgun. Afskaplega skrýtið að hafa hana ekki heima. Folinn flýgur síðan á Egilsstaði á föstudagskvöld þar sem hann gistir og mun síðan freista þessa að skjóta eitt stykki hreindýr á laugardaginn áður enn hann flýgur aftur heim. Ég hef hlakkað til að fá þessa sömu steik á diskinn minn í allt sumar svo það verður tvöföld ánægja fyrir mig á laugardagskvöld þar sem Folinn kemur heim með tarf :)

Nú fer að líða að því að Unglingurinn heldur á vit ævintýranna og fer norður í land þar sem hann verður námsmaður næsta vetur ef vel gengur. Hann tók ákvörðun um að sleppa MS og fara í menntaskólann að Laugum sem ætti að verða mikið ævintýri fyrir drenginn og vonandi þroskandi og fræðandi á sama tíma. Hann er að minnsta kosti orðinn spenntur að fara. ;)

Búið í bili,
Sprettur

Sumarfríið framundan

2006-07-12T15:46:00.000Z

Nú er fríið framundan og eins gott að sólin láti sjá sig fljótlega ef maður á ekki að þurfa að flýja land. Tók fína æfingu í gær og leið mun betur að henni lokinni þar sem nokkrir dagar eru síðan síðast var mætt sökum ferðalaga og annarra skylduverka. Fer í Spöngina aftur í dag og tek vel á því á ný. Ætla að sofa a.m.k. til níu í fyrramálið og fara þá í Laugar og taka laaaanga og góða æfingu og skella mér síðan aðeins í Baðstofuna. Aldrei að vita nema maður leggist í leti og láti sólina baka sig örlítið, þ.e. ef henni dettur í hug að láta sjá sig. Ætla síðan að vera dugleg í ræktinni allt fríið og mæta 5-6x í viku eins og alltaf. Mun þó taka hressilegar göngur þess á milli svona þegar við skreppum úr borginni.

Er nú ekki fokið í flest þegar Íslendingar eru orðnir svo amerískir í hjarta sínu að farið er að bjóða uppá klappstýrunámskeið fyrir krakka (stelpur) á aldrinum 12-16 ára. Til hvers í ósköpunum á að kenna íslenskum stúlkum slíkt. Er það til að litlar stelpur geti nú klætt sig í pínupils og magaboli og hrist sig og skakað á næsta íþróttaviðburði. Hætti nú alveg að snjóa segi ég nú bara. Látum kanann um klappstýruliðin og höldum okkur bara við alvöru íþróttir þar sem litlum stelpum er ekki kennt að klæða sig eins og miniglyðrur fyrir subbukalla að horfa á. Enda eins og fram kemur í “fréttinni” þá eru klappstýrulið tengd skólaliðum en þau er ekki að finna hér á Fróni.

Annars mun Zidane tjá sig eitthvað í franska sjónvarpinu í kvöld um atvikið milli hans og Materazzi á útslitaleik HM síðasta sunnudag. Veit það er hallærislegt, en ég er samt forvitin að vita hvort þetta er yfirleitt eitthvað merkilegt, eða hvort Materazzi sagði kannski bara við Zidane að hann væri sveittur og sköllóttur, sem hann náttúrulega var á þessum tímapunkti

Er annars að spá í að kíkja í bíó í kvöld með Prinsessuna og Unglinginn. Ætli við förum ekki á menningarverkið mikla “Superman returns”, svona ef ekki verður fullt út úr húsi, því ekkert þykir mér leiðinlegra en að fara í bíó þar sem meginþorri bíógesta eru illa uppalin og gargandi leiðinleg ungmenni sem hvorki kunna að sitja kyrr né hafa halda kjafti meðan þau eru í bíó.

Adios
Sprettur menningarviti farin í sumarfrí

Ritstíflan ógurlega.....

2006-07-11T14:44:00.000Z

Alvarleg ritstífla hefur herjað á Sprett undanfarið og því engar færslur verið settar á þessa annars ægilega skemmtilegu síðu mína.

Æfingar hafa verið fyrir ofan garð og neðan þessa síðustu viku sökum ferðalags Sprettsins og fjölskyldu hans um helgina. Hjólhýsið góða var fyllt af gómsætum landbúnaðarafurðum og öðru góðgæti og var svo lagt af stað austur fyrir fjall, ásamt vinahjónum okkar, þar sem stefnan var tekin á Flúðir. Er þangað var komið var svo smekkfullt að við nenntum nú ekki að troða okkur á milli tjaldvagna þar svo áfram var haldið og tækjum og tólum síðan plantaði í Þjórsárdal. Folinn töfraði þar fram ógurlega hamborgara sem ferðalangar gleyptu í sig með góðri lyst. Börnin sögðust ætla að skreppa í könnunarleiðangur og voru þau þar með horfin og sáust ekki fyrr en rétt eftir miðnættið, alsæl og örþreytt. Eftir morgunmat á laugardeginum var farið í langa göngu og síðan haldið í Þjórsárlaug þar sem hópurinn baðaði sig, bæði í laug og sól. Dýrindiskvöldverður og svo spilað frameftir. Sunnudagurinn var letidagur mikill þar sem við snæddum brunch úti við og sátum svo bara í blíðunni og höfðum það gott fram eftir degi. Komum heim rétt tímanlega til að horfa á leikinn sem fór þó ekki eins og heimilisfólkið hefði kosið, utan Unglingsins sem var ógurlega ánægður með sigur Ítala og dansaði um með bjánabros á vör. Við létum það ekkert á okkur fá þar sem við vissum, og vitum, ósköp vel að þessir dvergvöxnu monthanar áttu sko ekkert skilið að vinna. Zidane hefði átt stilla þeim upp í einfalda röð og taka svo bringuskalla á hvern og einn. Þeir hefðu þá líklegast úað og óað og þurft að fara af velli fyrir aumingjaskap og uppgerðarmeiðsl. Annars er ég ekkert bitur yfir þessum úrslitum sko.

Nú er Folinn farinn í veiðitúr norður í land ásamt nokkrum félögum og fóru þeir með hjólhýsið í eftirdragi seint í gærkveldi. Í lok vikunnar munum við Prinsessan svo leggja land undir fót ásamt fleirum þar sem við hittum Folann og annan úr hópnum á Ólafsfirði og á að ganga í Héðinsfjörðinn um helgina þar sem ætlunin er að tjalda og veiða jafnvel nokkra silunga ef einhverjir eru. Eftir helgina stefnir hópurinn á Ingjaldssand á Vestfjörðum þar sem við ætlum að vera í ca. 2 daga áður en heim verður haldið. Aldrei að vita samt nema við höldum eitthvað áfram ef veður verður gott.

Svo við höldum nú áfram með kynþokkann.....
Orlando Bloom er næstur hjá okkur í þessum Kynþokkaáfanga. Orlando varð heimsfrægur þegar hann lék eitt af aðalhlutverkunum í Lord of the Rings, ásamt Viggo Mortensen og Elijah Wood, sem slógu í gegn um allan heim. Þessi breski leikari hefur síðan leikið í fjölda mynda og ber þar helst að nefna, Kingdom of heaven, Pirates of the Caribean, Troy, aukahlutverk í Black Hawk Down og fleirum. Hann hefur lengi verið orðaður við leikkonuna Kate Bosworth en samband þeirra virðist vera svolítið "on & off", sem er kannski eins gott fyrir hinar stelpurnar . Árið 2002 var hann valinn einn af 25 heitustu stjörnunum undir 25 ára. Einn af heitustu piparsveinum People Magazine árið 2004, og kynþokkafyllsti karlmaðurinn af Empire Magazine 2004. Hann elskar spínat og tala frönsku reiprennandi.

Orlando Bloom:
Dökkur og seiðandi sem augu sem sokkið geta heilu konuförmunum. Fallegt bros sem bræðir hörðustu jaxla og strákur sem allar mömmur vilja að dóttir þeirra komi heim með. Sem sagt, góður strákur en samt kynæsandi. Sjaldgæf blanda en vel heppnuð í þessu eintaki.

Hérna....http://www.imdb.com/gallery/ss/0320661/Ss/0320661/KOH-138R.jpg?path=pgallery&path_key=Bloom,%20Orlando
og hérna....http://images-eu.amazon.com/images/P/383271510X.03.LZZZZZZZ.jpg
og hérna....http://www.itweb.co.za/sections/pictures/pirates_2.jpg

Over & out
Sprettur

Fótboltinn og kynþokkinn....enn og aftur

2006-07-05T14:16:00.000Z

Það er bara eitthvað allsherjar djók í gangi ef Portúgalarnir vinna Frakkana í kvöld. Hefði helst viljað sjá Frakkland-Þýskaland í úrslitunum en það næstbesta er svosem Frakkland-Ítalía, EN Ítalía-Portúgal er bara ekki til í dæminu. Ætli það verði eitthvað hægt að spila fótbolta ef svo fer, þeir verða sjálfsagt dettandi og grenjandi til skiptis, dramatíkin og leikarskapurinn er svo gífurlegur hjá þessum tveimur liðum að það er bara ekki einu sinni fyndið. Verð samt að segja að Ítalir stóðu sig vel í leiknum í gær og áttu svosem alveg eins skilið að vinna leikinn. Cannavaro alveg ótrúlega sterkur í vörninni hjá Ítölum en vörn Þjóðverja ekki eins sterk, að minnsta kosti í fyrri hálfleik.

Og úr því við erum í boltanum þá er kannski best að ég setji inn einn flottan sem kemur úr röðum Þjóðverja.....já já ég veit, ekki mjög sannfærandi að halda því fram að Þjóðverji eigi heima á þessu annars ægilega kynþokklista sem er kannski alveg rétt en dæmi hver fyrir sig

Michael Ballack hefur verið í atvinnumennsku í fjölda ára, hann spilaði með Bayer Leverkusen frá 1999-2002 en fór þá yfir til Bayern Munich þar sem hann hefur verið þar til hann var seldur til Chelsea á þessu ári. Hann spilaði sinn fyrsta landsleik í apríl 1999 gegn Skotlandi þar sem hann kom inná fyrir Hamann. Ballack er fyrirliði þýska landsliðsins. Þetta þýska kyntröll er ógift en á þrjú börn á aldrinum 1-5 ára með sambýliskonu sinni.

Michael Ballack:
Ótrúlega kynþokkafullur á vellinum og sem og utan hans. Í hrikalegu formi eins og flestir atvinnumenn í íþróttum. Ekkert endilega svo myndarlegur en það er ekki alltaf atriði þegar kemur að kynþokka eins og flestar konur með fulla dómgreind vita.

Hérna eru dæmi...http://www.raisport.rai.it/pub/static/87000/20051119BLBayernBallack.jpg

og hérna...http://mysite.wanadoo-members.co.uk/amrob5/images/sport/michael_ballack_008.jpg

Og ekki mega Ítalir vera útundan af því þeir unnu nú leikinn í gær svo við sláum bara tvær flugur í einu höggi..

Fabio Cannavaro er næstur í röðinni og er óhætt að segja að þessi fótboltakappi setji sitt mark á kynþokka hópsins. Þessi ítalski foli er nú ekki hár í loftinu frekar en þeir flestir en hverjum er ekki sama. Hann hefur spilað fyrir Napolí, Parma, Inter Milan og nú síðast með Juventus, hann er einnig fyrirliði ítalska landsliðsins. Hann er giftur og á þrjú börn, Christian, Martina og Andrea.

Fabio Cannavaro:
Flottur og kynæsandi eins og margir landar hans, suðrænn hiti gjörsamlega á hæsta stigi. Ótrúlega góðu líkamlegu formi og erfitt fyrir flestar konur að halda fullri einbeitningu þegar þær sjá hann, því maðurinn er ubersexy og ógurlega fallegur að auki.

Hérna....http://oblogdozpl.blogs.sapo.pt/arquivo/Cannavaro.JPG

og hérna....http://www.operaprima.art.br/images/cannavaro.jpg

og hérna....http://www.juventuz.com/images/players/cannavaro.jpg

Ég veit það hallar aðeins á Ballack í samanburðinum en heitur er hann nú samt á vellinum

Sprettur

HM, Matthew og fleira

2006-06-28T14:15:00.000Z

Jæja þá er að síga á seinni hluta HM þetta árið. Frakkar tóku Spánverja í gær 3-1 og gerðu það vel. Svona overall þá hefðu Spánverjar kannski frekar átt skilið að komast í 8 liða úrslit, en það er víst leikurinn “í dag” sem gildir en ekki heildarframmistaða. Leikurinn í gær var með betri leikjum sem ég hef séð, hraður og skemmtilegur. Reyndar fannst mér leikur Svía og Paraguay líka skemmtilegur en nú er að sjá hverjir detta fyrst út í 8 liða úrslitunum. Úkraína verður með þeim fyrri út úr keppni, Portúgalar fara líka fljótt. Spái Þjóðverjum langt og Argentínumönnum einnig. Nú er komið nóg af bolta, sérstaklega hjá konu sem er ekkert endilega mikið í boltanum svona almennt séð :/

Yfir í annan bolta, Unglingurinn slasaði sig í gærkveldi í fótboltaleik þar sem hann fékk ógurlegt högg á viðkvæman stað. Kom heim um miðnættið þessi elska og felldi nokkur tár af sársauka, eða kannski aðallega fyrir mömmu sína bara svona til að hún sæji að þetta væri bara helvíti vont. Jafnaði sig nú fljótt og fór í bælið. Mætti til vinnu í morgun en fór heim rétt fyrir hádegið með sáran verk á sama stað svo maður rúllaði heim á Þjóðverjanum og fór með strákinn í læknisskoðun. Ekki var hann mjög spenntur fyrir þeirri reynslu enda kannski eilítið feimnismál að láta einhvern bláókunnugan þukla mann á þessum stað. Maður er svo sensitívur að ég bað um karlkyns lækni fyrir drenginn svo hann myndi nú ekki missa meðvitund af feimni, en allt fór vel og drengurinn er ekki ónýtur með öllu, jafnar sig á næstu dögum sagði og getur gefið foreldrum sínum heilan haug af óþægum barnabörnum þegar fram líða stundir.

Yfir í allt annað og alvarlegra mál. Enn eru nokkrir eftir á sex apíl listanum og næstur er.......

.....Matthew McConaughey sem allar konur ættu að þekkja og jafnvel einhverjir karlmenn líka. Matthew er suðurríkjamaður eins og þeir gerast bestir. Hann byrjaði ferilinn árið 1991 en fyrsta myndin sem við könnumst hvað best við er sjálfsagt myndin “A time to kill” þar sem hann lék á móti Sandra Bullock sem hann seinni átti síðan í ástarsambandi við. Hann hefur leikið í fjölda mynda síðan og má þá nefna t.d. Amistad, Contact, The Wedding planner, Reign of fire, How to lose a guy in 10 days og fleirum. Sú nýjasta í bíóhúsum borgarinnar er “Failure to launch”, sem er btw ægilega fyndin og skemmtileg. Hann var einnig sá fyrsti sem kom til greina í aðalhlutverkið í Titanic sem Leonardo de Caprio hreppti síðan. Hann er af írskum uppruna og á einn bróðir.

Matthew McConaughey
Ótrúlega kynþokkafullur í alla staði, heldur sér greinilega í formi og er með óheyrilega flottan kropp, falleg augu og bros sem bræðir heilbrigðar konur niður í rúm á tveimur sléttum. Sjálfsagt sá eini sem tekist hefur að gera suðurríkjahreiminn einstaklega kynþokkafullann.

Hérna....
http://www.insomniacmania.com/news/news_1243_1.jpg
og hérna...http://www.imdb.com/gallery/ss/0427229/Ss/0427229/008_FTL-C1075-24A.jpg?path=gallery&path_key=0427229
og hérna..http://www.nationalreview.com/images/mm.jpg

Þar til næst....
Sprettur

Sitt lítið af hverju

2006-06-27T08:54:00.000Z

Það sem maður hefur verið latur í blogginu undanfarið, maður ætti eiginlega að skammast sín. En ég kann ekki að skammast mín svo þar við situr .

Hef verið brjálæðislega dugleg að æfa undanfarna daga, en líkami minn hefur líka háð margan eiturefnabardagann síðustu daga þar sem eigandi hans hefur innbyrgt ýmisskonar efni sem ekki á uppruna sinn að rekja til hollustu né heilsufæðis af neinum toga. Þetta hefur verið í formi sælgætis í meira magni en vaninn er, hamborgari af Búllunni sem alveg hefði mátt missa sín og svo grillaði Folinn humar í miklu magni, sem er í sjálfu sér mikið gæðafæði svona út af fyrir sig en humrar þessir er um ræðir létust allir á skelfilegan hátt þegar þeim var drekkt í miklu magni að hvítlaukssmjöri. Eins gott að maður var duglegur að heimsækja Klassann segi ég nú bara.

Við Prinsessan fórum saman í bæinn í gær þar sem þjóðverjanum var plantað í stæði og hundraðköllunum dælt í græjuna sem þar stóð vörð, þar sem við ætluðum að rölta um miðborgina, fara á kaffihús og skoða mannlífið. Hlýtt var og hið besta veður fyrir utan smá úða annað slagið, sem þó kom ekki að sök þar sem við vorum vel græjaðar mæðgurnar með hvor sína regnhlífina. Við röltum inn á Café París og ætluðum að fá okkur hádegisverð þar en sú stutta sá ekki ristað brauð með marmelaði, osti og grænmeti svo hún heimtaði að við stæðum upp og færum á Kaffibrennsluna þar sem hún mundi eftir að hafa fengið slík flottheit. Móðirin lét það eftir henni, en hún ekki kölluð Prinsessa fyrir ekki neitt, svo við röltum yfir götuna og plöntuðum okkur á Brennslunni þar sem við sátum og spjölluðum um lífið og tilveruna meðan við gæddum okkur á góðum mat, hún alsæl með sitt ristaða brauð og tilheyrandi diskaskreytingu. Fórum í Nonnabúð og keyptum bol handa Folanum, ætlum að gera okkur aðra ferð þangað fljótlega og kaupa kannski handa Útlendingnum, svona áður en búðin lokar eftir sumarið. Kíktum á Te & Kaffi þar sem við fengum kökur sem ekki voru neitt sérstaklega góðar svo þangað förum við ekki aftur :/

Unglingurinn er nú harðákveðinn í því að fara í Framhaldsskólann að Laugum. Skólinn er settur 29. ágúst svo drengurinn fer eftir tvo mánuði og verður að minnsta kosti fram að jólum, svo ætlar hann að sjá til hvort hann klárar veturinn þar eða kemur í bæinn. Þetta verður örugglega gaman og mikið ævintýri að fara í heimavistarskóla. Ég hefði nú gefið mikið fyrir að fara á sínum tíma, þvílíkt spennandi.
Við Folinn áttum brúðkaupsafmæli í gær og færðum hvort öðru gjafir í tilefni dagsins. Ég hafði keypt handa honum POLICE úr, alveg ógurlega flott og gæjalegt og þessi elska gaf mér tösku sem ég var búin að væla lengi um að mig langaði í en tímdi aldrei að kaupa mér. Nú er ég mesta og flottasta pæjan í bænum, svo ekki verður um villst Ætluðum svo út að borða en vorum bara ekki í neinu stuði fyrir slíkt svo við ákváðum bara að henda okkur í heimagallann, vera með krökkunum, horfa á leikinn og fara eitthvað huggulegt um helgina.

En ekki get ég nú verið þekkt fyrir að svíkja ykkur um dreng dagsins.....

Robbie Williams er það sem flestum konum kemur saman um að sé með þeim heitari í þeim bransanum. Robbie byrjaði ferilinn með strákabandinu Take That fyrir þónokkuð mörgum árum síðan. Ekki hafði almenningur mikla trú á að hann næði vinsældum án bandsins en annað hefur aldeilis komið í ljós og er Robbie nú einn af vinsælustu tónlistarmönnum í heimi. Robbie hefur verið bendlaður við margar konur og þar á meðal Geri Halliwell sem þekktust er kannski undir nafni Ginger Spice, Nicole Appleton úr All Saints, Rachel Hunter fyrrv. konu Rod Stewart og fleiri. Eitt laga hans var valið 4 besta lag allra tíma, lagið Angels.

Robbie Williams:
Úúúúsar hreinlega af honum kynþokkinn svo konur kikna í hnjánum við það eitt að heyra hann syngja, skakkt brosið og stríðnissvipurinn eru klárlega að gera sig og það hroka"attitude" sem einkennir hann er stór hluti af kynþokkanum. Líkamlega séð hefur hann verið upp og niður í bókstaflegri, þó aldrei langt upp, en einhvernveginn hefur það ekki haft áhrif á þann gífurlega kynþokka sem einkennir þennan breska poppara.

Hérna....http://images-eu.amazon.com/images/P/B0002UYA68.02.LZZZZZZZ.jpg
og hérna....http://www.musikbase.de/foto.php?id=787&pix=6
og hérna...http://www.geocities.com/robster_williams/calender6site.jpg

Sprettur hottie

Sumarfrí.....og kynþokkinn (again)

2006-06-21T13:35:00.000Z

Tók ógurlega æfingu í Spönginni, bæði í gær og fyrradag. Hnéð var eitthvað að bögga mig á mánudaginn en ég hljóp það bara af mér :/…..þurfti reyndar að gjalda fyrir dómgreindarskortinn með ógurlegum verkjum og vanlíðan það sem eftir lifði dags/kvölds, en svona nagli eins og ég harkar það bara af sér.

Svíar gerðu jafntefli við Englendinga í gær sem Spretturinn var ægilega sáttur við þar sem hann vill sína menn áfram, hefði verið til í að sjá svíana bora einu marki í viðbót á tjallana en maður getur ekki fengið allt í einu. Svíar leika því á móti Þjóðverjum á laugardaginn og ætti það að verða hörkuspennandi og skemmtilegur leikur.

Nú er mín alveg að detta inn í sumarfrí svona hvað á hverju. Verð í fríi á föstudegi og mánudegi næstu tvær helgar svo vinnuvikurnar tvær verða stuttar. Eftir það tek ég samfellt frí í 4 vikur og verður þá eitthvað slitrótt bloggið get ég ímyndað mér, þar sem ég verð ógurlega upptekin við að sötra sumardrykki og sóla mig á pallinum mínum. Búin að panta mér fót- og handsnyrtingu, súkkulaðinudd og andlitsbað sem ég ætla að njóta að lokinni æfingu í Laugum í næstu viku……mmmmm…..life is good.

Ég mun nú samt skemmta ykkur með reglulegum færslum og skemmtiefni hér á síðunni svona eitthvað lengur að minnsta kosti, áður en fríið dettur inn. Gönguferð í Héðinsfjörð er búið að skipuleggja um miðjan júlí með vinafólki og afleggjurum okkar og þeirra. Þar ætlum við að veiða og leika okkur í tvo daga og fara svo tilbaka með bát sem ætti að vera gaman, sérstaklega fyrir börnin. Planið er að láta bát fara með útbúnaðinn og matvæli yfir svo við losnum við að bera allt draslið. Að sjálfsögðu verður rjúpnabaninn með í för og einnig gamall veiðihundur sem er orðin svo þreyttur og latur að hann verður sendur yfir með búnaðinum, þ.e. í bát J. Hlakka mikið til að heimsækja mína heimabyggð Siglufjörð og ganga yfir. Við Folinn munum líklega stoppa eitthvað lengur og njóta nærveru skemmtilegra ættingja, því ENGIN á jafnskemmtilega ættingja og ég, sem er svosem ekkert skrýtið þar sem ég er enda ógurlega skemmtileg sjálf.

Anyways, hér kemur 5. tími í kynþokkafræðum.

Nú verður tekinn fyrir hinn ubersexy Johnny Depp sem allar konur sem hneigjast yfirhöfuð í þá átt ættu að þekkja. Hann kom síðast fram í kvikmyndinni Charlie and the chocolate factory, en hefur leikið í fjölda mynda og má þar nefna Donnie Brasco, Nick of time, Neverland, stórverkinu Platoon, Blow, Don Juan DeMarco og fleiri. Þekktastur er hann fyrir að fara sínar eigin leiðir og velur sér oft hlutverk sem ekki eru mjög "Hollywoodleg". Hann hefur verið orðaður við margar frægar konur t.a.m. Winona Ryder og Kate Moss. Í dag er hann giftur frönsku leik- og söngkonunni Vanessa Paradis og á með henni tvö börn. Fyrsta myndin sem kappinn lék í var Nightmare on Elm Street árið 1984 og nokkrum árum síðar lék hann eitt aðalhlutverkið í þáttunum 21 jump street. Stærsta mynd kappans er án efa Pirates of the Caribean sem kom út árið 2003 og nú er framhald væntanlegt í kvikmyndahús síðar á þessu ári.

Johnny Depp:
Guðdómlega fallegur karlmaður og ógurlega kynæsandi. Tælandi og kynþokkafull rödd sem bræðir meðalkonu á mettíma og drekkir henni í djúpum og seiðandi brúnum augum. Sítt hár, stutt hár, ljóst hár, dökkt hár, gleraugu, klæddur eins og asni eða hvað sem er, kemst upp með allt og er ávallt sexy og seiðandi.

Hérna...http://www.imdb.com/gallery/ss/0285823/Ss/0285823/MX-26A.jpg?path=gallery&path_key=0285823
og hérna....http://www.ohjohnny.net/djd/MrFebruary.html

Sprettur kynþokkafræðingur

Gærbloggið

2006-06-20T09:12:00.000Z

Helgin var fljót að líða eins og alltaf. Fórum í afmæli til múttu sem hélt ægilegt grillpartý. Unglingurinn fékk að fara í bæinn á 17. júní og átti að taka leigubíl heim kl. eitt sem mér fannst nú samt nokkuð seint. 01:45 hringdi ég frekar pirruð í hann og hvæsti á hann að hunskast heim. Korteri seinna hringdi vinurinn og var þá ekki lagður af stað svo mamman hvæsti aftur. Enn leið korter og þá hringdi vinurinn enn á ný og sagðist vera á heimleið með félaga sínum í leigubíl. Hann hafði bara átt 1000 kall eftir sem var víst ekki nóg í leigubílakostnað. Þvílík afsökun, maður var nefnilega búin að segja honum að bíllinn yrði borgaður þegar hann kæmi heim, ef uppá vantaði. Svo við Folinn fórum að sofa 02:30 þegar Unglingurinn loks drattaðist inn um dyrnar. Honum til lífs má segja að á þessum tímapunkti var maður orðinn frekar syfjaður svo ekki varð mikið um skammir. Hann má þakka fyrir að hafa haldið öllum útlimum ósködduðum .

Að allt öðrum og ólíkt skemmtilegri málum, eða kynþokkanum. Þið kannski eruð orðin leið á þessari umfjöllun minni um málefnið en hvað um það, here goes:

Tími 4
Næstur á listanum er hinn óviðjafnanlegi Mark Walhberg. Mark hefur leikið í fjölda kvikmynda og má þar nefna, The Italian Job, Rock Star, Boogie nights, Four Brothers og fleiri góðum. Á yngri árum þótti Mark frekar óstýrilátur og lenti oft upp á kant við lögin og sat á tímabili í fangelsi. Hann byrjaði feril sinn með strákabandinu "New kids on the block" og síðar varð hann þekktur sem undirfatamódel fyrir Calvin Klein. Í dag fetar Mark beinu brautina og eins og fram kemur á meðfylgjandi sýnishornum er hann klárlega með þeim flottari.

Mark Walhberg:
Óheyrilega kynþokkafullur og girnilegur karlmaður. Með einstaklega seiðandi bros sem fær meðalkonu til að kikna í hnjánum og hlaupast á brott frá feitri bjórdrekkandi HMbullu og í faðm þessarar kynæsandi karlmennsku.

Hérna.....http://website.lineone.net/~contact.phil2/marky4.jpg
og hérna...http://www.queervisions.com/img/wahlberg.jpg

Sprettur hottie

Fótbolti og kynþokki

2006-06-16T16:00:00.000Z

Tók heldur betur á því í gær. Prinsessan fór í heimsókn til frændsystkina sinna og skellti ég mér í Laugar á meðan. Lyfti í klukkutíma og ætlaði að taka korter á brettinu á eftir. Þá var klukkan orðin hálfsjö og ég sá að leikur Svía og Paraguay átti að byrja kl. sjö svo ég ákvað að vera örlítið lengur og sjá byrjunina á leiknum. Skemmst frá því að segja að leikurinn heltók Sprettinn sem endaði á því að stökkva af brettinu rétt fyrir kl. átta, í hálfleik, hentist heim og náði seinni hálfleik að mestu leyti. Mikil gleði þegar Ljungberg skallaði boltann í net andstæðinganna þegar tæpar þrjár mínútur voru eftir af leiknum. Snilld á hæsta .

Snúum okkur þá að kynþokka karlmanna í þriðja skiptið. Markaskorari þeirra Svía er einn af þeim sem alveg er hægt að dunda sér við að horfa á.

Tími 3.
Freddie Ljungberg er án efa einn sá heitasti í boltanum í dag. Hann er einn af eftirsóttustu piparsveinum Bretlands og sjálfsagt þótt víðar væri leitað. Freddie er miðherji hjá stórliðinu Arsenal í ensku deildinni og er nú nýjasta undirfatamódel tískurisans Calvin Klein. Freddie hefur spilað fótbolta alla tíð og var valinn fótboltamaður ársins í ensku deildinni árið 2002 og hefur skorað yfir 40 mörk fyrir liðið. Hann var aðeins 16 ára gamall þegar hann gerðist atvinnumaður í fótbolta.

Freddie Ljungberg:
Flestir í boltanum geta nú státað af flottum kroppi en Freddie er þó þar fremstur meðal jafningja. Ógurlega tælandi augnsvipur og einstaklega þrýstnar og kynæsandi varir sem fær flestar konur til að svíkja málstaðinn og halda með Arsenal.

Hérna....
http://www.mostbeautifulman.com/athletes/freddieljungberg/pages/pic01.shtml

og hérna....
http://netmode.vietnamnet.vn/dataimages/original/images530921_footballers-dop4a.jpg

og hérna....
http://freddieljungbergweb.tripod.com/id4.html

Sprettur sexxy

Afmæli og kynþokki 2

2006-06-15T13:32:00.000Z

Tengdapabbi átti afmæli í gær og bauð stórfjölskyldunni til veislu þar sem boðið var uppá íslenska kjötsúpu og gulrótarköku í eftirrétt. Súpan rann ljúflega niður og maður skellti í sig einni kökusneið á eftir, með rjóma líka skal ég nú barasta segja ykkur. Ég var í mestu vandræðum að kaupa eitthvað handa karli en endaði nú bara í Dressman og keypti léttan sumarjakka handa honum, sem hann var líka ægilega ánægður með og pósaði í bak og fyrir fjölskylduna, sagðist fíla sig eins og gæjarnir í auglýsingunni, enda væru þeir líka svona þroskaðir eldri menn eins og hann sjálfur.

Æfingin fór fyrir bý þar sem þurfti að versla gjöfina og þegar heim var komið var klukkan orðin hálfsex og mæting í boðið var stundvíslega hálfsjö. Maður hefði svosem alveg getað sett í fluggírinn og tekið 20-30 mínútna cardio en ég ákvað að sleppa því bara og taka frídaginn minn í gær. Fer svo tvíefld í Spöngina í dag og heltek á því.

Jæja, aftur að fáfræði þeirra kvenna í efra,
Kynþokki 101
Tími 2.

Um er að ræða einn af þeim heitari í bransanum í dag. Colin Farrell hefur leikið í myndum á borð við Phonebooth, The Recruit og nýjasta mynd hans lítur dagsins ljós síðla sumars en það er myndin Miami Vice, sem er gerð eftir samnefndum þáttum sem nutu mikilla vinsælda á níunda áratugnum en þá léku Don Johnson og Philip Michael Thomas hlutverk töffarana. Það er Jamie Foxx sem leikur á móti Farrell í kvikmyndinni.
Colin Farrell:
Kynþokkinn hreinlega lekur af kvikindinu. Einstaklega falleg augu, vel skapaður á skrokkinn og írskur uppruni hans afskaplega vel falinn undir kynþokkanum. Hér má finna dæmi þess sem um ræðir.

Hérna....
http://www.imdb.com/gallery/hh/0656179/HH/065617/tigerland1.jpg?path=pgallery&path_key=Farrell,%20Colin%20(I)

og hérna...http://colin-farrell.czechpark.com/wallpapers-colin-farrell/Collin-Farrell-33.jpg

og hérna....http://www.fragile-dreams.com/images/actors/Colin%20Farrell%201024.jpg

Yfir og út í bili
Sprettur - Forstöðumaður kynþokkasviðs

Kynþokki og fáfræði

2006-06-14T15:59:00.000Z

Tók 90 mínútna æfingu í Spönginni í gær, bæði lyftingar og cardio. Er heim var komið hafði Folinn sett kjúkling í ofninn þannig að maður bætti bara góðu meðlæti við og þá var kominn þessi fíni dinner sem Folinn, Unglingurinn og Sprettur sjálf skófluðu í sig yfir leik Brasilíumanna og Króata, en Brasilíumenn unnu að sjálfsögðu leikinn eins og maður bjóst við, 1-0 fyrir mínum mönnum. Einhversstaðar er enn verið að selja miða á HM fyrir þá sem hafa áhuga á að skella sér til Þýskalands, nýjasta verðið á miða á úrslitaleikinn er rétt um 100þúsund kallinn á svörtum markaði.

Með mér vinnur eðalfólk sem yfirleitt veit ýmislegt um ýmsa hluti. Þó verð ég að lýsa hneykslan minni á tveimur túttum sem boruðu bara í nefið og ypptu öxlum þegar talið barst að kvikmyndum og leikurum, þar sem minnst var á kyntröllið Hugh Jackman. Stöllur þessar vissu hvorki haus né sporð á þeim eðalmanni sem varð til þess að námskeiðið Kynþokki 101 var sett í gang með hraði. Ég sjálf fer þar fremst í flokki jafningja við sköpun á námsefninu. Auðvitað væri þetta afskaplega auðvelt ef ég mætti nú bara setja einn glóðvolgann inn í miðja bók og láta gott heita því þá væri valið auðvelt, enda Folinn sá flottasti sem völ er á.
Það er ábyrgðarhlutverk að upplýsa fáfróðan lýðinn um mikilvægi kynþokkans og tek ég hlutverk mitt alvarlega. Ljóskurnar tvær í efra, eins og þær eru oft kallaðar, verða því vonandi einhverju nær þegar námskeiðinu lýkur. Starffélagi minn sem við skulum bara kalla Ms. Sexxy, mun verða mér til halds og trausts og saman munum við leysa úr öllum deilumálum af okkar alkunnu smekkvísi og sanngirni. Ég hef ákveðið að setja inn námsefni dagsins, daglega næstu daga, þar sem ykkur gefst kostur á að kynna ykkur viðfangsefnið ítarlega.

Tími 1.
Ástralinn Hugh Jackman er frægastur fyrir leik sinn í X-men myndunum. Hann kynntist konu sinni þegar þau léku saman í sjónvarpsþáttunum Corelli á ABC árið 1995. Fimm ár í röð var hann valinn einn af 50 fallegustu í heimi í People Magazine (2000-2004). Hann hefur leikið í fjölda mynda og sjónvarpsþátta, auk þess að leika á sviði. Má þar nefna t.d. X-men eins og áður sagði, Swordfish, Van Helsing ofl. Hann talar þýsku reiprennandi.

Hugh Jackman:
Ógurlega kynþokkafullur og fallegur maður í alla staði, einstaklega fallegt bros. Hér má finna nokkur dæmi um kynþokka hans og karlmennsku.

Hérna...
http://www.avrev.com/gifs/swordfish/halle_berry.gif

og hérna...
http://www.123people.net/j/jackman-hugh/jackman-hugh7.jpg

og hérna.....
http://images.google.is/images?hl=is&q=hugh%20jackman&lr=&sa=N&tab=wi

Þetta getið þið yljað ykkur við í votviðrinu.
Sprettur
Forstöðumaður Kynþokkasviðs

Wish you were here....lalala

2006-06-13T09:09:00.000Z

Wish you were here.......ég á varla orð til að lýsa tónleikum Roger Waters í gærkveldi, æðisgengnir og stóðu fullkomlega undir væntingum og vel það. Stóð og dillaði mér í sæluvímu frá kl. 20:15 – 23:15 þegar tími var kominn til að fara heim. Flottustu og án efa bestu tónleikar sem ég hef farið á og sem haldnir hafa verið hér á landi.

Helgin var nú annars nokkuð ágæt. Tók æfingu eftir vinnu á föstudaginn, nokkuð netta samt, cardio í 45 mínútur og rétt örlitlar magaæfingar. Við Folinn fórum svo í boð til Tönnslunnar á föstudagskvöldið þar sem við fengum ægilega flotta 3ja rétta máltíð og Valgeir Guðjónsson glamraði á gítar og fór með gamanmál. Mikið er maðurinn ægilega skemmtilegur og sjarmerandi, svo kom mér líka algjörlega í opna skjöldu hvað hann er fyndinn og hnyttinn. Ræð hann sem veislustjóra í næsta stórpartý sem haldið verður á mínum vegum J. Tönnslan var ægilega ánægð með hringinn og ekki skemmdi fyrir að hún fékk hálsmen í sama stíl svo nú er hún Esjuð upp alveg hreint.

Á laugardagsmorgun fór Folinn í golfmót sem Systir bauð til f.h. Tæknivals. Við Prinsessan buðum Fimleikadrottningunni með okkur í Laugar þar sem stúlkurnar brugðu sér í sund meðan Spretturinn tók massaæfingu með hrikalegum lyftingum og þriggja kortera cardio á eftir. Var þónokkur fjöldi karlmanna að sprikla á brettunum, flestir að horfa á leik Englands og Paraguay í HM, sem eins og flestir vita fór 1-0, eins og búist hafði verið við. Systir, Oddurinn og fleiri mættu svo í grill á laugardagskvöldinu eftir að golfmótinu lauk, þar sem ljúffeng nautalund og lambafilé með tilheyrandi meðlæti var matreitt ofan í fjöldann.

Aftur var farið á æfingu á sunnudaginn, en þó ekki fyrr en um hádegi. Fór þá í Laugar þar sem ég pústaði og harkaði í rétt tæpa tvo tíma. Rólegheit einkenndu síðan það sem eftir lifði dags og kvölds.

Þetta er án efa alveg einstaklega óspennandi bloggfærsla hér að ofan en ég læt hana þó standa .

Í dag verður farið í Spöngina og lyft og brennt eins og Sprettinum einum er lagið. Enda þýðir ekkert að vera í einhverri spariþjálfun og hætta bara að mæta þegar fyrsti sólargeislinn lætur sjá sig að vori, eins og sumir gera. Uss, ég lagðist nánast í þunglyndi þegar ég þurfti að hætta æfingum í tvo mánuði vegna hnéaðgerðar fyrir 1 ½ ári síðan. Fannst ég öll svo lin og máttlaus og lasburða þar sem ég var vön að hreyfa mig mikið. Skil hreinlega ekki fólk sem gefur sér ekki tíma til að sinna sjálfu sér og heilsunni.

Lýk þessu á heilbrigðu nótunum í dag þar sem Animals diskur þeirra Pink Floyd manna hljómar í eyrum mínum og ég endurlifi sæluvímu gærkvöldsins.

Sprettur

Helgin framundan

2006-06-09T15:51:00.000Z

Skæður vírus gengur nú um bloggheima og ræðst á menn og tölvur af ógurlegu afli og eru einkennin helst í formi ægilegrar ritstíflu. Þetta veit ég því bæði í gær og dag hefur það tekið mig örfáar mínútur að renna yfir mína uppáhaldsbloggara sem er náttúrlega með öllu óhæft. Getur mögulega verið að líf okkar allra sé svo óspennandi að ekki sé frá neinu að segja? Ef svo er þá á ég nokkur ráð við því. Til dæmis er alltaf hægt að grípa til hinna vandmeðförnu verkfæra lyga og skáldskapar og búa til einhver skemmtilegheit.

Í gær fór ég til hans Olla klippara þar sem hann fór faglegum fingrum um makka minn og litaði hann og klippti eftir kúnstarinnar reglum. Nú er ég fögur sem aldrei fyrr og stunur og andvörp heyrast hvar sem ég fer, svo hugfangið er fólk af mér. En þessu er ég nú aldeilis vön svo ég læt það ekki á mig fá. Mest finn ég til með ljóta fólkinu samt sem er svolítið harkalega minnt á eigin ljótlega þegar það sér mig. Ég reyni því að forðast slíka sjónmengun því það er ekki hollt fyrir mig að upplifa of mikið af slíku.

Ég keypti afmælisgjöf fyrir Tönnsluna og varð esjuhringur eftir Hendrikku Waage fyrir valinu (www.hw.is), grænn að lit og ægifagur. Ég er næstum því bara klökk yfir hvað mér þykir hann er fallegur, en samt mest af eftirsjá því mig langar svo ógurlega mikið að eiga hann sjálf. Í kvöld munum við Folinn svo renna austur fyrir fjall þar sem Tönnslan býður til veislu í Rauða húsinu, downtown Eyrarbakki. Ég ætla að reyna að halda aðeins aftur af sjarmatröllinu sjáfri mér, svo ég skyggi ekki á Tönnsluna, því það er aldrei vel séð á slíkum samkundum. Ég reyni því að tóna útgeislun mína og sjarma niður um nokkur þrep.

Sprettur farin í helgarfríið

Ýmislegt að gerast

2006-06-08T09:34:00.000Z

Detti mér allar dauðar.......skv. mbl.is hefur verið lögð fram kæra hjá sýsla í Reykjavík vegna sveitastjórnarkosninganna um að tjöldin fyrir kjörklefunum hafi verið blá víðast hvar. Þar sem hann gekk í þungum þönkum að klefanum og sá þá hvar þessi stóru bláu tjöld blöstu við honum sá hann sig nauðugan til að kanna málið frekar og þeyttist því um borgina þvera og endilanga til að taka út tjöldin á kjörstöðum. Í ljós kom að þau voru blá á að minnsta kosti níu stöðum, hugsið ykkur, sem hann segir augljóslega geta haft áhrif á óákveðna kjósendur líkt og margt annað. Er maðurinn ekki heill í toppstykkinu eða hvað? Ég held þetta hljóti bara að vera einhver svekktur framsóknarmaður sem hefur lítið annað með tímann að gera en að finna falin kosningasvik og heilaþvott í formi blárra tjalda er hylja kjörklefa borgarinnar. Við ættum kannski að reyna að setja upp svona regnbogatjöld til að allir flokkarnir ættu nú jafna möguleika á að komast til valda. Ætli Gunnar í Krossinum taki að sér að af-flokka fólk sem hefur villst af leið og stefnir stjórnlaust til hægri, þar sem skipulagður heilaþvottur flokksins virkar greinilega ágætlega en sumir hafa kannski ekki verið nógu móttækilegir fyrir tjöldunum því Sjálfstæðismenn fengu aðeins 7 fulltrúa í borginni......djö :/ Sá sem kærir fékk þá skýringu að aldrei hafi á það reynt að ógilda kosningar sökum bláa litsins ná tjöldunum.

Mikið er nú annars gott að enn eru einhverjir menn sem eru nokkuð heilir í hausnum á þingi Bandaríkjamanna. Bush virðist vera haldinn áráttu varðandi hjónabönd samkynhneygðra og nýjasta útspilið var að reyna að fá stjórnarskránni breytt þar sem slíkt yrði bannað. Hverslags trúarofstækisland eru Bandaríkin að verða, ég bara spyr? Ég er sammála Ted Kennedy sem sagði að verið væri að reyna að setja fordóma og þröngsýni inn í stjórnarskrá landsins. Vonandi næst þetta ljóta og skammarlega frumvarp aldrei í gegn og kannski draga BNA menn hausinn út úr rassgatinu á sér fyrir næstu kosningar og kjósa einhver til valda sem ekki er með greindarvísitölu á við græna baun. Svo þusar þetta lið og skammast yfir trúarofstæki múslima.....sé ekki muninn. Fangelsi sem brjóta á mannréttindum og fólk er látið dúsa í til fleiri ára án þess að verða ákært fyrir nokkurn skapaðan hlut, samkynhneygðir eru annars flokks borgarar, konur fá ekki að ráða yfir eigin líkama og fara í fóstureyðingar, jafnvel þótt um nauðganir sé að ræða eða t.d. alvarlega fósturgalla, allar þjóðir sem ekki eru sammála BNA eru handbendi satans og því er hinn heilagi her BNA sendur til að bjarga fólkinu sem jafnvel kærir sig ekkert um að vera bjargað. Nema náttúrulega Saudi Arabía, þeir eiga svo mikla olíu og mikla peninga að þeir mega alveg kúga, berja, naugða og misþyrma konum og stúlkum eins og þeim einum er lagið. Hverjum er ekki sama um það, bara svo framarlega að hjónaband samkynhneygðra verði nú ekki að veruleika því það er siðferðislega rangt. Annars liggur við að maður segði bara að ef BNA menn eru svona vitlausir að kjósa þennan málhalta mann, ekki bara einu sinni heldur tvisvar, þá kannski eiga þeir hann kannski fullkomlega skilið.

Nú byrjar boltinn á morgun og margir sjálfsagt orðnir spenntir. Það fer afskaplega í taugarnar á mér þessar endalausu “stelpuhitt og stelpuþetta” í júní, þar sem keppst er um að finna sem mesta afþreyingu fyrir kvenkynið meðan á HM stendur. Hvaða þurs datt í hug að við konur þyrftum sérstaka aðstoð við slíkt og hvar stendur að karlar megi einir horfa á HM? Einhversstaðar heyrði ég líka sagt að við mættum færa þessum elskum bjórinn og samlokuna þegar þeir væru að horfa á mikilvægan leik, en undir engum kringumstæðum mættu konur setjast niður og reyna að horfa á fótboltann með manni sínum því þetta væri stund sem þeir vildu eiga út af fyrir sig eða með strákunum. Á mínu heimili getur maðurinn bara sótt sínar veitingar sjálfur og ég horfi bara á þá leiki sem mér þóknast. Ekki þarf að bjóða mér upp á fótsnyrtingu útí bæ eða eldgamla unglingaþætti á Skjá einum. Er það bara lífsins ómögulegt að konur geti mögulega haft áhuga á að horfa á fótbolta?

Áfram Brasilía!

Sprettur

Ennþá hérna.....

2006-06-07T08:41:00.000Z

Nú verð ég að taka mig á ef ég á ekki að deyja hægum og kvalafullum bloggdauða. Það er búið að vera svo afskaplega mikið að gera og lítið að segja svo einhvern veginn hefur þetta bara farið fyrir ofan garð og neðan, en nú skal tekið á því.

Náttfatapartý Prinsessunnar heppnaðist með ágætum og skríkjandi smástelpur voru í hverju horni þar til þar duttu út af hver á fætur annarri um og rétt eftir miðnættið á föstudaginn síðasta. Eftir það var helgin bara nokkuð róleg, kíktum í lunch með Stóru stelpunni og Tengdadótturinni á laugardaginn þar sem sú Stóra hafði átt afmæli á föstudeginum. Skruppum í bió á laugardagskvöld og vorum með matarboð á sunnudagskvöld. Mikið fyndist mér það mikilvægt baráttumál að reyna að fá þriggja daga helgar inn í vinnuviku fallega fólksins s.s. my self. Þvílíkur munur það er að fá þennan aukadag. Eins gott að Samfylkingin fann nú ekki upp á þessu í kosningabaráttunni því þá hefði ég kannski þurft að kjósa Dag hans fylgifiska. Æfingum var sinnt af kostgæfni um helgina þar sem brunað var í Laugar bæði sunnudag og mánudag, en laugardagurinn tekinn í Spönginni.

Anyways, í gær útskrifuðust börnin úr skóla en útskrift Prinsessunnar var aðeins “less formal” þar sem hún náði í einkunnaspjaldið sitt og fór svo í framhaldinu í skólagarðana þar sem hún setti niður haug af kartöflum og bar svo hestaskít á herlegheitin til að sprettan yrði nú góð, eins og hún útskýrði mjög vel fyrir fáfróðum foreldrum sínum. Unglingurinn fékk örlítið formlegri útskrift þar sem grunnskólagöngu hans er nú loks lokið og við tekur nú alvara lífsins. Ægilega hátíðlegt og fínt þar sem skólastjóri hélt góða ræðu um það sem framundan var og sjálfsagt enginn unglingurinn hefur hlustað á með báðum eyrum, en hvað um það. Nokkrir krakkar komu fram með ræðu, söng og fiðluleik sem var ofboðslega skemmtilegt að hlusta á enda getur Grafarvogurinn af sér eintóm undrabörn. Fjöldi viðurkenninga voru veitt fyrir framúrskarandi árangur í hinu og þessu og voru það þrjár stúlkur sem stóðu bara á sviðinu og skiptu þessu bróðurlega á milli sín eins og góðra stúlkna er siður. Var síðan boðið upp á kökur og góðgæti. Þetta var nú allt gott og blessað fyrir utan eitt......BUBBAtónleikarnir voru á sama tíma og höfðum við Folinn fengið boð um að mæta í kokteilboð og síðan á tónleikana, boð sem við að sjálfsögðu ætluðum að þiggja, enda um einstakan viðburð að ræða. Lítið vissum við þá að útskrift Unglingsins yrði á sama tíma. Úr varð að Folinn fór á tónleikana en Spretturinn á útskrift drengsins. Prinsessan fylgdi móður sinni og amma og afi kíktu með okkur.

Ég hef ekkert hjólað í vinnuna í tvær vikur, aumingjaskapur og ekkert annað. Hef reyndar þurft að hafa bíl í einhver skipti þar sem ég hef verið að erindast, suma daga hefur rignt og rokið, sem er ekki það ákjósanlegasta veður sem ég get hugsað mér þegar kemur að hjólreiðum. Enda er ég sparihjólari og hjóla bara í góðu veðri svo það er eins gott að sumarið fari að láta sjá sig, enda orðin langþreytt á endalausum kuldaköstum, rigningu og roki. Vita veðurguðirnir ekki að það er komið sumar á klakanum??

Framundan er kveðjupartý/afmæli á Rauða húsinu á Eyrarbakka á föstudagskvöld, en Elfa tannlæknir býður þar til veislu þar sem hún mun halda til Alabama í framhaldsnám í lok mánaðarins. Við ætlum þó að reyna að ljúka því sem byrjað var á í kjafti Spretts áður en tannsan heldur út í heim.

Í næstu viku eru aðrir stórtónleikar, með Roger Waters, sem við Folinn fengum boð á og munum ekki láta fram hjá okkur fara enda eru Pink Floyd í miklu uppáhaldi og best hefði náttúrulega verið að fá þá snillinga hér saman en þiggjum það sem næstbest er.

Sprettur

Mjallhvít.....allavega að hluta

2006-05-30T15:06:00.000Z

Hetja dagsins er Sprettur sem kom heill á húfi úr svaðilför sinni til Elfu tönnslu í gær. Hvítar tönnslur í efri góm skína nú skært og brosa fallega í átt að silfurnámunum sem eiga heima bæði á móti og á neðri hæð munnsins. Næsti tími eftir viku og aldrei að vita nema ég verði örlítið slakari þá. Þegar þessu hvíttunarferli mínu verður lokið er fegurð mín fullkomnuð með tönnum hvítum sem fönn og brosi blíðu sem bræðir sig inn i hjörtu hinna verstu leiðindapúka og svartsýnismanna.

Eftir ævintýri gærdagsins ákvað ég að sleppa bara ræktinni þar sem örlítill eftirverkur gerði vart við sig er líða fór á seinni hluta dagsins. Mun því mæta tvíefld í dag og bæði lyfta og hlaupa af krafti. Stefni síðan á að hjóla í vinnuna á morgun ef ekki verður sú hellirigning sem spámenn sjónvarpsstöðvanna lofuðu höfuðborgarbúum í veðurfréttatíma gærkvöldsins. Mig er farið að vanta góðar harðsperrur svo kroppurinn gleymi sér ekki í viðjum vanans, svo ég er að hugsa um að taka smá krók á æfingunni á eftir til að hrista vel upp í vöðvum sem hafa sofið síðan á laugardaginn.

Hvítasunnuhelgin framundan sem er vel þegin þar sem hún er lengri en aðrar helgar. Prinsessan verður með náttfatapartý á föstudagskvöld/nótt og mun ég því eiga von á 5 fræknum bekkjarsystrum hennar sem ætla að mæta með tannbursta og góða skapið ásamt náttfötum, dýnum og svefnpokum. Planið er að þær borði eitthvað einstaklega spennandi og gott, fái ís í eftirmat sem síðan mun taka púlsinn á meltunni meðan þær stuttu ætla að dansa trylltan dans við nýjast disk Prinsessunnar “Pottþétt 40”. Að því loknu á að tylla sér í rólegheit og spila eitthvað skemmtilegt og gæða sér á volgu poppkorni og eplasafa. Að sjálfsögðu verðum við Prinsessan búnar að undirbúa þetta aðeins og ryðja til í stofunni fyrir dýnur og tilheyrandi svo ég tali nú ekki um pláss til að sveifla skönkunum í takt við danstónlistina. Skemmst frá því að segja að þær eru afskaplega spenntar og ég er klárlega langvinsælasta mamman í vinahópnum.

Nú er skólinn að klárast hjá börnunum og er Unglingurinn því afskaplega feginn. Hann byrjar í sumarvinnunni hjá Ísaga á föstudaginn og verður síðan að vinna aukalega í World Class aðra hvora helgi svo hann ætti nú aldeilis að geta safnað sér örlitlum aur í sumar, svona þegar búið er að borga upp lánin sem hann fékk fyrir því sem vantaði uppá til að kaupa mótorfákinn og tilheyrandi græjur. Er hann því stórskuldugur ömmu og afa og smáskuldugur okkur Folanum.

Sprettur út

Tannlæknar

2006-05-29T09:37:00.000Z

Í dag mun ég fara í skemmtiferð í Kópavoginn þar sem Elfa tannlæknir ætlar að útrýma silfurfyllingum úr munni mínum. Ég hef fengið kvíðaköst annað slagið alla helgina, bónað á mér stellið svo venjulegt fólk hefur blindast og gert allar þær ráðstafanir sem mér eru mögulegar með það í huga að kannski þurfi ég bara ekkert að fara til tannlæknis. Svo varð mér það ljóst að ég þarf að sjálfsögðu ekkert að heimsækja hana Elfu því för mín þangað er eingöngu í hégómlegum tilgangi gerð, því engar skemmdir eru í tanngarði Sprettsins heldur á bara að losa málminn og fylla með hvítu eðalefni í staðinn þar sem það er ólíkt huggulegra að vera með hvíta jaxla í stað silfurnámunnar sem þar er nú. Ekki það að maður sé endilega með ginið gapandi ofan í fólk alla daga, en þetta er eitt af því sem ég ákvað að gera fyrir mörgum árum og hef smám saman verið að safna kjarki í. Málið er nú einfaldlega þannig að flestir þeir sem fóru reglulega til Jonna tannsa á Sigló í den eru sjálfsagt haldnir tannlæknafóbíu á hæsta mögulega stigi. Minningin um Jonna Nasista er ljós í mínum huga enn þann dag í dag. Barn að aldri fór Spretturinn í skoðun til tannlæknis eins og flestir. Sumir foreldrar sendu börnin sín reyndar til tannlæknis á Akureyri, sjálfsagt þeir sem vissu hvað djöful Jonni hafði að geyma. Í ljós kom að skemmdir voru í tönnum litla Spretts og voru gerðar ráðstafanir til viðgerðar. Skemmst er frá því að segja að tannlæknir þessi sem lifandi var mættur úr litlu hryllingsbúðinni notaði í fyrsta lagi ekki hanska og var alveg einstaklega vont tóbaksbragð af fingrum hans, í öðru lagi var hann ekkert að setja upp grímu heldur sem var sjálfsagt framhald hansaleysisins og í þriðja lagi þá var mannhelvítið með sígarettuna í munnvikinu svona rétt á meðan hann boraði allt vit úr tanngómum barnsins. Ég prísa mig sæla að hafa þó verið deyfð meðan á öllu þessu stóð en deyfingin var eitt það skelfilegast sem ég hef gengið í gegnum þar sem nálin var þrædd inn eftir tannholdinu þar til mér fannst hún komin aftur í hnakka. Í mörg ár var ég skelfingu lostin við tilhugsunina eina við það að þurfa að fara til tannlæknis en þegar fjölskyldan flutti í borg óttans þá þurfti Spretturinn eitt sinn á þjónustu slíkrar veru að halda. Í rúmar þrjár vikur, frá því tíminn var pantaður og þar til að honum kom, var ég ýmist í afneitun um að ég þyrfti á slíku að halda, eða ég svitnaði og skalf yfir því hvað tíminn var alltof fljótur að líða. Þegar ég síðan mætti með tárin í augunum til tannsa og opnaði munninn þá andvarpar aumingja maðurinn og sagði bara titrandi röddu “hver komst eiginlega í munninn á þér barn”. Í gegnum tíðina hef ég prófað nokkrar tannlækna og fann þar loks einn sem tók bara á mér eins og litlu barna þegar hann sá hvað ég var ógurlega hrædd við hann og þar hef ég verið síðan. Fyrir u.þ.b tveimur árum veiktist hann Tommi minn ægilega mikið og var frá vinnu í langan tíma. Þurfti því að finna annan tannlækni á meðan og þar kom hún Elfa mín til sögunnar, en henni kynntumst við hjónin í Pilates tímum sem við sóttum einn veturinn á laugardögum í lokuðum hópi sem vinur okkar setti saman, en sá er pilateskennari. Allavega þá er Folinn búinn að fara í allsherjar skiptingu á gömlum fyllingum en ég frestaði mínum tímum endalaust þar til að í ljós kom að Elfa er að fara til Atlanta núna í sumar í tveggja ára framhaldsnám í tannskurðlækningum svo það var annað hvort að hrökkva eða stökkva.....ég ætti kannski bara að hrökkva :/

Sprettur í kvíðakasti

Ég er hér enn......

2006-05-23T14:18:00.000Z

Hef ekkert hjólað síðan á fimmtudaginn í síðustu viku því ég neita að láta hafa mig út á hjólinu í snjókomu og rok á þessum tíma árs. Mun því verða alla daga í Spönginni þar til sólin og hlýja loftið láta sjá sig á ný, sem mér heyrist eiga að verða í næstu viku samkvæmt bjartsýnisspá sannra íslendinga.

Eftir æfingu á föstudaginn fór ég með Prinsessuna og Prakkarann út að borða á Red Chili og í bíó á eftir þar sem við skelltum okkur á kvikmyndina Shaggy dog, sem börnunum fannst alveg með eindæmum fyndin mynd og skemmtileg. Svo var bara haldið í Fannafoldina og haldið áfram að vera í leti og skemmtilegheitum.

Á laugardagsmorgun var síðan keyrt með litla fólkið í Húsdýragarðinn þar sem þau voru skilin eftir næstu klukkutímana. Á meðan rúllaði ég í Klassann og hamaðist og svitnaði af krafti næsta einn og hálfa tímann eða svo. Seinnipartinn fór Prinsessan heim með Prakkaranum og ætlaði að vera fram á kvöld svo við Folinn skelltum steik á grillið sem bráðnaði við líkamshita svo meirt var nautið. Fór ég svo í bíó númer 2 þá helgina þegar við ákváðum að fara með vinahjónum á Da Vinci Code, sem mér fannst bara alveg ágætis myndi þrátt fyrir ægilega lélega dóma og mikla gagnrýni kirkjunnar manna og kvenna, sem ég bara skil alls ekki. Hvað bull er það að útlita einhverja afþreyingarbíómynd sem guðlast og djöfladýrkun og guð (eða þannig..) má vita hvað . Fólk hlýtur nú að mega hafa misjafnar skoðanir á hlutunum. Mér finnst þetta hreint og beint hlægilegt að gera veður úr þessu og að bíóhús hingað og þangað um heiminn neiti að taka myndina til sýninga vegna þessa. Þetta er bíómynd, og ég held að þessir aumingjans menn sem hafa ekkert betra við tímann að gera en að gagnrýna slíka vitleysu ættu kannski bara að halda sig til hlés og láta okkur hin um að dæma hvað við viljum sjá og hvað ekki. Það þarf enginn bíóstjóri að hafa vit fyrir mér og mínum þó svo hans trúarskoðanir fari ekki heim og saman við eina bíómynd.

Skruppum í heimsókn til tengdó á sunnudaginn, í nýja húsið sem er ægilega flott. Mágkonan og fylgifiskar voru í heimsókn að norðan svo ansi var nú skemmtilegt að sjá andlitin á þeim svona rétt aðeins áður en þau lögðu í hann norður aftur.

Barnaafmæli seinnipartinn þar sem hún Valborg bar fram þvílíku veitingarnar að það hálfa hefði verið nóg. Grillaðar kjúklingabringur með tilheyrandi meðlæti og kökugúmmulaði í desert. Það er eiginlega verst að þau hjónin eiga bara eina dóttur, því ég myndi gjarna vilja koma oftar í barnaafmæli til þeirra .

Í dag mun ég taka vel á því í Spönginni innan um aðra kroppa sem þar mæta reglulega. Er að hugsa um að prófa eitthvað nýtt í vikunni. Ég hef aldrei verið hrifinn af svona hopp og skopp tímum sem margir stunda af krafti en þó langar mig að prófa dirty dancing og salsaþolfimi tímana sem boðið er uppá í Klassanum. Svo verð ég að viðurkenna að ég er svolítið spennt fyrir þessum súluþolfimistímum sem einhversstaðar ég sá auglýsta. En mun þó sjálfsagt mest vera í tækjum og cardio þar sem það hentar mér vel að koma og fara þegar mér sýnist.

Sprettur bíófari kveður

Miðvikudagsbull

2006-05-18T08:59:00.000Z

Jæja börnin mín stór og smá, miðvikudagur enn á ný og helgin nálgast með ógnarhraða. Alltaf gott þegar tíminn er fljótur að líða en að sama skapi kannski ekkert svo gott þar sem það þýðir að við eldumst mjög fljótt og áður en við vitum af er veru okkar á Hótel Jörð bara lokið. Ég mun að sjálfsögðu staldra lengur við en meðaljónan þar sem allir vita að fegurð, umburðarlyndi, drenglyndi, djörfung, hugrekki og allar þessar bestu dyggðir, þær lengja lífið um fjölda ára. Ég fékk nú eiginlega of stóran skammt af þessu öllu í vöggugjöf svo ég sé fram á að verða langelsti Íslendingur sem sögur fara af. Ef ég ætla ekki að lifa í 200 ár þá verð ég að fara að tóna aðeins niður þessar dyggðir mínar. Ég get nú samt ekki hugsað mér að fara að verða einhver dómhörð, óþolinmóð, stjórnsöm skvetta því það er bara einhvernveginn ekki ég. Ég er nú samt bara venjuleg manneskja eins og þið hin, kannski aðeins fallegri og glæsilegri en samt bara manneskja þrátt fyrir allt.

Yfir í allt annað.....Unglingurinn minn er búinn að finna draumahjólið í Nítró og seldi hlutabréfin sín í Glitni áðan til að fjármagna kaupin á gæðingnum sem er af ætt Yamaha 125cc, árgerð 2005 og kostar litlar 499.000 krónur svo það er eins gott að vera ekkert að drullumallast neitt á svona dýru hjóli því það gæti bara skemmst. Veit samt ekki hvort hann er sammála mér í því. Þetta er nú ekkert ósvipað hjólinu sem hann átti í fyrra, bara nýrri týpa....held ég
Prinsessan er búin að skrá sig í skólagarðana sem fara í gang í byrjun júní. Þar ætlar hún að rækta ýmislegt góðgæti handa fjölskyldunni í sumar, t.d. kartöflur, rófur, blómkál, brokkolí og einhverjar þrjúþúsund tegundir í viðbót sem þau fá þegar þau mæta. Ekki ónýtt það. Einnig ætlar hún á íþróttanámskeið hjá Fjölni í júní og svo reiðnámskeið í Faxabóli í ágúst. Nóg að gera hjá henni í sumar sýnist mér.

Fór lengri leiðina heim á hjólinu í gær, svona til að finna muninn á átakinu og tímanum. Tekur aðeins meira í lærin og er svona u.þ.b. 8-10 mínútum lengra svo ég næ aðeins betri æfingu út úr því svo ég mun líklega fara þá leiðina aftur.

Bloggstíflan sem heltók Sprettinn um daginn virðist ætla að hafa einhverja viðdvöl áfram svo þetta er í styttri kantinum þessa dagana .

Þriðjudagurinn

2006-05-16T14:07:00.000Z

Mamma, ég elska þig rosalega mikið, sko meira en allt fólkið og öll orðin og allt leður og úr og hálsmen og allt svoleiðis og meira en allir bílar og dót og rúm og svo í kringum allar pláneturnar og svo er ekki til svoleiðis orð ég elska þig svo mikið......með þessum orðum bauð Prinsessan góða nótt í gærkveldi. Maður getur nú ekki annað en verið glaður með alla þessa ást sem borin er til manns .
Spretturinn hjólaði til vinnu í dag og mun því fara sömu leið heim að loknum vinnudegi. Skilst að Prinsessan ætli að horfa á fótboltaleik í Egilshöllinni seinnipartinn svo það er aldrei að vita nema maður skelli sér á eina stutta í Spönginni líka til að lyfta nokkrum lóðum. Maður verður að vera bikiníhæfur fyrir laugarnar í sumar. Annars þarf ég ekkert mikið að hafa fyrir því þar sem ég er ógurlega heit og flott bara frá náttúrunnar hendi. Enda er mottóið að vera fit for life, þó svo sumir virðast hafa farið eitthvað stafavillt og stefna á að vera fAt for life.......Muahahahahh...ég er svo óstjórnlega fyndin að ég bara skil það varla sjálf.

Helgin var nú aldeilis annasöm þar sem ég byrjaði á æfingu í Spönginni á laugardagsmorguninn og um hádegið lögðum við Folinn upp í óvissuferð með vinnufélögum mínum og þeirra mökum. Farið var að Indriðastöðum í Borgarfirði þar sem liðinu var skipt í hópa og var okkur falið að leysa hinar ýmsu þrautir. Setja upp tjaldbúðir, elda okkur á hlóðum, skera út í tré, útbúa fána, axarkast, bogfimi, hraðaþraut, klifur og ég veit ekki hvað. Þetta var heljar prógramm allan daginn sem endaði með stórsteik í hlöðunni og tjútti á eftir. Við lentum í Fannafoldinni um hálftvöleytið eftir þennan langa en góða dag.

Alveg þykir mér merkilegt hvað fjölmiðlar fjalla um mál Eyþórs Arnalds sem var gripinn af lögreglunni eftir að hafa keyrt sauðdrukkinn og náð að strauja einn ljósastaur á rennireið sinni, þar sem hann síðan flúði af vettvangi í von um að enginn hefði tekið eftir og hann því sloppinn. Síðan sendir hann frá sér yfirlýsingu þar sem hann iðrast sáran, slíkt hafi aldrei hent hann áður og nú ætli hann í meðferð...blablabla....hann iðraðst jafnmikið og þjófur sem er gripinn með kúbeinið í annarri og kominn hálfur inn um gluggann. Ekki má gleyma því að það var heppni að þetta var þó bara ljósastaur í þetta skiptið.

En ég læt þessa áríðandi tilkynningu frá sjálfstæðismönnum í Tuborg (áður Árborg) fylgja!!!

Eins og flestir, ef ekki allir, íbúar Tuborgar vita þá hefur eitt af stóru baráttumálum Sjálfstæðisflokksins í Tuborg fyrir bæjarstjórnarkosningarnar í ár verið áhersla á að Hellisheiðin verði full-upplýst á næsta kjörtímabili... Þetta baráttumál er ekki lengur á stefnuskrá flokksins þar sem komið hefur í ljós að ljósastaurar geta bara hreinlega verið fyrir!!

Sprettur fyndni

Fegurðin kemur innan frá....segir ljóta fólkið allavega

2006-05-16T14:06:00.000Z

Tók massaæfingu í Spönginni í gær aðdáendum mínum til mikillar ánægju. Þurfti að byrsta mig svolítið við þá svo ég fengi að æfa í friði...they were all over me!! Þegar þeir voru búnir að horfa nægju sína á fegurðina gátu þeir snúið sér aftur að eigin ljótleika og grámyglu hverdagsleikans sem yfirtekur ljóta fólkið stundum þegar það hefur notið slíkrar fegurðar sem minnar. Maður hefur hálfgert samviskubit yfir að vera svona mikil gyðja, en það þýðir ekkert að láta það hafa áhrif á sig. Ekki get ég skammað foreldrana fyrir að hafa vandað svona vel til verksins. Margar vinkvenna minna eiga tvö eða jafnvel fleiri systkin sem mér fannst alltaf voða svekkjandi þegar ég var yngri, mig langaði alltaf að eiga fleiri svoleiðis. Í dag er þetta allt afskaplega skýrt í mínum huga. Við erum tvær systurnar og er ég sú eldri og kannski örlítið fallegri og klárari en þó ekki mikið. Þegar ég fæddist höfðu foreldrarnir aldrei séð annað eins barn sem mig, slík var fegurðin. Þau ákváðu að búa til fleiri svona falleg börn og þegar ég var rúmlega þriggja ára kom Systir, sem olli ekki vonbrigðum, enda fögur sem stóra systir. Það er nú bara svo og svo mikið sem hægt er að leggja af mörkum til að gera veröldina fallegri svo foreldrarnir ákváðu á þessum tímapunkti að láta þetta gott heita því ágangur vina og vandamanna var hvort eð er slíkur að þau hefðu líklega ekki ráðið við meira á þessum tíma. Fljótlega kom í ljós að við yrðum ekki bara undurfríðar gyðjur heldur ótrúlega klárar og miklir töffarar að auki. Það má því segja að foreldrarnir hafi dottið í lukkupottinn þegar við systur ákváðum að fæðast í fjölskylduna.
Þó er nú einnig “downside” við að vera í þessum bjútípakka því við systur erum oft og tíðum hundeltar af ljóta fólkinu sem heimtar að fá að njóta fegurðar okkar í þessum ljóta heimi, en það getur bara verið ansi þreytandi að láta dást að sér endalaust.

Sprettur fallegi svífur inn í helgina

Aumingja Dorrit

2006-05-11T13:23:00.000Z

Prinsessan kom með hjólið sitt í vinnuna til mín í gær og hugðist hjóla samsíða strunsandi móður sinni í Grafarvoginn. Við vorum um það bil klukktíma á leiðinni í góða veðrinu og nutum okkar í botn þennan góða dag. Enda um að gera þar sem rigningin mætti galvösk til vinnu í morgun með loforði um að vera meira eða minna á svæðinu næstu daga. Sólin boðaði veikindaforföll eftir að hafa skinið á okkur í gegnum mengunarmistrið síðustu daga. Mun sjálfsagt vera í fríi meirihluta sumarsins eins og síðustu ár .

Ekki var hjólaði í vinnuna í morgun eins og til stóð og mun ég því taka verulega á því í Spönginni í dag þess í stað. Unglingurinn lauk samræmdu prófunum í gærmorgun og hélt að því loknu út í óvissuna með árganginum. Enduðu þau austan við fjall þar sem var farið í flúðasiglingu og grillað á eftir. Ekki veit ég hvað prógrammið er í dag en þau koma líklega heim seinnipartinn. Hann er búinn að segja upp vinnunni í Nóatúni en verður áfram á aukavöktum um helgar í Klassanum í sumar ásamt því að vinna fulla vinnu á daginn hjá Ísaga. Peningagræðgin alveg að fara með hann . Nei nei, hann er nú bara að safna sér fyrir motocross hjóli þessi elska og svo er nú aldeilis gott að eiga einhverja aura í haust þegar verður farið í menntaskólann.

Aumingja Dorrit fékk ekki að fara til Ísrael þar sem hún á ekki ísraelskt vegabréf. Ég skil ekki lætin yfir þessu, konan svaraði bara fyrir sig þegar þessir delar voru með dónaskap við hana. Hverjum litist ykkur á ef tollararnir á KEF tækju upp á því að spyrja ykkur, ”hvernig finnst þér eiginlega að vera gift konu/manni frá Sandgerði” eða eitthvað álíka gáfulegt :/. Hún ætti bara að vera fegin að komast ekki inn í þetta land dauðans þar sem kynþáttahatarar og morðóðir menn ráða ríkjum, skjóta og myrða fólk með köldu blóði og kalla það hernaðaraðgerðir, gegn ríki sem ekki einu sinni hefur her, með þessum fína stuðningi frá George Bush og skósveinum hans. Á sama tíma eru ísraelskir fallhlífarsveitarmenn látnir fjarlægja gasellu úr húsgarði á Vesturbakkanum þar sem hún er síðan flutt á brott í brynvörðum bíl í dýragarð í Jerúsalem. Eins gott að bjarga aumingjans dýrinu frá þessum vonda Palestínumann, var svo handtekinn þar sem bannað er samkvæmt ísraelskum lögum að hafa villt dýr heima hjá sér. Auðvitað eiga gyðingarnir bara að skila landinu og hafa sig á brott ef þeir geta ekki lifað eftir lögum og reglum þeirra sem áttu landið til að byrja með. Það eru ekki nema 60 ár síðan þeir ákváðu að þetta væri þeirra land og því mættu þeir bara hirða það ef þeim sýndist. Gyðingar eru fjandi valdamiklir í hinum vestræna heimi í dag og geta vaðið upp með allskyns vitleysu og drulluhátt ef þeim sýnist svo. Til að mynda er bannað með lögum að halda því fram að helförin hafi ekki átt sér stað, hvað bull er það. Það vita allir að hún átti sér stað en að banna fólki að hafa skoðanir er fráleitt. Ég veit ekki til þess að það sé bannað með lögum að halda því fram að Bandaríkjamenn hafi myrt, nauðgað og rænt hinum einu sönnu Ameríkönum, indjánunum, en það er víst allt annað. Annars var skipulagt þjóðarmorð Hitlers á gyðingum er ekki svo ólíkt því sem Ísraelsmenn eru að dunda sér við í Palestínu núna. Reyna að múra fólk inni og halda þeirri svívirðu fram að þetta sé gert í öryggisskyni. Ein sjálfsmorðssprengja (sem sjálfsagt flestir Palestínumenn fordæma) springur í Jerúsalem og ísraelski herinn er mættur með jarðýtur í hefndarskyni og jafna heimili fólks við jörðu, fólk sem ekkert hefur gert saknæmt annað en það að vera fætt röngu megin við þau landamæri sem Ísraelar drógu línu um. Ég er alls ekki að mæla sjálfsmorðsárásum Palestínumanna bót því ég tel það heigulshátt að gera slíkt, en hvernig á þetta fólk að verjast vel búnum herjum Ísraels (sem er í boði Bandaríkjamanna) ef það er enginn her sem getur barist fyrir þeirra hönd nema það sem búið er að flokka sem hryðjuverkamenn. Allir sem ekki eru í góðu bókunum hjá Bush eru flokkaðir sem hryðjuverkamenn liggur við að segja.

Hætt að rífa kjaft í bili
Sprettur friðarsinni

Lítið að gerast í gær, miðvikudag

2006-05-11T08:32:00.000Z

Djö..var ég nú dugleg á þriðjudaginn, verð ég að segja. Hjólaði í vinnuna og heim aftur offkors, fór þá í Spöngina og tók vel á því þar og fór svo á brettið í 40 mínútur. Prinsessan var nefnilega að fara í hesthúsið með vinkonu sinni og ég var svo ægilega orkumikil eftir að hafa hjólað heim í góða veðrinu svo ég ákvað að halda bara áfram. Í gær var Þjóðverjinn skilinn eftir þar sem ég strunsaði heim á mínum fögru fótleggjum eftir vinnu í fylgd Prinsessunar sem hjólaði með.

Hundurinn kom heim í fyrradag eftir að hafa eytt nóttinni í fangaklefa á Leirum. Óhætt að segja að Prinsessan hafi varla ráðið sér fyrir kæti yfir að hafa endurheimt dýrið. Hann var ekki í náðinni hjá mér eftir uppátækið.

Þegar Prinsessan kom heim úr hesthúsinu á þriðjudaginn angandi af hrossaskítslykt þá skellti fjölskyldan sér á MangóGrill sem er vel falinn veitingastaður í Brekkuhúsum í Grafarvogi. Þau skipti sem við höfum farið þangað höfum við fengið afbragðsþjónustu og virkilega góðan mat. Hægt að fá hamborgara í bland við eitthvað aðeins í hollari kantinum fyrir fólk eins og mig J. Eigendurnir bjuggu í USA og áttu slíkan stað þar fyrir einhverjum árum síðan og það leynir sér ekki þar sem skammtastærðin er sjálfsagt ætluð fyrir akfeita Ameríkana, svo ég gat nú ekki klárað nema helminginn af minni delissíus Bahama Mama samloku með kjúklingi og hrísgrjónum.....nammi namm.

Spretturinn kveður snemma sökum bloggstíflu

Veðurguðirnir

2006-05-08T13:47:00.000Z

Eftir röska göngu frá Efstaleitinu í Fannafoldina, sem tók um það bil 50 mínútur, á föstudaginn var farið að pakka niður útilegugallanum á fjölskylduna og svo haldið var austur á bóginn í átt til Kirkjubæjarklausturs með hjólhýsið góða. Vorum að spá í að renna norður en nenntum eiginlega ekki að keyra svo langt fyrir svona stuttan tíma. Höfðum það afskaplega gott á klaustri, fórum í smáfjallgöngu með Prinsessuna og vinkonu hennar sem fékk að fljóta með í ferðalagið, lásum, borðuðum og höfðum það notalegt. Vantaði reyndar sundlaugina sem búið var að rífa, en í bígerð er að byggja nýja á næstunni svo við komum bara með sundgallann næsta sumar. Runnum inn í borgina um fjögurleytið í gær og enduðum í grilluðu lambalæri hjá foreldrunum í gærkveldi ásamt Systir, Oddinum og afleggjurum þeirra.

Folinn tók fram hjólið sitt í morgun og hjólaði í Heimsklassann í Laugum þar sem hann ætlaði að taka æfingu með Rafvirkjanum. Það kom því í minn hlut að sjá um Prinsessuna í morgunsárið. Sú stutta var í þreyttari kantinum í morgun eftir annasama helgi og kannski líka svolítið eftir að hafa farið frekar seint að sofa í gær. Spretturinn fór því á Þjóðverjanum ógurlega í dag en ætla nú samt að ganga heim eftir vinnu og skilja bara þann stóra eftir hér í Efstaleitinu og sæki hann svo bara í kvöld. Ætla að mæta í Spöngina í dag og taka léttar lyftingar en mun þó ekki stoppa lengur en í ca. 40 mínútur þar sem labbið tekur tæpan klukkutíma heim. Hef ekki samvisku í að bregðast aðdáendum mínum sem hafa sjálfsagt beðið með óþreyju eftir gyðjunni alla helgina. Prinsessan er svo upptekin þessa dagana að leika sér úti með krökkunum að hún tekur vart eftir því því þótt maður láti sig hverfa í smátíma.

Ég hef á tilfinningunni að það séu samantekin ráð veðurguðanna að vera með eitthvert hópgrín í okkur hér á Klakanum. Kannski einhverskonar samkvæmisleikur þar á bæ. Ráðast inn á Klakann með bongóblíðu og öðrum tælandi veitingum í formi sólskins og hita, svo þegar maður er rétt að átta sig á því að maður er bara sáttur við þessa lúmsku tælingu og búin að taka fram minipilsið og hlírabolinn, þá kippa þeir fótunum undan tilveru saklauss fólks og drekkja því í rigningu og kulda, eins og við séum saklaus tilraunadýr í efnafræðitíma alheimsins. Í dag fáum við sól í gegnum mistrið og ágætis hita. Á morgun er okkur lofað aðeins hærra hitastigi og kannski pínulítið meiri sól. Á miðvikudaginn lækkar hitastigið um nokkrar gráður og sólin fer í frí á Snæfellsnesið. Á fimmtudaginn heldur hitastigið áfram að lækka um nokkrar gráður í viðbót, dimmir aðeins yfir og rigningin dettur inn í öllu sínu veldi. Á föstudag og laugardag hættir nú reyndar að rigna en hitastigið er ennþá eins og í meðalísskáp hjá vísitölufjölskyldu í Árbænum.
Þetta er ástæðan fyrir því að ég skil ekki fólk sem talar um að síðasta sumar hafi nú verið svo frábært…blablabla….og fólk segir þetta á hverju ári. Mín skoðun er sú að við Íslendingar erum svo fádæma góðir í sjálfsblekkingarleikjum (enda höldum við því blákalt fram að við séum hamingjusamasta fólk í heiminum þrátt fyrir myrkur á níu mánuði ársins og alvarlegan skort á sól og hita hina þrjá) að þegar veðurguðirnir heiðra okkur með sól og 10+ gráðu hita í tvo og hálfan dag á einu sumri þá eru það einu dagarnir sem minnið kærir sig um að varðveita og útkoman verður því öll þessi frábæru sumur sem við höfum átt síðastliðinn ár. Ég á til dæmis móðursystur á SiglóCity sem segir alltaf þegar talað er við hana “Hvað segirðu, er kalt fyrir sunnan…það er nú sko bara eins og á Majorka hér á Sigló núna”……blindbylur og búið að loka göngunum…….

Ég spái 29 stiga hita um miðja næstu viku í bland við snjókomu og eldingar.

Sprettur veðurfræðingur

Vinnuvikan senn á enda

2006-05-05T14:38:00.000Z

Hjólreiðar til og frá vinnu hafa gengið afskaplega vel. Er jafnan með rokið í andlitinu á heimleið og þá sérstaklega í Bryggjuhverfinu sem virðist vera með einkaleyfi á roki alla daga. En það reynir þá bara aðeins betur á lærvöðvana. Í dag var hjólið geymt heima og ákveðið að ganga heim eftir vinnu. Það ætti að taka tæplega klukkutíma að komast úr Efstaleitinu í Fannafoldina svona ef maður gengur hvorki hægt né hratt.

Unglingurinn er nú á kafi í samræmdum prófum og hefur hingað til gengið ágætlega, nema í dönskuprófinu sem var núna í morgun, gekk sæmilega sagði hann enda danska eiginlega hans veikasta fag en eingöngu vegna þess að ef hann fengi að ráða þá yrði tungumál frænda vorra í Danaveldi sjálfsagt flokkuð með leiðinlegustu uppfinningu allra tíma. Hans mælikvarði þegar maður spyr hvernig gekk í prófinu er eitthvað á þessa leið....”ágætlega, svona átta fimm”.

Litla fjölskyldan ætlar að skella sér í ”útilegu” um helgina, ef hægt er að kalla það útilegu að fara í ferðalag með hjólhýsið, því ekki er legið úti þegar slíkri græju er fyrir að fara. Set hér með í gang samkeppni um besta nafnið á slíkt ferðalag fyrir þá sem kjósa að vera með hjólhýsi, tjaldvagna, fellihýsi osfrv. þá mætti sá hinn sami endilega skjóta því nafni að mér hér á vefnum. Í verðlaun er árituð mynd af gyðjunni mér . Ekki er endanlega ákveðið hvert á að fara heldur fer það bara eftir veðurspánni, sýnist þó að það verði annaðhvort Kirkjubæjarklaustur eða bara norður í land.

Þar sem ég verð ekki á svæðinu yfir helgina og mun því ekki mæta í Spöngina í fyrramálið þá vona ég nú að helgin verði ekki ónýt hjá ljóta fólkinu sem treystir á að ég mæti því til ánægju og yndisauka. Ég mun bæta þeim það upp með tvöfaldri innkomu á mánudaginn. Annars verð ég komin með svo hrikalega stinna lærvöðva ef ég held áfram að vera dugleg að hjóla að fótleggjafegrun í Klassanum mun kannski leggjast af í einhverjar vikur. Þó mun ég að sjálfsögðu mæta að minnsta kosti 4x í viku í Klassanum, auk hjólreiðanna, því ekki má maður bregðast aðdáendum sínum.

Síðasta samkoma okkar glæsikvenda var í gærkveldi hjá Ellu, sem töfraði fram grillaðar kjúklingabringur með piparostasósu og tilheyrandi gúmmulaði......slurp og slef segir maður nú bara eftir slíka veislu.

Mér þykir yfirleitt alveg fíflalegt hvað hægt er að setja í ”fréttirnar” en er samt alræmdur sökker fyrir slíkum ”fréttum” sem allajafna gengur undir nafninu slúður.....helst vil ég nú samt frekar líta á það sem þjónustu við aðdáendur að vera bara upplýst um það hvað fræga fólkið er að gera eða ekki gera. Eini munurinn á mér og svo roooooosalega mörgum er sá að ég trúi yfirleitt ekki nema í mesta lagi 50% af því sem ég les og skoða en þykir engu að síður gaman að fletta slíkum tímaritum og síðum á netinu. Allavega, ferskt slúður um Beckham dúkkurnar. Þau segjast nú ólm vilja eignast dóttur og hafa lagst í rannsóknir á því hvernig það megi helst takast. Eitt af þeim ráðum sem þau hafa fengið er að stunda kynlíf standandi (hélt reyndar að karlmaður ætti alltaf að vera standandi..... :/ ). Þetta er svona svipað og að segja að ef þú borðar 7 poka af M&M með hnetusmjöri þá geturðu flogið........en ég get nú ekki ætlast til þess að allir séu jafnskynsamir og ég.

Jæja kæru vinir þá kveð ég í bili og geng hægt inn í helgina á leið út úr bænum.

Sprettur slúðrari

Þjófóttir unglingar á SigloCity

2006-05-04T09:52:00.000Z

Að vera unglingur á Sigló var mikið ævintýri, en ekki er víst að foreldrum mínum hafi fundist ég jafnskemmtilegur unglingur og mér sjálfri fannst. Var ýmislegt gert sem ekki hefði verið vinsælt hjá þeim ef upp hefði komist. Við vinkonurnar fundum okkur alltaf eitthvað uppbyggilegt að gera ef okkur leiddist og dæmi um einn slíkan dag er þegar ég, ásamt Bylgju og Möggu Dís, ákváðum að gera okkur klárar í ránsferð um bæinn. Ekki voru nú margar verslanir í plássinu en við röltum á milli og tókum þar traustataki ýmsar nytjavörur fyrir unglinsstelpur. Í Versló unnu margar góðar konur sem af einhverjum ástæðum voru ekkert að fylgjast neitt sérstaklega með þremur grunsamlegum stelpum sem ekki voru að kaupa neitt heldur bara hanga í búðinni. Fengurinn úr Versló var stórt net (poki) af appelsínum. Þaðan lá leiðin í Kaupfélagið sem var nú mun auðveldara viðfangs og þá aðallega vegna stærðar. Ekki man ég sérstaklega hvað við tókum í Kaupfélaginu en það hefur sjálfsagt verið eitthvað bráðnauðsynlegt eins og appelsínurnar. Eins og gefur að skilja vorum við orðnar ansi þreyttar og taugastrekktar eftir slíka ferð sem þessa og ákváðum því að enda bara í búðinni hjá Önnu Láru og láta gott heita. Búðin hennar Önnu Láru seldi nú ýmislegt en þó mest fatnað og eitthvað af snyrtivörum. Amma Gunna vann nú hjá henni sem saumakona en ekki man ég hvort hún var að vinna þennan dag. Það var ekkert sérstaklega auðvelt að hnupla úr búðinni hennar Önnu Láru því hún hafði yfirleitt auga með okkur. Þá þóttist ein jafnvel þurfa að máta buxur eða eitthvað slíkt svo hinar fengju frið til að athafna sig. Þetta var eiginlega skipulögð glæpastarfssemi mætti segja. Út fórum við með tvo augnskugga, annan appelsínugulan hinn túrkisbláan, algjört möst . Leiðin lá heim til ömmu Gunnu sem var nú hálfpartinn amma allra barna á Sigló sem kærðu sig um það, en þó átti ég nú mest í henni því hún var sko mín alvöru. Á þessum tíma hélt ég dagbók og við færðum samviskusamlega inn í þá góðu bók allt sem gerst hafði þennan viðburðaríka dag og hvað við höfðum upp úr krafsinu. Dagbókin innihélt einnig ýmsa aðra leyndardóma sem enginn vissi, eða veit, hverjir eru nema þessar tvær vinkonur mínar. Ég var hjá ömmu og afa í "pössun" í einhverja daga því mamma og pabbi höfðu brugðið sér eitthvað í burtu. Meðan á dvölinni stóð geymdi ég bókina ofaní gömlum plötuspilara hjá ömmu. Sá var ævarforn og hafði ekki verið opnaður í fjölda ára svo ég taldi leyndarmálum mínum óhætt þar. Eitthvað annað spennandi hefur tekið yfir næstu daga svo ekkert var skrifað í bókina og gleymdist hún um hríð. Líklega hafa liðið einhverjar vikur áður en ég mundi eftir því að hún var þarna hjá ömmu svo ég ákvað að ná í hana og viti menn......plötuspilarinn var horfinn, ekki bara úr herberginu heldur húsinu og ekki gat ég spurt hvert því ég var skíthrædd um að amma hefði kíkt ofaní, lesið bókina og nú væru allir mínir leyndardómar á yfirborðinu. Ég beið bara eftir að við vinkonurnar yrðum handteknar og færðar fyrir Óla löggu fyrir þessa skipulögðu glæpastarfssemi okkar. Sá dagur kom nú ekki en ég hef ennþá aldrei þorað að spyrju ömmu hvort hún hafi fundið þessa bók, en líklega hefur hún bara farið á haugana með græjunni án þess að eftir henni væri tekið. Ekki man ég nú heldur hvort appelsínurnar voru borðaðar þann daginn en augnskuggarnir voru sko aldeilis nýttir þar sem ég og Sibba vinkona tókum alveg ægilega fantasíuförðun hvor á annarri og tókum svo myndir því okkur fannst við svo æðislegar.

Ætli þetta sé fyrnt?

Sprettur þjófótti

Hjólagleði

2006-05-02T15:19:00.000Z

Vorið komið í Sprettinn sem nýtir morgunsólina í hjólreiðar og rennir sér til vinnu í góða veðrinu. Hjólaði í og úr vinnu á fimmtudag og tók æfingu í Spönginni eftir það, hjólaði í og úr vinnu á föstudag en engin æfing eftir það. Tók þess í stað æfingu á laugardag og mánudag. Hjólaði í vinnu í morgun en næ líklega ekki að taka á því í Spönginni eftir túrinn heim þar sem uppskeruhátíð er í körfuboltanum hjá Prinsessunni sem byrjar kl. 18:00 og er ætlast til að við mætum með veitingar með okkur svo við mæðgurnar munum útbúa eitthvað hollt og gott fyrir þessa fínu hátíð. Það er bara eitt sem ég ekki skil og það er fólk sem segist ekki hafa tíma til að fara í ræktina eða hreyfa sig á einhvern annan hátt.....en þetta sama fólk hefur tíma til að horfa á sjónvarpið á hverju kvöldi, hefur tíma til að sitja á kaffihúsum eftir vinnu með listaspírunum og menningarvitunum og svo mætti lengi telja. Stundum segist fólk ekki getað hugsað sér að fara strax eftir vinnu frá börnunum en veit samt ósköp vel að börnin eru hvort eð er ekkert heima að hanga yfir foreldrunum, heldur úti að leika við vinina. Ekki misskilja mig, ég hef ofboðslega gaman af því að fara á kaffihús og sitja þar og spjalla við góða vini, ég horfi líka á sjónvarpið á hverju einasta kvöldi og börnin mín eru langt frá því að vera vanrækt sökum hreyfingarfíknar móðurinnar. Þetta er allt spurning um forgangsröðun og skipulag. Ég vinn fulla vinnu, ég fer í ræktina nánast daglega, ég elda á hverju einasta kvöldi, húsið mitt er alltaf hreint og fínt (með hund á heimilinu) og samt get ég sinnt manni og börnum nokkuð vel. Ég hef bara ekki áhuga á að rotna og daga upp af einskærri leti og leiðindum svo ég segi bara við ykkur letihaugana, drullist nú upp af ykkar lata rassi og farið að hreyfa ykkur áður en þið verðið orðin of gömul og þreytt til að geta nokkurn skapaðan hlut. Það eru forréttindi að NENNA að hreyfa sig.

Við hjónin skruppum í bíó um helgina og sáum Inside man með Clive Owen, Denzel Washington og fleiri góðum. Spike Lee mynd en þó í allt öðrum dúr en hans myndir almennt eru, en var bara nokkuð góð.....þrjár * af fjórum. Áður en við fórum í bíó var tekinn smá rúntur um borgina og fór hungur að herja á okkur hjónin svo við ákváðum að fá okkur eitthvað létt í gogginn. Enduðum í burger og tilbehör......ójá, mín fékk sér sko feitan hamborgara með frönskum og alles. Fæ mér, eins og gefur að skilja, afskaplega sjaldan slíkan hroðbjóð en finnst það voðalega gott meðan á átinu stendur....síðan er ég með óbragð í munninum næstu klukkutímana á eftir og er mér því nauðsynlegt að hafa stóran poka af Extra tyggjói við höndina til að deyfa ógeðiseftirviðbjóðsbragðið í munninum.

Framundan er stutt vinnuvika eina ferðina enn sem vekur alltaf lukku hjá Sprettinum. Samkoma glæsikvenda er áformuð á fimmtudagskvöldið í Laxakvíslinni og víst er að þar verða reiddar fram ljúffengar veitingar að hætti húsmóðurinnar þar á bæ. Síðan verður líklega farið í samkomusumarfrí þar sem hver mun sinna sínu fram á haustið. Einhvern veginn hittumst við nú samt alltaf nokkuð oft í þessum ”fríum” okkar þar sem það vill jú þannig til að flestar erum við systur, frænkur og bestu vinkonur hvort eð er. En skipulagður hittingur liggur í dvala yfir sumarmánuðina eins og áður sagði.

Spretturinn hjólandi kveður í bili

SigloCity í den

2006-04-28T13:38:00.000Z

Kvöld eitt á SigloCity fyrir mörgum árum síðan, vorum við nokkrar vinkonur á unglingsaldri á röltinu í bænum á laugardagskvöldi í leit að einhverjum á bíl sem við gætum betlað rúnt af, sem okkur þótti hin besta skemmtun um helgar. Eina skilyrðið var að í bílnum væri einhver sætur og skemmtilegur, nema bílstjórinn mátti alveg vera nörd eða lúði þar sem hann þjónaði jú ákveðnum tilgangi. Rákumst við þetta kvöld á ansi spennandi kost að okkur fannst, sem voru 3 náungar af Króknum (Sauðárkróki) sem við könnuðumst við og þóttu bara alveg í lagi. Það þótti nú ekki tiltökumál að troða sér aðeins fleiri í bílinn en sætapláss bauð uppá, sem við og gerðum. Eftir smárúnt þurftum við stelpurnar að komast á pissið og var því stoppað fyrir framan sundlaugina svo við gætum hent okkur þar á bakvið hús og sinnt kalli náttúrunnar. Þegar ein var að standa upp greip hún í hurðarhún sem gaf eftir og hurðin opnaðist, hafði þá Baddi sundlaugarvörður greinilega gleymt að læsa húsinu. Þetta þótti okkur nú aldeilis spennandi og rukum upp á veg og hóuðum í strákana sem hlýddu kallinu (offkors), nema bílstjórinn sem varð auðvitað að vera á verði. Sundlaugin á Sigló var þannig þegar við vorum yngri að á veturna var sett gólf yfir laugina svo hægt væri að kenna íþróttir í skólanum, þar sem við áttum ekki íþróttahús. Við fórum inn í hús og hlupum þar um og fífluðumst, hoppuðum á einhverjum dýnum og höguðum okkur eins og unglinga er siður við slíkar aðstæður. Eftir stutta stund sáum við ljóstýru frá vasaljósi nálgast okkur frá hinum enda hússins. Var þá ekki Baddi mættur til að reka þessa stórhættulegu unglinga út og var kallinn búinn að hringja á lögguna í þokkabót. Það eina sem hræddi mig við lögguna var það að mágur móður minnar var þar háttsettur og auðvitað var hann á vakt þessa nótt og mætti til að lesa yfir þessum brjáluðu unglingum sem höfðu brotist þarna inn. Ég grátbændi hann um að segja mömmu ekki frá þessu því eins sárasaklaust og þetta var þá vissi maður að foreldrarnir litu hlutina ekki endilega sömu augum og maður sjálfur. Þar sem búið var að eyðileggja allt fjörið var öllum bara skutlað heim í háttinn.

Næsta dag var öll fjölskyldan í mat hjá ömmu Gunnu og eitthvað fannst mér mamma afundin og skrýtin við mig svo ég fékk kuldahroll og svitaköst til skiptist því nú var bara spurning um hvenær ég fengi skammir frá foreldrum mínum vegna þessa. Því eins og allir vita eru skammir frá foreldrum eitthvað það leiðinlegasta sem unglingar vita. Ég ákvað því að vera bara töff á því og redda málunum og var reddingin eitthvað á þessa leið:

Spretturinn við mömmuna: Mamma, pældí´ðí í gær maður þá vorum við bara á rúntinum sko, ég og Magga og Bylgja, með vinum okkur af Króknum, fórum sko að pissa bakvið sundlaugina og spáðí´da, það bara opin hurðin inn. Við vorum ekkert að reyna að opna sko, hún opnaðist bara þegar Magga eða einhver rak sig í húninn, eða sko það var allavega ekki ég. Við kíktum bara aðeins inn og þá bara löggan komin allt í einu. Eða Óli var sko á vakt, var hann ekki annars búin að segja þér þetta????.......

Mamman svarar: Neei!!!

Ég dó.

Sprettur hjartahreini

Ps. Myndin í gær var skemmtileg, fyndin og bara hið fínasta tjikkflikk.

Vor í lofti

2006-04-27T09:08:00.000Z

Hjólaði í vinnuna í morgun sem var afskaplega frískandi og gott. Legg af stað úr Fannafoldinni kl. 7:00 og er komin í Efstaleitið ca. 7:25, að minnsta kosti svona í byrjun sumars þegar maður er að komast í hjólagírinn svona úti undir beru lofti. Stefni á að taka þetta á 20 mínútum þegar fram líða stundir. Má heldur ekki vera styttra því þá tæki því varla að hjóla þetta. Kemur alltaf jafnmikið á óvart hvað þetta er ægilega ólíkt því að hjóla í Klassanum, alveg eins og að hlaupa á bretti eða úti er gjörólíkt og persónulega finnst mér ægilega leiðinlegt að hlaupa úti. Legg af stað í þvílíka hlaupagírnum og svo eftir nokkrar mínútur þá einhvern veginn veit ég ekkert hvert ég á að hlaupa, mér er farið að leiðast alveg óskaplega og er bara ekkert vön að fá kalt loft í lungun þegar ég hleyp. Svona er Ísland í dag J. Folinn hjólar stundum í Klassann á morgnana og er þá yfirleitt í keppni við sjálfan sig, þ.e að bæta tímann frá því síðast. Hans besti tími hingað til úr Fannafoldinni niður í World Class er tæplega korter. Ég væri dauð þrisvar sinnum ef ég ætlaði að reyna það en hann er svosem í betra formi en ég svo maður verður bara að sætta sig við að vera second best ;).

Prinsessan er að fara á hestbak með vinkonu sinni í dag svo kannski maður verði bara ógurlega duglegur og hjóli heim í ”hinn” æfingagallann og taki aðeins á því í Spönginni líka. Annars fer ég nú ekki oft á æfingu þá daga sem ég hjóla í og úr vinnu, finnst það einhvernveginn ágætisæfing en þó er undantekning á reglunni.

Í kvöld ætla nokkrar skvísur af vinnustað mínum að skella sér í bíó, þar á meðal ég. Planið er að sjá Failure to launch með Sarah Jessica Parker og Matthew McConaughey. Myndin fær að vísu ekkert sérstaka dóma en okkur er alveg sama…..MM fer úr að ofan og það er nóg til að tæla túttur eins og okkur í bíó.

Á mbl. í dag er sagt frá konu sem krefst skaðabóta fyrir að hafa verið flengd á vinnustað sínum. Þetta var víst hluti af því að hún tapaði samkeppni sem haldin var meðal söluhópa til að auka sölu fyrirtækisins. Átti að refsa þeim sem töpuðu á ýmsan hátt, t.d. með flengingum, þeir látnir ganga með bleyju og ýmislegt annað huggulegt. Ég skil konugreyið alveg að vera ekkert sérstaklega sátt við þetta, en að hafa látið það viðgangast að vera flengd í fyrsta stað og heimta síðan skaðabætur fyrir niðurlæginguna, þann hluta átta ég mig ekki alveg á. En þetta var auðvitað í Bandaríkjunum svo það þarf kannski ekkert frekari skýringa við. Fólk sem kýs George W. Bush sem forseta landsins...aftur...hlýtur að sakna einhverra heilasella og það brýst út í allskyns vitleysisgangi eins og hér að ofan. Íslendingar ættu kannski að taka upp slíka refsingu í dómskerfinu, þeir sem lemja, nauðga og stela fá þá bara rassskell í staðinn fyrir þessa 2 daga skilorðsbundið sem virðist vera venjan.

Önnur góð frétt er á þann veg að Páfagarður sé að láta rannsaka smokka og hvort leggja eigi blessun sína yfir notkun þeirra hjá kaþólskum hjónum þegar annað er smitað af HIV veirunni. Talsmenn Páfagarðs kenna að besta vörnin gegn HIV sé kynlífsbindindi. Svo er ætlast til þess að maður taki boðskap þessara manna alvarlega!!!!.....hætti nú alveg að snjóa segi ég bara.

Sprettur rassskellir

Komin heim

2006-04-26T10:01:00.000Z

Nú geta æstir aðdáendur tekið gleði sína aftur þar sem Spretturinn er mættur til leiks á ný eftir nokkurra daga frí í kóngsins Köbenhavn. Ferðin var fín og fengum við Folinn hið ákjósanlegasta veður til að spóka okkur í borginni. Lítið frá ferðinni að segja annað en það að hún heppnaðist afskaplega vel, röltum mikið, borðuðum góðan mat, sjoppuðum smávegis og komum svo heim í gærkveldi þar sem Prinsessan tók á móti okkur eins og hún hefði endurheimt okkur úr svaðilför mikilli . Maður nýtur þess að vera svona ægilega elskaður og sárt saknað af örverpinu, sérstaklega þar sem sá tími kemur sjálfsagt fyrr en síðar að þessi sama gleði mun heltaka hana þegar við skiljum hana eftir heima er við förum í slíkar ferðir sem þessa. Best að njóta þess meðan það varir.

Framundan er bara stútfull vika af æfingum og bíður minn fagri kroppur óþreyjufullur eftir því að komast í Spöngina í dag. Mun (hel)taka á því svo annað eins mun ekki hafa sést í úthverfum borgarinnar síðan Gullfoss gaus (já ég veit).

Stutt blogg í dag sökum anna eftir fríið.

Spretturinn kveður með sól í hjarta og snjó á götum.

Fermingar

2006-04-19T10:52:00.000Z

Páskarnir komnir og farnir, annað frí framundan eftir stutta vinnuviku. Fer til Köben á föstudag og kem líklega ekki fyrr en degi seinna en ætlað var, þ.e. á mánudaginn. Tvöföld fermingarveisla á morgun hjá systkinabörnum Folans sem halda sameiginlega veislu fyrir vini og vandamenn. Mikið finnst mér sniðugt þegar fólk gerir svoleiðis. Ég fermdist fyrir 20 árum síðan í Siglufjarðarkirkju og var haldin sameiginleg veisla fyrir okkur tvær frænkurnar sem okkur fannst bara voðalega gaman. Það komu fleiri gestir sem þýddi í rauninni fleiri pakka handa okkur því fólki fannst alveg óhæft að mæta bara með pakka handa því fermingarbarni sem bauð því til veislunnar, úr því við vorum tvær þá skyldum við báðar njóta góðs af. Auðvitað voru ”aukapakkarnir” ekkert alltaf eins flottir eða stórir og ”alvörupakkarnir” en hverjum var ekki sama. Það tíðkaðst ekki eins að gefa peninga á þessum tíma og fékk maður því ekki mikið af slíku. Þó man ég að ég fékk heilar 25.000 krónur sem ég lagði á banka og eyddi síðan stuttu síðar en í hvað get ég ómögulega munað. Ég man heldur ekkert eftir því hvað ég fékk í fermingargjöf frá öllu þessu fólki en þó man ég eftir svefnpoka sem ég fékk og týndi síðan eina verslunarmannahelgi Húsafelli nokkrum árum síðar. Pabbi og mamma gáfu mér Apple tölvu sem var það alflottasta og besta sem ég hafði nokkru sinni fengið að gjöf, þrátt fyrir að ég kynni ekkert á hana, fyrir utan leikina sem fylgdu með. Allir mínir vinir öfunduðu mig alveg rosalega mikið og fannst að það hlyti að vera fínt að eiga svona ríka foreldra....sem mér fannst. Veislan var haldin á heimili foreldra minna sem bjuggu í stærra húsi en frænka mín. Undirbúningur var mikill og safnaðist öll fjölskyldan saman heima hjá ömmu Gunnu þar sem grillaðir voru kjúklingar, roastbeef steikt, salöt búin til og guð má vita hvað. Þetta var alveg ógurlega skemmtilegt að mér fannst, að vera heima hjá ömmu langt fram á nótt að elda og dúllast í matnum fyrir veisluna mína. Yngstu systur hans pabba, sem ekki er nema fimm árum eldri en ég og var alltaf eins og stóra systir frekar en föðursystir, leit ég alltaf mikið upp til þegar ég var barn og á þessum tíma var hún með stutt hár sem var blásið ægilega mikið til hliðar og í vöngum og að aftan var það litað kirsuberjarautt. Allar hinar stelpurnar fóru í hárgreiðslu, nema ég fór til Jónu frænku og lét hana lita og blása á mér hárið alveg eins og hennar....og fannst ég langflottust, sem ég náttúrulega var . Í bekknum var strákur sem var mikið í hestum og hjá fjölskyldu hans dvaldist ungur tamningamaður frá Þýskalandi sem hét Ralf, en svo vildi til að hann og Jóna frænka urðu kærustupar. Mér fannst þessi maður alveg óskaplega fallegur og lá við að ég legði fæð á frænku mína á tímabili fyrir að hafa náð í hann. Í kirkjunni sat hann á fremsta bekk með fjölskyldu bekkjarfélaga míns og þegar ég leit til hans í eitt af mörgum skiptum þá blikkaði hann mig og brosti, enda þekkti hann mig auðvitað, litlu frænkuna hennar Jónu. Ég reis öll upp í sætinu, brosti pínulítið á móti og hitnaði öll inn í mér því nú var ég sko alveg viss um það að hún Jóna frænka gæti bara gleymt honum Ralf því hann væri sko örugglega orðinn ástfanginn af mér. Hann fór þó fljótt til síns heima á ný og ástin kulnaði, enda nóg af fiskum í sjónum á SigloCity.......hmmmm .

Anyways, fjölskyldan hafði það nokkuð gott um páskana. Vorum með matarboð fyrir fjölskylduna á föstudaginn langa og fórum í matarboð til foreldranna á páskadag. Annars var bara æft af fullum krafti alla dagana, skroppið í Heiðmörk og kíkt í bíó. Unglingurinn var að vinna mikið um páskana svo við sáum ekkert voðalega mikið af honum, en þó eitthvað. Ágætis frí svona overall. Vann í gær, vinn í dag, síðan frí fram á þriðjudag í næstu viku.

Sprettur kveður

Páskafrí

2006-04-12T10:58:00.000Z

Kom heim í gær eftir að hafa sótt Unglinginn í vinnuna. Þar hafði Prinsessan verið með Prakkarann og eina frænkuna í heimsókn og fór það ekkert á milli mála. Þau höfðu greinilega fengið sér að borða....nokkrum sinnum og á hinum ýmsu stöðum í húsinu. Ekkert alvarlega mikið drasl en það beið bara eftir þeim þegar þau komu heim úr sundinu. Ég skellti mér á æfingu í Spönginni þar sem ég tók vel á í rúman klukkutíma. Tek aðra eins í dag eftir að búið er að fara með Prinsessuna og Unglinginn í klippingu. Unglingurinn verður nú að vera frambærilegur fyrir allar dönsku tútturnar í næstu viku . Í gær var ákveðið að leyfa frænkunni og Prakkaranum að gista í kvöld og verður því örugglega fjör í Fannafoldinni í kvöld. Við Folinn erum reyndar að fara í smá kokteilboð svo Unglingurinn verður kannski fenginn til að sitja hjá þeim í smátíma, ef hann verður ekki farinn úr bænum. Hann stefnir á Snæfellsnesið í tvo daga þar sem hann ætlar að slaka á og hafa það notalegt, kannski að kíkja aðeins í kennslubækur fyrir samræmdu prófin ef hann nennir.

Í gær var ein sú heimskulegasta niðurstaða úr könnun birt á mbl.is, en það var kosningin um besta fræga föðurinn.....þarf að segja meira Þar fór Bob Geldof fremstur í flokki meðal jafningja og þótti bestur fyrir að eiga þrjár stelpur með Paulu Yates og hafa ættleitt yngstu dóttur hennar og Michael Hutchense eftir að þau höfðu bæði framið sjálfsmorð í einhverri vímunni. Á eftir honum komu síðan margir misfrægir sem þóttu meðal þeirra tíu bestu. Mér finnst þetta asnalegt og út í hött að vera að setja upp einhverja bjánakönnun um svona fáránlega hluti en verð í sömu andrá að viðurkenna að ég las nú samt ”fréttina” svo tilgangnum er sjálfsagt náð hjá þeim sem að henni stóðu, fólk les svona vitleysu........ Ég er nú líka svolítill sökker fyrir slúðri. Er ekki mikið í Séð & Heyrt pakkanum en á nokkuð stóran stafla af blöðum eins og ”In Style”, ”Hello”, ”Cosmo”.....osfrv.

Jæja, það er eiginlega hægt að segja að í dag sé föstudagur. Yndislegt fimm daga frí framundan þar sem ég ætla að nota skynsamlega, s.s. æfa mikið, borða mikið og vera mikið löt. Kannski fæ ég eitt lítið páskaegg . Eftir það er vinna í tvo daga og svo fer ég í annað fimm daga frí þar sem ég ætla að fara í eina fermingarveislu og skreppa svo til Köben í tvo daga. Hótelið sem við verðum á er með þessa fínu líkamsræktarstöð, SPA, sundlaug og guð má vita hvað. Ætli við hjónin fáum okkur ekki bara reiðhjól og skrollumst um borgina á þeim ef veðrið er gott. Höfum gert það áður og er eiginlega eina rétta leiðin til að fara um svæðið, nema fyrir þá sem hætta sér ekki út fyrir Strikið. Hitti eina í gær sem er að fara í sömu ferð og fannst voðalega fúlt að eiga bara laugardaginn alveg lausan (föstudagskvöldið planað og því kannski lítið farið á eitthvað sjopperí) því búðirnar væru bara opnar til tvö á laugardögum!! :/ .....voða fínt að fara í búðir í útlöndum EN, ef stoppið er stutt þá nenni ég nú ekki að þræða búðargötur á öðru hundraðinu eins og útspýtt hundsrassgat að kaupa einhverjar tuskur sem mig hvorki vantar né langar í......bara af því ég er í útlöndum. Allt í lagi að kaupa sér eitthvað en ekki bara hendast á milli búða....bara til að hendast á milli búða. Þá get ég bara alveg eins tekið einn laugardag í Smáralind og Kringlunni. Sjálfsagt kíkjum við aðeins í H&M eins og alltaf en við ætlum fyrst og fremst að hafa það gott, hjóla út í Kristjaníu, sitja á kaffihúsi og kannski kíkja í Tivoli sem opnar fyrir sumarið núna í apríl.

Jæja, best að fara að æfa sig í páskaletinni.

Spretturinn flottastur

Vorið er komið.....allsstaðar nema hér

2006-04-11T08:43:00.001Z

Mánudagurinn skriðinn á fætur eftir þessa fínu helgi. Föstudagurinn var góður, Folinn mætti í hús og var mikil gleði að fá þessa elsku heim á ný eftir 3ja daga fjarveru. Um kvöldið var horft á lokaþáttinn af Idolinu þar sem Prinsessan fór á kostum með vinkonu sinni. Þær voru harðir stuðningsmenn Ínu og stóðu upp í hvert sinn sem nafn hennar var nefnt og klöppuðu eins og vitleysingar. Að sama skapi nenntu þær ekkert að hafa fyrir því að hlusta á Snorra og fóru bara inn í herbergi að leika þegar kom að honum Eftir allan spenninginn þá rotaðist Prinsessan ca. 10 mínútum áður en úrslitin urðu kunn svo svekkelsið kom ekki fyrr en á laugardeginum .
Ég fæ nettar skammir frá G-strengnum fyrir að vera með einhverjar matarlýsingar hér á blogginu án þess að setja inn uppskriftir svo það er best að skella inn hollustu (eða þannig.....)uppskriftum föstudagsins, en þær eru sem hér segir:

Laxacarpaccio
Nýr lax (var með ca. hálft flak fyrir okkur tvö og tvær litlar)
salt og pipar
xtra virgin olífuolía
sítrónusafi
graslaukur, helst ferskur

Sker laxinn í mjög þunnar sneiðar og raða á disk, salt og pipar. Set plastfilmu yfir og þrýsti vel á til að þynna sneiðarnar enn meira. Um það bil 10 mínútum áður en ég ber þetta fram þá skvetti ég vel af olífuolíu og sítrónusafa yfir og klippi svo graslauk ef maður vill hafa hann með.
Ber þetta fram með ristuðu brauði/smjöri og sýrðum rjóma með graslauk. Ægilega gott.

Fylltar kjúklingabringur
4 bringur
basilpaste (fæst í Gripið og greitt) eða basilblöð
steinselja
grilluð paprika frá Sacla
höfðingi eða dalayrja skorinn í sneiðar
prosciutto (parmaskina)

Kjúklingurinn er skorinn í miðju og flett upp (eins og fiðrildi). Smurt með basilpaste (eða basilblöð sett í) steinselja, grilluð paprika og osturinn sett í “hólfið”. Þá er prosciutto vafið utanum. Kjúklingurinn er létt brúnaður á pönnu, svo settur inn í ofn og bakaður við 180° í c.a 25 mín. Meðlæti: Ferskt tortellini með ostafyllingu
Einn bakki sveppir Ein rauð paprika Eitt zucchini Ca. 8 sneiðar af mögru beikoni
Beikonið er steikt þar til það er vel crispy, sett til hliðar, grænmetið brúnað og beikonið þá skorið smátt og blandað samanvið. Gumsið sett saman við soðið pastað ásamt lúkufylli af FERSKUM parmesan (EKKI í dós) og góðri smjörklípu.

Eftirréttur (uppskriftin reyndar komin frá G-strengnum en af einskærum ótta set ég hana líka hér inn þar sem ég hef örlítið breytt henni)
3 epli
1 bolli súkkulaðirúsínur
2 tsk kanill
Ca. 25 ritzkex (eða annað saltkex)
6 kókosbollur
smjör til steikingar

Eplin skorin í litla bita og sett á pönnu ásamt kanil og rúsínum, ritzkexið svo mulið smátt útí og gumsið mýkt aðeins á pönnunni. Sett í eldfast og kókosbollur skornar í tvennt langsum og raðað ofaná með sárið upp. Bakað í ca. 10-15 mín. á 180°.
Í það heila er þessi þriggja rétta máltíð ekkert sérstaklega flókin eða tímafrek. Ég var ca. klukkutíma að þessu öllu frá byrjun og þar til við borðuðum.

Jæja, þá hef ég uppfyllt mínar borgaralegu matarskyldur og sný mér að öðru ekki síður mikilvægu. Eins og fram kom var mín frekar brotin í bakinu svo engin æfing var tekin á fim. og fös. Fór út að hjóla á laugardaginn, tók góðan hring og var rétt rúman hálftíma sem var svosem ágætt nema ég hefði kannski hjólað aðeins meira og hraðar ef aumingjans hundurinn hefði ekki verið farinn að dragast afturúr síðustu metrana svo stefnan var bara tekin heim í höll. Var líka með rokið í andlitinu hálfa leið svo mér lá við andarteppu á tímabili. Fór svo í Laugar í gærmorgun þar sem ég tók eina góða.....mikið leið mér veeeeeeel á eftir .

Prinsessan og Unglingurinn komin í páskafrí frá námi næstu tvær vikur eða svo. Unglingurinn er með dollaramerki í augunum og verður vinna voða mikið um páskana. Þarf nú samt að gefa sér tíma í að læra svolítið fyrir samræmdu prófin líka. Þetta verður svosem stutt vinnuvika hjá manni bæði þessi og sú næsta. Þetta er það góða við páskana, ekkert verið að hringla með þessa daga, dagsetningarnar breytast frá ári til árs en alltaf sami dagafjöldinn sem maður fær í frí. Legg til að við breytum jólunum og skiptum út dagsetningunum þar líka svo launþegar fái sem mest frí út úr því. Og úr því við erum að tala um breytingar þá finnst mér alveg fáránlegt dómgreindaleysi hjá ráðamönnum þjóðarinnar að breyta ekki klukkunni á sumrin.

Sænski kokkurinn

Vikulok

2006-04-11T08:43:00.000Z

Á föstudagsmorgnum er boðið upp á kaffi og meðlæti á starfsstöðinni og var það engin undantekning á í morgun. Spretturinn fær sér nú yfirleitt rúnstykki með osti og kannski smá sultu, er ekkert mikið að vesenast í sætabrauðinu. Í morgun var þó undantekning þar á og fór mín bara hamförum í slikkeríinu. Held ég kenni andlegu ástandi mínu sökum æfingaleysis í gær og líklega dag, alfarið um að hafa fallið fyrir þessu freistingum djöfulsins. Ætla semsagt að slaka í æfingu líka í dag þar sem rýtingurinn stendur enn út úr mjóbakinu á mér.

Í fyrramálið á ég að mæta hjá Nínu snyrtipinna í andlitsbað og french pedicure. Maður verður að hafa aðeins fyrir því að vera svona ótrúlega falleg eins og ég er. Eini gallinn er að sjálfsögðu sá að það er aldrei mínútufriður þegar maður fer út á meðal fólks þar sem almúginn hópast alltaf í kringum mig eins og mý á mykjuskán og heimtar að fá að berja gyðjuna augum . En ég sinni bara borgaralegri skyldu minn af stakri ró því einhverja gleði í lífinu verður ljóta fólkið að hafa. Æfing í Laugum verður líklega tekin að því loknu.

Annars kemur Folinn heim síðar í dag og planið er að reiða fram sælkeramáltíð handa fjölskyldunni, fylltar kjúklingabringur með basil, grilluðu paprikumauki og camembertosti, vafðar í parmaskinku og laxacarpaccio í forrétt. Unglingurinn verður líklega áfram í Fannafoldinni yfir helgina svo það verður bara fjölmennt. Síðan verður bara fylgst með lokaþætti Idol þar sem Prinsessan mun sjálfsagt sitja stíf af spenningi og púa á Snorra þar sem hún er einlægur aðdáandi Ínu eftir að Bríet Sunna datt út í síðasta þætti. Það er tvennt sem verður þess valdandi að þessi litla sæta Prinsessa gólar á sjónvarpið og argast og gargast við þá sem þar eru, annarsvegar er það Idolið og hins vegar er það enski boltinn. Alveg upp úr þurru er hún farin að hafa áhuga á að fylgjast með boltanum og þá sérstaklega Chelsea og Liverpool, líklega þar sem það eru einu liðin sem hún þekkir. Chelsea þekkir hún af því að vinkona hennar er systir Eiðs Smára og Liverpool þekkir hún því Unglingurinn bróðir hennar forfallinn Liverpool aðdáandi. Hafi hann horft á leik með liðinu einhversstaðar og kemur svo heim getur allt heimilisfólkið fundið á sér hvort hans lið vann eða ekki. Hann strunsar beint inn í herbergi og lokar á eftir sér með fýlusvip ef þeir tapa. Ef þeir aftur á móti vinna, brosir hann hringinn og ræður sér ekki fyrir kæti, rétt eins og hann hafi sjálfur skorað vinningsmarkið.

Gone with the wind
Sprettur

Ennþá alein

2006-04-11T08:42:00.000Z

Maður verður allur svona extra ferskur þegar maður breytir æfingaprógramminu sem er nauðsynlegt svona annað slagið bara svo maður staðni nú ekki. Fer því miður ekki á æfingu í dag þar sem ég fór alveg í bakinu og datt hreinlega útaf skrifstofustólnum mínum rétt áðan. Vonandi að æstir aðdáendur muni ekki líða mikið fyrir fjarveru mína þessa tvo daga. Geri ráð fyrir að mæta alspræk og til í slaginn á laugardagsmorguninn í Laugum. Fer eitthvað varlega í lyftingarnar svona fram yfir helgina allavega.

Fór á Maður Lifandi í gærkveldi og sótti mér kvöldmatinn þar sem Prinsessan hafði fengið eitthvað gott í kroppinn hjá Sparifrænku í næsta húsi og Unglingurinn, sem ætlaði að kíkja í heimsókn, var að vinna til hálfátta. Fékk þar dýrindismat eins og vanalega og gúffaði því í mig fyrir framan sjónvarpið.

Folinn er væntanlegur á klakann annaðkvöld og verður vel tekið á móti honum við heimkomuna. Lendir reyndar ekki fyrr en seint um kvöldið þar sem millilent er í Stokkhólmi en hvað um það.

Jæja, nú á að ákæra aftur í Baugsmálinu. Erum við ekki öll búin að fá okkur fullsödd af þessu Baugsmáli. Jú jú, sjálfsagt er eitthvað rotið þar innanhúss en ég held að stjórnvöld ættu kannski að byrja að þrífa heima hjá sér áður en þeir ráðast í jólahreingerningu hjá öðrum. Árni Johnsen var nú dæmdur á sínum tíma en ég er þess fullviss að það komst ekki upp um allar hans gjörðir og hann er sko langt frá því að vera eina spillta barnið í þessari stóru fjölskyldu stjórnvalda. Hvernig var þetta t.d. með Jón Baldvin á sínum tíma sem hélt risapartý fyrir Bryndísi sína og skattborgarar borguðu brúsann.....vinurinn kom bara fram opinberlega og baðst afsökunar...ó ok, þá er þetta í lagi, sem það og greinilega var. Hvað haldið þið að þessir kallar séu búnir að fá í formi gjafa og greiða í gegnum tíðina. Hverjir eru helstu kostunaraðilar kosningabaráttu þessara manna...heldur fólk virkilega að stóru fyrirtækin sem styrkja þá fái ekki að njóta þess. Ekki misskilja mig, ég er alveg á því að ef Baugsmenn eru sekir um eitthvað af þessu sem þeir eru ákærðir fyrir þá eiga þeir alveg endilega að gjalda fyrir það, en í guðanna bænum hættið að flytja þetta leiðindamál í fjölmiðlum og látið okkur bara vita þegar dómur fellur.

Spretturinn út

I need a (my) man

2006-04-05T08:54:00.000Z

Jæja þá er maður bara orðin grasekkja fram á föstudagskvöld þar sem Folinn er farinn á sína árlegu ráðstefnu/námskeið í Rotterdam. Var alltaf haldið í Amsterdam sem er nú ólíkt skemmtilegri borg en hafnarborgin Rotterdam, en þeir eru lokaðir inni á hóteli frá 7:30 á morgnana til 18:00 á daginn og þá tekur við kvöldverður svo það er lítill tími til að spóka sig í borginni hvort eð er.

Tók cardioæfingu i Spönginni í gær og verð að segja að ég er nú orðin nokkuð spræk á hjólinu sem er það tæki sem ég hef nánast aldrei notað. Ákvað að prófa þar sem ég ætla jú að vera svo ægilega dugleg að hjóla í vinnuna í sumar svo það er ágætt að vera í fínu ”hjólaformi” þegar að því kemur. Tek samt eftir því að þegar við vinkonurnar erum að æfa saman og förum á sama þolstig í brennslunni/cardio þá er ég að ströggla við að ná hjartslættinum upp í 130-138 en hún er komin í 163 á nó tæm sem er ótrúlega hátt miðað við hvað hún er dugleg í þolæfingum. Við komumst að þeirri niðurstöðu eftir að hafa mælt líka hvíldarpúlsinn og minn var 54 slög en hennar 75 slög að hún væri ekki kona heldur fóstur.

Við Prinsessan leigðum okkur Black Beauty og horfðum saman. Hún var alveg heilluð þessi elska, enda mikil dýrakona og staðráðin í því að verða dýralæknir og eignast líka dýrabúð með Prakkaranum. Svo ætla þau að búa saman líka og fylla húsið sitt af dýrum. Hræðilegt, dóttir mín og systursonur verða skrýtna fólkið í stóra húsinu sem allir krakkar eru hræddir við og engin vill umgangast þau því það er svo vond lykt heima hjá þeim. Verð að tala hana ofan af þessari hugmynd í tíma .

Unglingurinn kom svo í heimsókn og ákvað að gista svo við vöktum yfir einhverri ræmunni rétt fram yfir miðnætti. Ætlaði maður síðan aldrei að geta sofnað þar sem ég er ógurlega vön (og mætti kannski segja háð) því að Folinn sé mér við hlið í rúminu. Allir því afskaplega syfjaðir og úldnir í morgun .

Nú eru bara að koma páskar svo framundan er nokkura daga frí sem er alveg hið besta mál. Vorum að spá í að fara kannski norður en ekkert ákveðið samt. Það eru svo margir að fara til SigloCity svo ég veit ekki hvort við nennum að vera að fara þangað í þrengslin. Kannski kíkjum við að Akureyri í 2-3 daga, leigjum okkur bara íbúð og höfum það gott, sérstaklega ef það verður skíðafæri.

Sprettur grasekkja

Helgarrapport

2006-04-05T08:15:00.000Z

Helgin nokkuð góð bara, byrjaði á því að fara í litun og klippingu í morgunsárið og er því flottari en nokkurn tíma áður, ef það er mögulegt. Tók fantaæfingu í Spönginni eftir vinnu meðan Prinsessan fór í körfubolta. Kvöldið rólegt í faðmi fjölskyldunnar þar sem horft var á Idolið og tætt í sig saltkringlur og gulrætur með því. Vaknaði á laugardagsmorgun þar sem búið var að skipuleggja æfingu í Laugum með einni vinkonu. Tókum allsvakalega á því og æfingin stóð yfir í rétt rúmlega einn og hálfan tíma. Sturtuðum okkur og settumst síðan alsælar og vel æfðar í matsalinn þar sem við gæddum okkur á dýrindis sjávarréttarsúpu. Eftir hádegið kom Skottan til okkar og var í pössun fram á sunnudag þar sem Systir og Oddurinn voru að halda heljarinnar ”surprise” partý fyrir karl föður Oddsins. Við Folinn gerðum okkur lítið fyrir og fengum pössun fyrir þær stöllur um kvöldið þar sem við vorum boðin á Diesel tískusýninguna sem haldin var í iðnaðarhúsnæði í Vogunum. Sóttum stóra bróður Folans og mættum þar alspræk og kíktum á vor og sumartískuna í gallafatnaði. Skelltum okkur síðan í fertugsafmæli á NASA en renndum heim í höllina nokkuð snemma þar sem Unglingurinn sat fyrir framan kassann með þær tvær snúllur sofandi í fanginu og gat sig því hvergi hreyft .

Engin æfing á sunnudaginn þar sem ég hafði æft stíft síðustu sex daga. Mér líkar þetta ágætlega svona, þ.e. taka fríið á sunnudögum í stað föstudaga eða mánudaga. Prófa þetta í smátíma.

Ég verð nú aðeins að tjá mig um þetta Bubbafár sem hefur verið undanfarið. Alveg finnst mér ótrúlegt að hann skuli þykjast vera svona afskaplega sár og móðgaður yfir þessari forsíðu Hér & nú, sem var víst eitthvað á þá leið ”Bubbi fallinn”. Hverjum er svosem ekki sama hvort Bubbi væri fallinn eður ei. Þar fyrir utan hefur Bubbi sjálfur verið manna duglegastur við að segja alþjóð hvað hann var nú mikill dópisti og mikill kvennabósi. Ekki hafði hann áhyggjur af því að börnin hans væru að hlusta á hann í útvarpi og sjónvarpi þegar hann var að lýsa því að þegar hann var í dópinu þá hafi hann sko skverað 2 til 3 kellingar fyrir kaffi og hent þeim út jafnóðum. Enginn Íslendingur fyrr né síðar hefur verið jafnmikill og jafnsvakalegur dópisti og Bubbi, að minnsta kosti eins og hann lýsir því sjálfur. Einhvern veginn á ég bágt með að trúa því að þessi blessaða forsíða hafi valdið honum og hans jafnmiklu hugarangri og sorg eins og hann lýsir sjálfur. Segist ekki lengur þora nakinn í heita pottinn á pallinum heima hjá sér af ótta við að ljósmyndarar liggi í leyni. Bubbi minn, það hefur engin áhuga á að sjá á þér dingdongið og ef þú ert svona hræddur við að það verði fest á filmu mun ég einfaldlega gera ráð fyrir að þú sért kannski ekki mestur, bestur og stærstur á því sviði kallinn minn.

Spretturinn út

Miðvikublogg

2006-03-29T09:41:00.000Z

Maður er eitthvað svo andlaus í blogginu þessa dagana. Kannski vill maður bara ekki sjá á prenti hvað líf manns er hversdagslegt, nú eða þá að maður er svo ofboðslega spennandi og brjálæðislega upptekinn persóna að það er bara hreinlega enginn tími til að blogga. Ég kýs að vera númer tvö.

Unglingurinn tók uppá því að týna PSP tölvunni sinni í strætó um daginn og setti með því nýtt met þar sem aldrei áður hefur hann átt nokkurn hlut í jafnstuttan tíma eins og þessa leikjatölvu. Að sama skapi held ég að hann hafi aldrei tekið það jafnnærri sér að týna nokkrum hlut. Hér á eftir fer upptalning á nokkrum þeim hlutum sem koma upp í hugann af því sem hann hefur týnt eða skilið eftir einhversstaðar í gegnum tíðina:

Úlpa þegar hann var 6 ára gamall í Vesturbæjarskóla. Hann fékk nýja.
Skólabækur í tugatali frá 6 ára aldri til 14 ára. Hann fékk nýjar.
Sími þegar hann var 13 ára. Hann fannst.
Sami sími þegar hann var 14 ára. Hann fannst.
Fékk nýjan síma í desember sl. sem týndist í febrúar. Hann fannst ekki.
Húfur til að klæða heilan þjóðflokk. Fundust aldrei.
Reiðhjól þegar hann var 6 ára. Fannst aldrei.
Reiðhjól þegar hann var 7 ára. Fannst og týndist aftur. Fannst ekki.
Reiðhjól þegar hann var 7 ára (já annað). Fannst ekki.
Reiðhjól þegar hann var 12 ára. Fannst og týndist aftur. Fannst ekki.
Reiðhjól þegar hann var 13 ára. Fannst aldrei.
Reiðhjól þegar hann var 14 ára. Fannst aldrei.
Tek það fram að flestum þessum reiðhjólum hefur verið stolið því hann nennir ekki að læsa þeim. Tek einnig fram að þessi þrjú síðustu hefur hann keypt fyrir eigin peninga.
Línuskautar þegar hann var 13 ára. Fundust ekki.
Debetkort þegar hann var 14 ára, þrjú stykki. Eitt fannst aftur.
Veski þegar hann var 14 ára (með einu debetkortinu). Fannst ekki.
PSP leikjatölvann sem rann úr buxnavasanum í strætó. Hefur ekki fundist.

Þetta er nú svona það sem kemur upp í hugann í bili :/

Slæmar fréttir í bloggheimum þessa dagana þar sem G-strengurinn dó, þ.e. bloggið hennar. Vinir og vandamenn hafa reynt að telja þessari eðalkonu trú um að hennar verði sárt saknað en hún skellur skollaeyrum við þeim grátstöfum, svo nú er bara að bíða og sjá hvort hún tekur upp þráðinn síðar.

Ég gerðist svo djörf að taka mér æfingafrí á sunnudaginn þar sem ég hafði æft daglega í 10 daga og fannst því tilvalið að slaka aðeins á. Æfði á mánudag og þriðjudag, fer í Spöngina í dag og tek nokkrar lyftur og smá cardio. Er að svitna svolítið á hjólinu þessa dagana, koma mér í hjólaform fyrir vorið svo ég geti hjólað í vinnunna á góðviðrisdögum. Ágætis æfing að hjóla úr Grafarvoginum niður í Efstaleiti, tekur ca. 25 mínútur og svo annað eins heim. Myndi nú ekki nenna þessu nema af því við erum með svo góða aðstöðu hér á stofunni, búningsherbergi, sturta og tilheyrandi. Alltaf verið að reyna að koma þessum lögmönnum í form....gengur ekki neitt ma´r. Ég var með blóðþrýstings-, fitu- og ummálsmælingar í gær. Sumir voða glaðir og aðrir í smá sjokki. Vorum með svona til gamans um miðjan janúar og allir ægilega gíraðir í að koma sér í fínt form fyrir næstu mælingu........gekk ekki alveg eftir hjá öllum. Sumir stóðu sig þó betur en aðrir.

Armbeygjurnar hafa alveg farið fyrir ofan garð og neðan hjá mér og því lítil framför þar. Tók 48 í fjórum settum í gær sem er í sjálfu sér ágætt. Sé hvort ég næ ekki 30 í einu setti í dag og stefni svo á að reyna upphífingar, án stuðnings, sem mér finnst alveg óheyrilega erfið æfing. Skiptir engu hvaða þyngdir ég er að taka í öðrum æfingum, upphífingarnar eru bara alveg hrikalega erfiðar, held ég nái ekki einu sinni tveimur án stuðnings :/.

Jæja, Prinsessan er að elda í kvöld með Folann sem aðstoðarkokk. Hún fletti fram og tilbaka í uppskriftarbókum í fyrrakvöld og ákvað síðan að elda ítalskar kjötbollur sem verða bornar fram með tagliatelle og fersku salati í Fannafoldinni í kvöld.

Sprettur

Föstudagur

2006-03-24T09:04:00.000Z

Föstudagurinn runnin upp bjartur og fagur sem endranær. Helv...kalt reyndar en hvað um það. Prinsessan var voðalega óróleg þegar ég kom heim því engin af vinkonum hennar nennti í sund og hún var sko bara alls ekkert ánægð með þessar stelpur svo hún sagðist þá bara fara ein, sem hún og gerði. Á meðan tók ég cardioæfingu í Spönginni, stöðin full af fólk að reyna að koma sér í form sem gengur greinilega misvel hjá liðinu. Suma sér maður þarna daglega, aðra annan hvern dag og svo enn aðra sem maður sér örsjaldan og þegar þeir koma er það svolítið með hangandi hendi og rétt til að friða samviskuna og réttlæta kortakaupin. Hvað um það, Unglingurinn kom og fékk far heim í Fannafoldina þar sem ætlaði að klára ritgerð og fara síðan á fund í Laugum. Við hin fórum í matarboð til vina okkar þar sem dýrindis lasagna gældi við bragðlaukana. Héldum svo heim á leið þar sem Prinsessan lagðist í rúmið með sína ástsælu Paddingtonbók og við Folinn snúlluðumst eitthvað á heimilinu þar til Desperate housewifes byrjaði, sem við auðvitað misstum ekki af. Held að Folinn sé ekkert sérstaklega spenntur fyrir þessum þáttum en mér finnst miklu skemmtilegra að horfa saman svo hann lætur sig hafa það þessi elska.

Ég var að lesa dóm yfir manni sem dæmdur var í 6 mánuða fangelsi, þar af 3 skilorðsbundið, fyrir hin ýmsu brot t.d. þjófnað, eiturlyfjabrot ofl. Einnig var þarna brot gegn fyrrverandi sambýliskonu mannsins, en hana hafði hann ítrekað ráðist á og veitt áverka, t.a.m. rifbeinsbrotið hana í tvígang. Hafði hann brotið skilorð með þessum athöfnum sínum svo hæfilegt þótti að dæma hann til ofangreindrar refsingar. Aumingjans maðurinn þarf nú að sitja í fangelsi í 3 mánuði fyrir þessi brot sín en jafnar sig nú vonandi fljótt á því. Ef hann er heppinn þá kannski verður sambýliskonan fyrrverandi ekki alveg búin að jafna sig eftir síðustu árás og hann kannski rifjað upp gömul glóðaraugu eða brotið einhver önnur bein til tilbreytingar, svo leiðinlegt að hengja sig alltaf í það sama. Kannski hann gæti gengið skrefinu lengra og nauðgað henni líka, bara svona til að sjá hvort hann komist ekki örugglega einnig upp með það. Ég meina, til hvers að stoppa hér þegar möguleikarnir eru endalausir enda vita allir að slík brot eru nánast refsilaus hér á landi. Svo er líka svo fínt að safna svona brotunum saman, skreppa bara á Hraunið annað slagið í 2 – 3 mánuði í senn, til að jafna sig og fá smá hvíld fyrir næstu törn. Sniðugt þetta söfnunarkerfi í íslensku réttarkerfi, svolítið eins og vildarpunktar...mætti kannski tengja þessi kerfi saman.

Anyways, búið er að skipuleggja baðstofuferð með glæsitúttunum í vinnunni í dag. Ég ætla að byrja á æfingu eftir vinnu og fara svo beint í dekrið með þeim hinum. Ætlaði reyndar að taka æfingarfrí í dag en þar sem ég er hvort eð er að fara í World Class get ég alveg eins mætt örlítið fyrr og tekið æfingu. Nenni ekki að fara heim i klukkutíma og svo aftur niðureftir. Svo á bara að gufast og pottast, fá sér eitthvað gott að borða og hafa það huggulegt.

Sprettur dekurdýr

Skóslys

2006-03-24T09:03:00.000Z

Skrapp í Kringluna í hádeginu í gær svona rétt til að fá kort í síma Unglingsins þar sem hann hafði týnt símanum sínum. Afi hans var svo góður að láta hann fá gamlan síma sem hann átti og vantaði því bara kortið. Kringluferðir væru nú ekki í frásögur færandi hjá venjulegu fólki á venjulegum dögum. En ég er náttúrulega ekkert venjuleg kona eins og flestir vita sem mig þekkja. Vek ég alltaf svo ægilega mikla athygli hvar sem ég fer sökum fegurðar minnar og yndisþokka og fólk lagði niður störf til að horfa á mig svífa um ganga Kringlunnar í gær. Þegar ég hafði lokið erindum mínum í Kringlunni lá leið mín að rúllustiganum upp á þriðju hæð til að komast undan æstum aðdáendum og út í glæsikerruna. Ekki gekk það nú betur en svo að í öllum látunum þá rek ég hælinn á flottu nýju...eða næstunýju...stígvélunum mínum lítillega í og finn strax að eitthvað er ekki eins og það á að vera. Lít við í tíma til að sjá fína hælinn skoppa niður rúllustigann eins og ekkert væri sjálfsagðara. Eins og allir vita verður maður að halda ró sinni í slíkum aðstæðum og ekki sýna nein veikleikamerki, sem ég og gerði enda í einstaklega góðu jafnvægi almennt . Er upp var komið tók ég þessa fínu U-beygju og renndi mér í rúllustigann niður aftur til að endurheimta strokuhælinn. Það vildi svo vel til að mér hafði tekist að flýja undan æstu aðdáendunum og ljósmyndurunum svo atvik þetta varð ekki fest á filmu og mun því ekki birtast í næsta tölublaði In Style undir fyrirsögninn "Tískuslys í Kringlunni". Spretturinn hafði að sjálfsögðu samband við verslunina sem selt hafði honum stígvélin og óskaði kurteisislega eftir því að þeir tækju á sig kostnað vegna viðgerðar þar sem strokuhællinn hefði ekki verið notaður nema u.þ.b. 4-5 sinnum síðan varan var keypt. Afgreiðsludruslunni fannst þetta allt voða leiðinlegt en fannst augljóslega grunsamlega lítil notkun á græjunni miðað við tímann sem hafði liðið frá kaupunum sem var ca. mánuður. Þar sem hún er nú með greind undir meðallagi og þarf því að vinna í einhverri aumingjans tískuvöruverslun fyrir lágmarkslaun þá setti ég bara upp vorkunnartóninn og benti henni á að auðvitað gæti hún ekki vitað að ég ætti fleiri skópör en þetta eina og þyrfti því ekki að ganga í sömu druslunum alla daga. Veit greinilega ekki hver ég er.

Æfingin í gær í styttra lagi eða aðeins 40 mínútur þar sem ég ætlaði að skjótast í búðina á eftir og sjoppa ávexti og aðra hollustu til að setja í pressuna góðu. Skruppum til Foreldranna í gærkveldi og var setið og spjallað í nokkra stund. Unglingurinn hafði fengið þessar fínu peysur frá þeim þegar þau komu frá Amsterdam og var voða lukkulegur með það. Prinsessan fékk skrautlega vekjaraklukku og smá sælgæti í nammibankann. Folinn skrapp svo í körfu og lögðumst við mæðgurnar í sjónvarpssófann þar sem sú stutta sofnaði.
Eigið góðan dag og passið ykkur á rúllustigunum.

Sprettur celeb

Frost á Fróni

2006-03-22T09:22:00.000Z

Miðvika aftur mætt með heiðskírum himni og 7° frosti. Dagurinn í gær var frekar langur, fór og lauk lögfræðinámskeiðinu í HR sem var mjög skemmtilegt en að sama skapi var síðasti klukkutíminn líka frekar þungur þegar fjallað var um EES samninginn og EB, þvílíka skriffinnskubáknið þarna í Brussell….OMG hvað þetta er þungt og tormelt efni, en getur örugglega verið gaman að grúska í því ef maður setur sig virkilega inní það. Mig langar alveg óskaplega mikið að sitja kúrs í sifja- og erfðarétti svo ég ræddi við deildarstjóra lagadeildarinnar og úr því varð að hún ætlar að kanna möguleikana á að setja upp slíkt námskeið sem hentar mér að sjálfsögðu miklu betur J. Þar sem ég er í lærdómsgírnum þá ætla ég einnig að kanna með frönskunám fyrir byrjendur. Ég heillaðist svo afskaplega af landi og þjóð þegar við fórum þangað fyrir tveimur árum síðan og svo þessa stutta ferð sem við fórum nú um daginn endurlífgaði þann áhuga sem legið hafði í dvala. Við Folinn höfðum reyndar ákveðið fyrir mörgum árum síðan að við ætluðum okkur að læra samkvæmisdansa og frönsku einhvern tímann í framtíðinni. Nú erum við löngu búin að læra samkvæmisdansana…..og gleyma þeim að mestu leyti líka ef út í það er farið :/…..svo þá er bara að skella sér í frönskuna.

Prinsessan fór í sund seinnipart gærdagsins og Unglingurinn að vinna. Ég tók æfingu eftir námskeiðið, sem hafði reyndar dregist til kl. 17:00, og var því ekki komin heim fyrr en um hálfsjöleytið. Litum við í nýjum híbýlum Stóru stelpnanna sem voru búnar að gera afskaplega huggulegt hjá sér en vantaði lítillega aðstoð Folans við smá snúll og snall. Þær voru afskaplega húsmóðurlegar, búnar að baka vöfflur og lummur sem þær buðu uppá. Tengdó mætti svo á svæðið og sátum við lengur er við ætluðum og fórum því ekki heim fyrr en rétt fyrir kl. tíu sem þýddi það að Prinsessan var alveg einstaklega fúl á móti þegar hún var vakin í morgun enda ekki vön að vaka svona lengi á skóladögum þessi elska. Var reyndar hundfúl þegar heim var komið og hún fékk ekki að lesa fyrir svefninn. Hún er nefnilega að lesa gamla Paddingtonbók sem ykkar einlæg átti sem barn og finnst Prinsessunni hann Paddi alveg einstaklega fyndinn og uppátækjasamur skógarbjörn svo hún á oft erfitt með að leggja bókina frá sér þegar kemur að því að fara að sofa.

Við Folinn festumst í Prison Break á Stöð 2, eins og reyndar alla aðra þriðjudaga. Það eru nokkrir þættir sem ég vil alls ekki missa af í sjónvarpinu, Desperate Housewifes, Prison Break og svo hámenningarþátturinn Footballer´s wifes, þegar hann er á dagskrá. Erum alveg hætt að nenna að fylgjast með LOST þar sem nákvæmlega ekkert gerðist í fyrstu 4 þáttunum og síðan er komið í ljós að við fáum heldur enga niðurstöðu í lok 2. seríu og ég nenni nú hreinlega ekki að horfa á guð má vita hvað margar seríur til að verða upplýst um leyndardóm þessarar dularfullu eyju sem þau eru á. Held að höfundarnir viti það ekki sjálfir, þeir improvæsa bara hvern þátt fyrir sig.....ekki nógu glöð með þá.

Annars er planið í dag að renna á æfingu eftir vinnu eins og landslög gera ráð fyrir. Prinsessan ætlar á skauta eftir skóla og fer síðan beint á körfuboltaæfingu. Unglingurinn að vinna í Klassanum. Síðan munum við sjálfsagt taka síðan á Foreldrunum sem komu heim frá Amsterdam í gær og eru sjálfsagt léttskökk eftir að hafa villst inn á einhverja hassbúlluna J.

Kjúklingur a la Nigella Lawson í Fannafoldinni í kvöld. Gef ykkur kannski uppskriftina af honum síðar ef þið hafið brjálaðan áhuga á því.

Spretturinn út

Monday bloody monday

2006-03-21T10:43:00.000Z

Eftir að hafa verið í París í 6 daga í síðustu viku finnst manni frekar lítill tími líða á milli hennar og þeirrar næstu sem er til Köben þann 21. apríl nk. Eins og það sé ekki nóg þá þarf Folinn að fara til Hollands um mánaðarmótin í heila þrjá daga á ráðstefnu og námskeið svo ég verð grasekkja, snökt snökt .

Glæsikvendin hafa ákveðið að vera með vorveislu mikla keimlíka þeirri sem haldin var fyrir ári síðan. Verður boðið uppá kræsingar í Fannafoldinni þann 20. maí nk., á júrókvöldinu mikla þar sem við vonum á Silvía Nótt verði meðal keppenda. Ein, og jafnvel tvær gyðjur munu ekki sjá sér fært að mæta þar sem þær hafa þarfari hnöppuna að hneppa norður á SigloCity þessa sömu helgi. Persónulega get ég ekki séð að nokkuð sé merkilegra eða skemmtilegra en við hinar tútturnar, sem það er heldur örugglega ekki . Það kemur alltaf annað slagið upp einhver sjálfstæðisbarátta í eitthvert kvendið í klúbbnum, en ég hef reynt eftir bestu getu að berja það jafnharðan niður aftur og hefur tekist nokkuð vel til. Maður verður stundum að leyfa þessum gærum að rasa aðeins út fyrir utan félagsskapinn svo þær sjái hvað þær hafi það gott. Enda koma þær alltaf skríðandi tilbaka þegar þær sjá hvað þær hafa það gott undir minni stjórn. Ég er eins og flestir góðir leiðtogar og tek þeim því opnum örmum á ný um leið og þær hafa fært fórnir mér til heiðurs og keypt stóra pakka handa mér. Ég er mildur, skilningsríkur og þolinmóður leiðtogi, fyrir utan að vera óstjórnlega falleg og fyndin .

Helgin var áreynslulaus að mestu leyti fyrir utan massaæfingar gyðjunnar. Eftir æfingu vara boðið í mexíkósku súpuna sem tókst með eindæmum vel eins og við var að búast hjá þvílíkum snilldarkokki eins og mér sjálfri. Stóra stelpan og Tengdadóttirin standa í stórræðum þessa dagana þar sem verið er að flytja af Miklubrautinni og í kjallaraíbúð á Bergþórugötunni. Voru þær því voða glaðar að fá eitthvað almennilegt að borða í framkvæmdunum. Eftir matinn renndi fjölskyldan sér í Idolkaffi til tengdó sem var afskaplega fínt. Við vorum að sjálfsögðu ekki alveg sátt við úrslitin en það skiptir svosem engu máli í hvaða röð þau detta úr svo framarlega sem hún Ína stendur uppi sem sigurvegari. Langbesti söngvarinn í hópnum að hinum öllum ólöstuðum.

Unglingurinn er hjá okkur um helgina en fór með félaga sínum í bíó og kom því ekki heim fyrr en seint um kvöldið og renndi sér í rúmið með nýju PSP tölvuna sem foreldrarnir höfðu keypt fyrir hann (ekki handa honum ) í Fríhöfinni á heimleið frá Frakklandi.
Prinsessan fór í Enskuskólann á laugardagsmorgninum og tók mín þá æfingu í Laugum á meðan, tók nokkuð vel á því og fegraði kroppinn í tæpa tvo tíma eða þar til tími var kominn á að sækja Prinsessuna aftur. Eldaði aðra gómsæta sælkeramáltíð á laugardagskvöldið handa litlu fjölskyldunni, tagliatelle með humri. Unglingurinn var að vinna og fékk því ekki að bragða kræsingarnar og fannst þetta ekkert girnilegt þegar hann kom heim frá vinnu kl. 10 um kvöldið. Er mikill pastakarl en finnst humar og rækjur í pasta algjör hroðbjóður svo hann fékk sér bara brauðsneið og læddi sér svo í rúmið með nýja elskhuganum, PSP. Við hjónin lágum eins og rotið grænmeti fyrir framan kassann allt laugardagskvöldið og fórum dofin í rúmið eftir allt glápið. Um tvöleytið bankar Unglingurinn á herbergisdyr foreldra sinna og hvað haldið þið hann hafi vantað á þessum tíma sólarhringsins.......”mamma geturðu keyrt mig á Players á morgun, ég ætla að horfa á Liverpool leikinn”.........þetta mátti semsé ekki bíða til næsta dags, sér í lagi þar sem leikurinn byrjaði hálftvö.....

Æfing snemma á sunnudagsmorgun þar sem við vorum einbíla þar sem bíll Folans var í flutningum með stelpunum og körfuboltaæfing kl. 11 hjá mínum manni. Ég skutlaðist því kl. 10 í Spöngina og tók 45 mínútna cardioæfingu.
Keyrði Unglinginn á Players rúmlega eitt þegar Folinn skilaði sér úr körfunni. Sparifrænkurnar í næsta húsi voru boðnar í sunnudagsmatinn og var göldrum fram dýrindis nautalund með tilheyrandi sem rann ljúflega í mannskapinn. Eldri frænkan af þeim tveimur fór nú fljótlega heim þar sem hún var svo þreytt....held hún hafi verið í gleðskap kvöldið áður og því þurft að jafna sig örlítið. Hin sat eftir og var skrafað og spjallað þar til hún fór. Unglingurinn tók til við að skrifa ritgerð sem er ”due” á þriðjudaginn og við tókum því rólega það sem eftir lifði kvölds.

Þá er helgarrapportinu hér með lokið.

Er annars að selja fjórhjól ef einhver hefur áhuga, Bombardier Quest Rotax 650, árg. 2004 og keyrt innan við 400 km. Sendið mér bara tp. á sjl@simnet.is ef þið viljið kíkja á græjuna .

Sprettur

Komin aftur

2006-03-17T08:55:00.000Z

Jæja þá börnin mín stór og smá, þá er maður bara mættur á klakann aftur og klár í bloggið. París var frábær í alla staði og í rauninni ekkert meira um það að segja þar sem við vorum afskaplega mikið á röltinu í góða veðrinu (var reyndar rosalega kalt 3 dagana af þessum 6) þar sem sól og logn var mestallan tímann. Við misstum að minnsta kosti af rigningunni sem Systir og Oddurinn fengu á sig daginn áður en við komum. Vorum með þeim yfir helgina og svo þegar þau fóru á mánudagsmorgun vorum við tvö eftir þar til við komum svo heim á miðvikudagsnótt. En semsagt var mest verið að rölta og skoða mannlífið, kíktum á markaði, fórum í latínuhverfið og gyðingahverfið, versluðum smávegis, borðuðum góðan mat og svo fórum við í túristagírinn einn dag þar sem við fórum í Eiffelturninn, Notre Dame osfrv. Ferðinn dásamleg í alla staði. EN…..þegar við síðan ætluðum nú að tía okkur heim til Íslands komu upp hin ýmsu vandamál. Við mættum á Charles De Gaulle flugvöllinn rétt rúmum klukkutíma fyrir brottför eins og til er ætlast. Þá var búið að loka hæðinni þar sem Icelandair var að tékka inn sína farþega. Við skrolluðumst þarna um og reyndum að fá upplýsingar frá einhverjum, sem gekk frekar erfiðlega þar til ég hóaði í einn lögregluþjóninn sem var þarna á röltinu og fékk þá uppgefið að það léki grunur á að um sprengju væri að ræða og því væri búið að loka hæðinni. OK fine, allir aðrir Íslendingar sem áttu að vera um borð í þessari vél virtust hafa ákveðið að mæta brjálæðislega snemma og voru því búnir að tékka sig inn og við gátum ekki betur séð en að við værum einu strandaglóparnir, a.m.k. íslenskir. Tíminn leið og við frekari eftirgrennslan þá kom í ljós að fluginu yrði ekki frestað og við biðum því eftir að okkur yrði hleypt niður. Þegar bunkinn af lögregluþjónum kom svo askvaðandi og fólk var beðið um að fara lengra í burtu þá sáum við að líklega yrði ekki hleypt á neðri hæðinna í bráð. Hringdum því í Icelandair og þeir komu af fjöllum, höfðu ekkert heyrt af sprengjuhótun en báðu okkur að hafa samband við þjónustuborð SAS sem myndi aðstoða okkur. Á þeim tímapunkti voru ca. 20 mínútur í brottför. Kona hjá SAS tók afskaplega vel á móti okkur og eftir nokkrar mínútur var ljóst að vélin færi án okkar. Tók hún þá til við að finna önnur úrræði fyrir okkur og að lokum bauð Icelandair okkur tvo kosti. Sá fyrri var að fljúga til London með Air France eftir rúman klukkutíma, bíða á Heathrow í tæpa sex tíma og fljúga þá með Icelandair þaðan til Íslands og vera komin heim um hálfeittleytið e. miðnætti. Sá seinni var að vera áfram í París í tvo daga til viðbótar og taka þá beint flug heim með Icelandair á föstudeginum, s.s. í dag. Auðvitað vildum við bara drífa okkur heim og tókum því fyrri kostinn þrátt fyrir alla þá bið sem við áttum fyrir höndum í London. Ónei, ekki svona auðvelt mín kæra…..ef þið takið þann kostinn þá þurfið þið að borga 80 EUR á mann. Ástæðan sem Icelandair gefur upp er sú að það hefði ekki verið þeim að kenna að við hefðum ekki komist með vélinni og því þyrftum við að borga. Ef við hefðum valið seinni kostinn hefðum við ekki þurft að borga aukalega en að sjálfsögðu hefði hótelkostnaðurinn orðið miklu meiri svo við greiddum með semingi þessar 160 EUR og mun ég nú herja allsvakalega á flugfélagið og ekki gefast upp fyrr en í fulla hnefana með þessa greiðslu. Okkur finnst þetta fáránleg svör, þ.e. að við þurfum að borga af því þetta var ekki þeim að kenna…..Þegar við lentum á Heathrow sáum við að það tæki því ekki að fara inn í London þar sem sú ferð tæki sjálfsagt rúman klukkutíma báðar leiðir, kostaði morðfjár og þegar upp væri staðið gætum við kannski eytt 2-3 tímum þar. Þannig að við fengum okkur að borða og röltum aðeins um. Bjargaði þessu algjörlega að vera með passa í Executive Lounge þar sem við gátum chillað og glápt á sjónvarpið þar til við fórum. En mikið helvíti er leiðinlegt að bíða svona á vellinum. Þetta var sjálfsagt ágætisæfing fyrir Nýja Sjálands ferðina í desember þar sem sú ferð tekur að minnsta kosti rúman sólarhring EF MAÐUR ER HEPPIN og þarf ekki að bíða mikið á völlunum. En, nú er bara að búa sig undir ferðina til Köben í næsta mánuði...það verður reyndar mjög stutt stopp, bara tveir dagar svo við slöppum bara af og fáum okkur kannski hjól ef veðrið er gott. Mæli reyndar með því við alla sem fara til Köben að fá sér hjól þar sem hægt er að leigja þau fyrir kúk og kanil hingað og þangað um borgina og alveg ótrúlega gaman að skottast þar um á hjóli, smá tilbreyting frá hinu eilífa rölti J

Anyways, life goes on og hefst með æfingu í Spönginni í dag þar sem ég ætla bara að taka langt og gott cardio og kannski smá magaæfingar. Prinsessan í kröfubolta og svo er planið að bjóða Stóru stelpunni og Tengdadótturinni í mexíkóska súpu í kvöld. Stefnan verður svo líklega tekin á híbýli tengdaforeldra minna þar sem við ætlum að kíkja í smákaffi til þeirra sem endar sjálfsagt með Idolpartýi hjá þeim gömlu J.

Spretturinn kveður

Sitt lítið af hverju

2006-03-08T14:03:00.000Z

Á mbl.is í dag segir leikarinn Macauley Culkin (Home alone) að leikaraferli hans sé lokið, enginn vilji ráða hann. Ég verð að segja að mér þykir maðurinn einstaklega tregur að átta sig á því þar sem hann virðist lítið sem ekkert leikið síðan Home alone myndirnar slógu í gegn fyrir mörgum árum. Mér fannst hann ógurlega mikið krútt í þeim myndum en hann hefur lítið breyst í útliti, virðist bara hafa stækkað en andlitið ekkert breyst. Ég geri mér grein fyrir því að við erum flest ekkert endilega gjörbreytt frá því við vorum börn og hægt að sjá sama svipinn, en það sem mér fannst svo ægilega sætt og indælt við hann þegar hann var barn finnst mér bara hálfcreepy svipur á honum núna sem fullorðnum manni. Svo finnst mér engin sérstök meðmæli að vera góður vinur Michael Jackson. En það er nú aldeilis gott að greyið hafi nú á endanum áttað sig á þessu öllu saman þó svo það hafi nú tekið hann 16 ár.

En yfir í allt annað....ég tók cardioæfingu í Spönginni í gær og fór þaðan vel sveitt eftir áreynsluna. Þá tók við bekkjarkvöld hjá Prinsessunni þar sem krakkarnir endurtóku atriði sem þau voru með á árshátíð bekkjarins. Stóðu sig afskaplega vel og Prinsessan alveg að meika það í aðalhlutverki sem Gedda gulrót í Ávaxtakörfunni. Pantaðar pizzur að því loknu og allir héldu heim klukkan átta. Ég fríkaði út í fataskáp okkar Folans og reif og tætti út flíkur sem hafa runnið sitt skeið, í bili að minnsta kosti. Nennti nú ekki að taka allan skápinn í gegn í gærkveldi svo ”there´s more to come” þegar ég missi mig í restinni, sem og fatahirslu Prinsessunnar. Er nú samt nýbúin að grisja til hjá þessari elsku, en hún stækkar bara svo ört þannig að maður hefur varla við. Er jafnstór Prakkaranum sem er rúmlega ári eldri og vantar örfáa sentimetra upp á að vera jafnstór og Fimleikadrottningin sem er þremur árum eldri. Þau eru reyndar bæði í lægri kantinum miðað við jafnaldra..but still.......Það verður þá bara skemmtilegt að sjoppa aðeins á trítluna í París.

Systir og Oddurinn flugu til Parísar snemma í morgun og fengu skýr fyrirmæli frá mér sjálfri og Folanum að klára allt sem væri leiðinlegt áður en við kæmum á föstudaginn. Finnst eins og þau hafi bara haldið að þetta væri eitthvað grín . Annars er ég búin að fá margar og góðar leiðbeiningar um allt sem er gott og skemmtilegt í París, sem er þónokkuð mikið, þar sem tveir lögmenn sem ég vinn með hafa mikið verið í París, annar bjó þar í nokkur ár og hin sem er reyndar frá Belgíu en hefur mikið verið í París. Mér finnst alltaf gott að vera með smávegis í farteskinu þegar ég ferðast til útlanda og ég er minnst hrifin af þessu týpíska túristadæmi, Langar að fara og kíkja á Eiffelturninn en ekkert sérstaklega spennt fyrir að fara upp. Sama gildir um Louvre safnið, ég er bara svo afskaplega laus við að vera svona menningarlega sinnuð að ég efast um að ég fari lengra en bara fyrir utan safnið, svona rétt til að sjá þetta. Ég ætla að þvælast um Mýrina, fara á stóra flóamarkaðinn í 10 hverfi og rölta um hverfið þar sem Rauða Myllan er og kannski versla pínulítið, og síðast en ekki síst ætla ég að borða endalaust af góðum mat alla dagana. Held ég verði samt að framlengja til að geta borðað á öllum þessu góðu stöðum. Einn ”túrista” ætlum við systur samt að taka með strákana okkar, en hún ætlar að panta fyrir okkur siglingu með dinner niður Signu og á eitthvað show. Best ég pakki niður í kvöld því Prinsessan fer til ömmu og afa annaðkvöld og þá kannski kíkjum við Folinn bara í bíó áður en við höldum út í heim .

Körfubolti hjá Prinsessunni og efrikroppsæfing hjá mér í Spönginni. Ætla að elda fajitas í kvöld handa familíen og húsmóðirin mikla brýst út og mun baka tortilla brauðið sjálf frá grunni....jú jú, hef sagt það áður og segi aftur....maður er ekki bara kynþokkafullt glæsikvendi, ónei .

Sprettur heimsborgari

I´m alive

2006-03-07T12:52:00.000Z

Andið rólega kæru aðdáendur því ykkar einlæg er enn á lífi þó blogglífið hafi verið hálfdapurt undanfarna daga. Ég er búin að vera svo ægilega bissí að það hefur bara ekki gefist tími til að reifa daglegt líf. Nenni nú samt ekki að rita atburði síðustu daga í heild sinni.

Folinn átti afmæli í gær og af því tilefni buðum við stórfjölskyldunni í mat á sunnudagskvöldið þar sem boðið var upp á dýrindiskjúklingarétt og svo ísostatertu í desert. Prinsessan og Stóra stelpan höfðu líka bakað gulrótarköku sem við leyfðum fólkinu að njóta as well.
Fimmtudegi og föstudegi í síðustu viku, sem og fyrripart gærdagsins, eyddi ég við vinnu úti í bæ þar sem tími var komin á að leyfa fleirum að njóta samveru með mér. Fékk þar vinnuaðstöðu á skrifstofu með tveimur eðaldrengjum sem voru ósköpu viðkunnalegir og fínir, sjálfsagt aldrei verið með annan eins feng sem mig svona up close. Enda varð þeim lítið úr verki þessa daga og yfirmenn þeirra sjálfsagt dauðfegnir að vera lausir við mig svo starfssemi geti hafist að nýju í fyrirtækinu.

Folinn og Unglingurinn fóru í paintball á föstudagskvöldið með fjölda fólks úr Heimsklassanum, ég var ómögulega að nenna svo ég sat heima með Prinsessuna og við horfðum á Idolið. Vorum ekki alveg sáttar við úrslitin en svona er þetta bara. Helgin var nokkuð róleg fyrir utan matarboðið á sunnudaginn. Prinsessan byrjaði í Enskuskólanum á laugardagsmorguninn og renndi ég mér á æfingu í Laugum á meðan þar sem tekið var allharkalega á því og eru harðsperrurnar að líða úr fótleggjunum í dag. Tók svo cardio og nokkrar magaæfingar á sunnudaginn í Spönginni.

Í gær var brjálaður dagur í vinnunni og var ég ekki komin heim fyrr en kl. fimm sem mér þótti frekar seint þar sem ég er vanalega til fjögur. Prinsessan beið þar eftir mér og við skutluðumst í Laugar þar sem ég tók æfingu og hún skottaðist með pabba sínum þar til þau síðan fóru heim aftur. Handleggirnir titruðu nokkuð mikið að lokinni æfingunni og hefði mér verið boðin greiðsla fyrir að setja á mig maskara stóráfallalaust hefði ég sjálfsagt þurft að afþakka það.

Jæja, nú eru bara þrír dagar í París hjá okkur hjónum svo nú er komin tími til að fara að verða svolítið spennt.....hef alveg verið laus við tilhlökkun og spenning sem er alveg nýtt fyrir mér. Ég ákvað að skrifa það alfarið á þroska og innri ró sem ég hef greinilega þróað með mér sjálfri mér alveg að óvörum. Annars lítur út fyrir að árið verið ferðalagaár hjá okkur hjónum. París á föstudaginn, Kaupmannahöfn í lok Apríl, stefnt á Amsterdam með vinahjónum í september og að lokum Nýja Sjáland í 3-4 vikur um jólin með krakkana. Engar utanlandsferðir planaðar í sumarfríinu, gönguferð í Héðinsfjörðinn, með tvennum vinahjónum og börnum, nú fer hver að verða síðastur að fara þangað í ómengaða náttúruna. Ég skil afskaplega vel afstöðu Siglfirðinga til þessara ganga þar sem ég er nú einu sinni fædd og uppalinn í þeirri eðalborg, EN...mér finnst alveg fáránlegt að það eigi að drekkja öllum þessum peningum í slíkt mannvirki sem aldrei kemur til með að borga sig. En það er bara mín skoðun :/

Í dag æfing í Spönginni þar sem Unglingurinn ætlar að skrollast með móður sinni í smá cardio æfingum og tilheyrandi. Honum veitir nú ekki af því að fara að hreyfa sig þessari elsku, Skóli, vinna, sofa, sjónvarp og borða......vantar alveg hreyfinu þarna inní þetta prógramm hjá honum svo nú ætla ég að reyna að koma honum í gírinn. Take Away dagur í dag og mig dauðlangar að ná í eitthvað gott á Austurlandahraðlestina en nenni varla að fara úr Grafarvoginum niður í bæ til að sækja mat....get þá alveg eins eldað hann sjálf þar sem það tæki sjálfsagt svipaðan tíma

Spretturinn út

Miðvika...again

2006-03-01T17:15:00.000Z

Jæja góðir hálsar, þá er þriðja tíma lokið á námskeiðinu góða í HR. Í dag var farið í lögskýringarfræði og helstu lögskýringargögn íslensks réttar, og aðeins farið yfir þjóðarrétt. Skemmtilegur tími í alla staði og kennarinn mjög fínn náungi. Í síðasta tíma var farið í réttarheimildarfræði, helstu réttarheimildir íslensks réttar. Mjög góður tími það. Einn tími eftir sem við ætlum að lengja aðeins til að geta farið yfir Evrópu- og EES rétt. Ég er orðin einstaklega áhugasöm og er að kanna möguleikann á að sitja einn kúrs í sifja- og erfðarétti í HR. Finnst ágætt að byrja á því, ekki mjög fræðilegt en örugglega áhugavert.

Meðan Prinsessan og litli G-strengurinn æfðu fyrir leiksýningu stökk ég á snögga æfingu í Laugum og mættum við Folinn síðan spræk á sýninguna og Skotta litla með okkur þar sem ég hafði sótt hana á leikskólann vegan námskeiðabrölts móður hennar. Að lokinni sýningu var haldið í saltkjöt og læti hjá Systir þar sem flest(allir) átu sig pakkasadda af veigunum. Unglingurinn varð eftir og gisti hjá frænku sinni þar sem hún þurfti að vakna eldsnemma til að sækja Oddinn á flugvöllinn, en hann var að koma úr tveggja vikna ferð frá Florida þar sem hann hafði verið að sinna lífsins mestu lystisemdum, eða spila golf eins og sumir myndu segja J. Rólegt kvöld hjá okkur hjónum, Prinsessan fékk að horfa á dvd í smástund þar sem frí var í skólanum á morgun (í dag). Fór hún síðan með vinkonu sinni og mömmu vinkonunnar í Smáralindina þar sem þær betluðu að mikilli lyst og uppskáru eftir því. Hún er því með falin fjársjóð í læstri kistu í herberginu sínu þar sem birgðir næstu nammidaga eru vel geymdir, var nú samt aðeins smakkað á góðgætinu svona í tilefni dagsins. Var reyndar alveg agalega hneyksluð þegar hún sagði mér frá þeirri staðreynd að sumir krakkar virtust halda að þeir ættu að gleypa allt slikkeríið í sig á öskudaginn sjálfan….fannst þetta frekar vitlaus börn.

Jæja, það er best að fara að henda sér í Spöngina og taka á fótleggjunum þar til ískrar í. Í kvöld er hittingur hjá helstu gyðjum höfuðborgarsvæðisins og mun þar sjálfsagt mikið verða skrafað og slúðrað um þær sem ekki sjá sér fært að mæta. Folinn í körfuboltann svo amma verður líklegast plötuð til að sitja hjá Prinsessunni á meðan.

Spretturinn með sól í hjarta og heiðskíran himinn

Lítið að gerast

2006-02-28T15:47:00.000Z

Eins og flestir vita var veðrið í gær ansi gott og ákvað Prinsessan því að fara í sund með vinkonu sinni og við frestuðum bíóferðinni fram að helgi. Ég fékk því að fara á æfingu sem ég og gerði. Tók reyndar bara cario í tæpar 40 mínútur en það var ágætt. Í morgun mættum við Folinn á árshátíð Prinsessunnar þar sem hún var fremst á meðal jafningja er hún fór á kostum sem Gudda gulrót í Ávaxtakörfunni. Slógu þau að sjálfsögðu í gegn og uppskáru mikið lófaklapp að loknu atriðinu. Í dag er síðan síðasti tíminn hjá þeim stöllum í leiklistinni og munu þær, ásamt öðrum, ljúka þessu með sýningu sem foreldrum er að sjálfsögðu boðið að mæta á. Ekki er nú öllu lokið þar, ónei, því mín hefur aðeins fengið smjörþefinn af þessum skemmtilegu námskeiðum og vill núna læra ensku og mun því byrja í Enskuskólanum á laugardaginn. Einnig er búið að skrá hana í leiklistarskóla Borgarleikhússins sem byrjar reyndar ekki fyrr en í ágúst svo kannski verður leiklistarbakterían ekki lengur við lýði.

Anyways, stutt æfing í dag þar sem, eins og áður sagði, verður mætt á leiksýningu. Ætla að sækja Skottuna á leikskólann þar sem Systir er á einhverju námskeiði. Síðan mun öll familían mæta í saltkjöt og baunir hjá henni og borða á sig gat.

Annars var ég að hugsa um að skipta um bloggsíðu og færa mig yfir á blogspot.com. Mér finnst frekar fúlt að allar færslur frá því í haust eru bara einhversstaðar týndar og voðamál að ná í þær, nenni ekki svona veseni. Ég er búin að stofna nýtt blogg sem þið getið kíkt á, allar sömu færslurnar samt, www.spretturinn.blogspot.com , sé svo til á næstu dögum hvort ég færi mig alfarið yfir eða ekki.

Unglingurinn er í vetrarfríi sem þýðir að það er lítið gert þessa dagana nema hangið og sofið. Fékk enga aukavinnu þar sem hann var svo seinn að láta vita að hann gæti tekið slíkt að sér L Hann leitar nú logandi ljósi að motocross hjóli fyrir sumarið. Búinn að ávaxta söluhagnaðinn af hinu hjólinu og græða einhverja tugi þúsunda með kaupum á bréfum í Íslandsbanka, held að G-strengurinn hafi séð til þess að það hækkaði svona, enda má það bara lækka aftur þegar hann selur...híhí.

Tíu dagar í París,

Spretturinn

Rjómabollur og kjúklingasalat

2006-02-27T15:45:00.001Z

Helgin var alltof fljót að líða eins og oft vill verða. Fór í kampavínsboðið fína á föstudaginn eftir æfinguna. Þar mættu um það bil hundrað konur sem gæddu sér á indælis veitingum í föstu og fljótandi formi. Á leiðinni heim ákvað ég að koma við á American Style og næla mér í kjúklingasalatið þeirra góða og hammara handa Folanum og Unglingnum sem sátu heima. Á Styleinum var brjálað að gera og hrökklaðist ég því frá og renndi yfir á Ruby Tuesday þar sem ekki var jafnmikið af hungruðu og trylltu mannfólki. Þegar heim var komið með salat og hamborgara kom ástæðan fyrir mannfjöldanum, eða kannski mannskortinum, á Ruby. Hamborgararnir voru svosem allt í lagi skildist mér, en salatið var ein hörmung. Átti að vera kjúklingasalat með grilluðum kjúklingi, beikoni, tómötum og einhverju gúmmulaði. Kjúklingurinn leit út eins og hann hefði verið soðinn en ekki grillaður, ekkert krydd á honum og beikon fann ég ekki þrátt fyrir mikla leit. Kálið sjálft var eins og það sem ég hefði kannski gefið kanínu ef ég vildi vera verulega kvikindsleg við hana. Þar sem ég var afskaplega svöng þá svældi ég þessu í mig á meðan ég rumdi af reiði yfir þessum hroðbjóð. Var ég þó fljót að jafna mig á þessu en ég veit ekki hvort liðið á Ruby verður jafnfljótt að jafna sig eftir mig þegar ég helli mér yfir það í símanum í dag. Ég er nefnilega afskaplega dugleg að láta vita ef ég fæ góða þjónustu og líkar vel við þann sem mér sinnir. EN, ég sit heldur ekki á skoðun minni ef ég fæ slæma þjónustu eða óætan mat á veitingastöðum, sem gerist nú reyndar alveg afskaplega sjaldan....sem betur fer fyrir þá sem þar vinna .

Prinsessan var með fimleikadrottningunni og Sparifrænku þetta kvöld. Unglingurinn lokaði sig inní herbergi með einhverjar videóspólur og við Folinn gláptum á Idolið eins og venja er á heimilinu á föstudagskvöldum. Vorum algjörlega sammála lokum þess þáttar í þetta skiptið svo það er ekki mikið meira um það að segja.

Unglingurinn átti að mæta til vinnu í Heimsklassanum kl. hálftíu svo ég skutlaði drengnum þar sem ég átti jú að mæta á æfingu. Tók þar massamikið á efri hluta líkamans og var komin heim rúmlega hálfellefu. Eftir hádegið var farið að versla og svo tekið til við að undirbúa matarboðið góða sem heppnaðist einstaklega vel í alla staði og fóru allir saddir og sáttir til síns heima rétt fyrir klukkan eitt.

Ákvað að taka frí á æfingu á sunnudeginum þar sem ég hafði æft síðustu sex daga. Hefði eiginlega ekki átt að gera það, þar sem að í morgun mundi ég að engin æfing yrði í dag þar sem við mæðgurnar vorum búnar að ákveða að fara í bíó á Nanny McPhee beint eftir vinnu hjá mér. En þar sem æfingin í dag átti að vera cardio er aldrei að vita nema ég taki eina stutta svoleiðis eftir bíóið sem verður hvort eð er líklega búið um hálfsex. Ég er nefnilega ein af þeim sem fer aldrei á æfingu eftir kvöldmat, svo ef ég af einhverjum ástæðum næ ekki að fara á mínum ”venjulega” tíma, eða svona einhversstaðar í kringum það.....þá bara sleppi ég því frekar.

Unglingurinn fór að vinna eftir hádegið á sunnudaginn og við hin fórum í afmæli hjá litlum frænda sem varð 7 ára. Þar var boðið uppá agalegar kræsingar en því miður var allt sætt og engir brauðréttir né neitt slíkt. Maður úðaði aðeins í sig þar og fór pakksaddur og uppfullur af sykri heim rétt fyrir klukkan sex. Ekki hafði maður mikla lyst á að elda einhvern mat svo það var bara lagst í leti. Eftir kvöldmat var okkur svo boðið í bollukaffi til Sparifrænku í næsta húsi. Þar var sett aðeins meira af sykri í sig. Þegar við síðan komum heim var ég með dúndrandi hausverk og lömuð af sykuráti . Í morgun öskraði kroppurinn hreinlega á næringuna sem hann hafði farið svo skelfilega á mis við í gær. All bran með undanrennu hefur aldrei áður verið svona ógurlega gott verð ég að segja. Setti ekki einu sinn banana útí það áður en ég gúffaði því í mig.

Sprettur out

24. febrúar 2006

2006-02-27T15:45:00.000Z

Þetta verður stysta blogg sem sögur fara af....að minnsta kosti í mínum bloggheimi.
Í dag stendur til að taka cardio með nokkrum magaæfingum í Spönginni þegar Prinsessan fer í sinn körfubolta. Eftir það er kampavínsboð fyrir konur sem lögmenn (konurnar) á stofunni halda árlega og bjóða kollegum sínum að koma og þiggja eðalveitingar. Í fyrra mætti Þorgerður Katrín menntamálaráðherra og sagði nokkur velvalin og skemmtileg orð. Það var eiginlega þá sem ég fyrst fór að finnast hún bara alveg ókei, hafði nefnilega aldrei fílað hana neitt sérstaklega vel fram að því. Svona geta hlutirnir breyst. Síðan þá hef ég gengið í Sjálfstæðisflokkinn, kosið í prófkjörinu og fengið boð um að mæta í kvennaboð á þeirra vegum. Hef þar að auki hugsað mér að kjósa Villa í borgarstjórnarkosningunum í vor, þó svo Dagur sé náttúrulega miklu sætari og hárprúðari en Villi. Hvað um það, eftir boðið er stefnan bara tekin á Idolkvöld með familíen og aldrei að vita nema Unglingurinn verði í heimsókn þessa helgina ef Foreldrarnir ákveða að renna í bústaðinn og slaka á í friði og ró. Á morgun er matarboð í Fannafoldinni þar sem tvenn vinahjón okkar ætla að mæta. Þar sem við Folinn erum slíkir snilldarkokkar ætlum við að bjóða upp á humar, nautalund, lambafilé og svo súkkulaðiköku sem bráðnar í munni og sendir sælustrauma um fólk í eftirrétt, kakan sú er ættuð frá Eistlandi og er alveg einstakt sælgæti.
Æfing í fyrramálið þar sem Íris ætlar að sameinast mér í efripartslyftingum. Mun verða tekið harkalega á brjóst/bak og handleggsvöðvum.
Gangið hægt um gleðinnar dyr

22. febrúar 2006

2006-02-27T15:44:00.001Z

Unglingurinn mætti á starfsstöð mína seinnipartinn í gær og fórum við í skókaupaleiðangur þar sem hann vantaði innanhússskó. Eftir að söluguttinn í Intersport var búin að fara 7 ferðir á lagerinn og komið var í ljós að ekkert að þeim skóm sem Unglingurinn ásældist voru til hjá þeim, þá fórum við í fýlu við Intersport og héldum við í okkar heimabyggð þar sem við fengum þessa fínu pumaskó hjá honum Muggi í Sportbúð Grafarvogs. Hentumst heim þar sem ég sótti Prinsessuna og G-streng jr., þar sem þær áttu að mæta í leiklistina. Stefndi svo kagganum ógurlega í átt að Laugum þar sem æfing dagsins skyldi fara fram. Þar hittum við Folann sem var á heimleið og tók hann Unglinginn með sér. Ég tók nokkuð harkalega á efri hluta míns fagra líkama og uppsker harðsperrur helvítis í dag .

Það er körfubolti hjá Prinsessunni seinnipartinn í dag og cardioæfing hjá mér. Ákvað að stokka prógrammið upp aðeins og í stað þess að lyfta 4x í viku og taka cardio 1-2x á móti, þá ætla ég nú að lyfta 3x og með örlítið breyttu sniði og taka þá cardio 2-3x þar á móti. Unglingurinn er að fara á árshátíð í kvöld og vildi endilega leigja sér smóking. Það kostar mikla mikla peninga og þar að auki gefst ekki tími til að fara á máta slíkan klæðnað í dag, hann er þekktur fyrir að vera með hlutina á síðustu stundu og svo á maður bara að hendast til og redda því. Hann mun því fá lánuð jakkaföt hjá Folanum þar sem hann er orðin svo stór og stæltur að hann passar í þau föt. Hann er við það að vaxa föður sínum yfir höfuð og við síðustu mælingar stóð Unglingurinn í rétt rúmlega 184cm og mun vera jafnhár Folanum. Þar sem hann er jú bara 15 ára gamall er ekki óliklegt að einhverjir sentimetrar hlaðist á hann í viðbót. En eins og ég sagði við hann um daginn þá er nóg að vera voðalega stór ef mamma ”litla”, sem er reyndar 180cm, er ennþá sterkari en hann...hahahahahahahaha....

Fer á námskeið í HR eftir hádegið í dag, sem verður örugglega voðalega skemmtilegt. Þarf samt að skjótast fyrst til að endurnýja vegabréfið mitt. Kem við í Kringlunni og læt smella einni ”kassa” passamynd af mér. Ætla að reyna að gretta mig aðeins á henni svo þeir í Útlendingastofnun taki ekki andköf af hrifingu af því ég er líka svo rosalega falleg á myndum .

Skötuselur með spínati og vorlauk á matseðlinum í Fannafoldinni í kvöld. Ótrúlega góður réttur, enda snilldarkokkur hér á ferð.

Sprettur kokkur kveður

21. febrúar 2006

2006-02-27T15:44:00.000Z

Það var nú aldeilis fín helgin sem leið. Á föstudagskvöld voru bara rólegheit hjá litlu fjölskyldunni þar sem fylgst var með Idolinu. Úrslitin voru náttúrulega bara skandall og ekkert annað. Það sér og heyrir hvaða fáviti sem er að aumingjans strákurinn að austan getur ekkert sungið. En landsbyggðarfríkurnar slá um hann herborg og kjósa sinn mann hvort sem hann á það skilið eða ekki. Einhver misskilningur í gangi þar sem pakkið heldur að þetta sé vinsældarkeppni og því ekki spurning um hæfileika á söngsviðinu. Unglingurinn var í heimsókn hjá okkur um helgina. Var að vinna á föstudaginn og fékk svo að gista hjá vini sínum.
Laugardagurinn var rólegur framanaf þar sem undirbúningur fyrir árshátíð hófst. Var svo heppin að fá tvær snilldardömur í heimsókn þar sem önnur þeirra sá um hár mitt og hin um andlit. Þegar þær höfðu lokið af sér var ég ægifögur sem endranær og nærri því klár í slaginn. Folinn hafði skellt sér í Baðstofuna og kom nýrakaður og slakur heim. Fordrykkur var á heimili framkvæmdarstjórans og var þar margt um manninn þegar við létum sjá okkur. Að sjálfsögðu sló þögn á mannskapinn og maður heyrði fólk taka andköf af hrifningu þar sem það hafði aldrei séð slíkan glæsileik né fegurð . En hvað um það, mér tókst nú að róa fólkið niður og fá mér einn fordrykk. Árshátíðin var síðan haldin í Glersalnum í Kópavogi. Skil nú ekki hvað er verið að æða með svona heimsborgardömu eins og mig út á landsbyggðina til að halda slíkan viðburð, en það er önnur saga. Skemmtum okkur konunglega, skemmtilegt fólk og skemmtilegar uppákomur.
Silvia Nótt vann Júróvisjón með yfirburðum sem mín fjölskylda er afskaplega ánægð með. Langflottust og komin tími til að senda bara einhvern skrautlegan karakter eins og hana. Svo er lagið líka þrusugott og grípandi. Finnst hún æði
Prinsessan var í pössun og gisti því útí bæ aldrei slíku vant. Við sváfum því á okkar græna til rúmlega hálfellefu er Folinn stökk framúr til að fara á körfuboltaæfingu. Ég ákvað að liggja bara aðeins lengur og láta fara vel um mig. Unglingurinn rumskaði rétt fyrir eitt og ætlaði að fara á körfuboltaæfingu. Eftir þras um það að ég vildi ekki keyra hann í íþróttahús Rimaskóla ákvað hann að hætta við æfinguna og fara í fýlu. Rauk út og sást ekki meir fyrr en seinnipart þess dags. Tek það fram að íþróttahúsið er í u.þ.b. 4 mínútna gangfjarlægð frá heimili okkar. Dagurinn annars rólegur og leti hjá okkur hjónum.
Í gær var okkur boðið í 25 ára afmæliskaffi Tengdadótturinnar og áttum við að mæta kl. 19:30. Eftir vinnu rauk ég því heim þar sem ég átti eftir að fara á æfingu, versla og svo auðvitað elda, áður en við færum til veislu. Þetta tókst allt saman og vorum við mætt rúmlega hálfátta. Unglingurinn var að vinna í Klassanum og ætlaði á körfuboltaæfingu að því loknu svo hann kom ekki með. Við sátum hjá þeim stöllum, ásamt foreldrum Tengdadótturinnar, fram eftir kvöldi og gúffuðum í okkur hinu ýmsa góðgæti.
Folinn fékk úthlutað hreindýri í haust, jibbí. Ekkert sérlega spennt fyrir önd og gæs þegar fer að hausta, sérstaklega ef fuglaflensan lætur nú á sér kræla hér á klakanum, en hreindýrið er alltaf ljúffengt og gott að fá nokkur kíló af því í kistuna þegar fer að hausta.
Spretturinn kveður

17. febrúar 2006

2006-02-27T15:43:00.002Z

Allo allo Æ em still alæf. Uss uss, ma´r bara búin að liggja heima með hæsi og hor, ekki haft nokkra rænu á því að bloggast eitthvað. Lítið að frétta nema þið hafið einhvern sérstakan áhuga á því að fræðast frekar um veikindi mín sem ég efast um. Er búin að liggja heima í tvo daga og horfa á Friends í sófanum og rúminu til skiptis. Er enn frekar tuskuleg en þar sem árshátíðin er á morgun verð ég að hrista þetta úr mér því ekki nenni ég að vera konan með horinn á gleðinni miklu. Keypti ógó flottan kjól sem fólk mun taka andköf yfir, en ég er svosem vön því. Fékk mágkonu Systur til að kíkja í kvöldheimsókn í Fannafoldina þar sem ég fékk þessa ægilega góðu fótsnyrtingu a la french. Ekki slæmt að vera með svona heimsendingarþjónustu á snyrtifræðingum . Eins og gefur að skilja hafa æfingar ekki verið stór hluti af lífi mínu þessa vikuna sökum slappleika og ætla ég að hafa hægt um mig fram yfir helgina en mun þá vonandi geta byrjað af krafti. Merkilegt hvað vikufrí úr ræktinni hefur mikil áhrif á andlegu hliðina. Á þriðjudagskvöldið ákváðum við nokkrar gamlar bekkjarsystur að hittast. Var einstaklega gaman að hitta þessar túttur þar sem sumar hafði ég ekki séð í um það bil átján ár eða svo. Þær voru hver annarri hressari og var ákveðið að hittast aftur er vora tæki, sem ég hlakka ægilega mikið til því á dagskránni er að skipuleggja allsherjarhitting árgangsins á næsta ári þar sem við verðum 20 ára gagnfræðingar þá.
Prinsessan og G-strengur jr. fóru í leiklistina í gær og settu upp leikþátt um nornir ef ég hef skilið þær rétt. Þær eru aldeilis að skemmta sér vel þarna og eru búnar að finna það út að boðið er upp á hin ýmsu námskeið hjá Mími og vilja fara á enskunámskeið næst.
Í vikunni hefur staðið yfir vinavika á vinnustað mínum. Þetta er í fyrsta skipti sem slíkt hefur verið gert og hefur mælst misvel hjá starfsfólki. Sumir eru ægilega virkir og senda huggulega tölvupósta úr leyninetfangi, leggja pakka á borð vinarins og hrósa á báða bóga, en auðvitað verður að hrósa fleirum svo ekki uppgötvist hver leynivinurinn er. Ég persónulega hef verið voða virk og beið smurt rúnstykki í morgunverð á skrifborði vinar míns fyrsta daginn, súkkulaði og krúttlega orðsendingu fékk hann þann næsta, miðvikudagurinn fór alveg fyrir ofan garð og neðan sökum hors og heimasetu, en sérlegur sendiboði minn lagði góðan vindil með orðsendingu í bakka vinarins í gær, svo nú er bara dagurinn í dag eftir svo það er best að leggja höfuð í hveiti eins og brallarabörnin myndu orða það.
Minn leynivinur er greinilega að reyna að vera voðalega fyndinn því í morgun beið mín hálfskílóa poki af súkkulaðihúðuðum lakkrís.....en hann bíður bara (nammipokinn sko) eftir laugardeginum svo þetta er allt í lagi....hmmmm..kannski má maður bara alveg borða nammi alla daga þegar maður er veikur, ég fékk að minnsta kosti alltaf eina kók í gleri þegar ég var veik sem krakki...því miður (að því er mér fannst þá) þá var ég afskaplega sjaldan veik sem krakki, man eftir tveimur skiptum. Fyrra skiptið var ég um 11-12 ára og fannst þetta bara fínt þar sem mamma sagði að ég væri veik en mér fannst ég voða hress svo þetta varð bara hálfgert frí fyrir mig þó ég þyrfti að vera inni allan daginn. Seinna skiptið var ég að verða þrettán ára og fékk svona heiftarlega magapest að mér hefur sjaldan liðið jafn hræðilega illa eins og þá. Hún stóð í rúma viku og ég hélt ég væri að deyja. Ég hef verið afskaplega heppin hvað þetta varðar með mín börn og verða þau sjaldan veik. Stundum verður Unglingurinn ímyndunarveikur og þá alltaf í maganum. Aldrei hiti eða neitt slíkt, engin uppköst/niðurgangur og matarlystin alveg á sínum stað. Við foreldrarnir viljum nú bara skrifa þetta á ”nenni ekki í skólann” syndrome. Hann varð aftur á móti einu sinni veikur sem barn. Var rúmlega eins árs þegar hann fékk heiftarlegan hita og var nánast meðvitundarlaus í nærri þrjá sólarhringa. Ég sem ung og mátulega kærulaus móðir á þessum tíma var bara heima hjá þessari elsku og gaf honum að drekka þegar hann opnaði sljó augun annað slagið. Einhvern veginn hvarflaði aldrei að mér að fara með hann til læknis. Í dag fengi ég sjálfsagt nett áfall og hlypi með hann á næstu læknavakt....svona breytist maður með aldrinum.
Það eina sem ekki breytist er fegurð mín og kynþokki, alltaf jafn brjálæðislega flott og æðisleg, ójá
Sprettur út

13. febrúar 2006

2006-02-27T15:43:00.001Z

Mánudagarnir eru einhvern veginn alltaf frekar rólegir hjá mér. Vakna með eindæmum syfjuð því ég er búin að raska svefnvenjum virku daganna með vökum fram á rauða nótt. Engin æfing í dag samkvæmt hinu heilaga æfingaskipulagi. En dagurinn endar kannski í spennu þar sem ég mun leggjast í kör fyrir framan sjónvarpið í kvöld og horfa yfir mig spennt á LOST.
Föstudagurinn var frekar kreisí eftir vinnu þar sem, eins og áður sagði, var von á fullt af fallegu fólki í Fannafoldina. Maður þarf alltaf að undirbúa svoleiðis pínulítið þó svo að keyptur hafi verið kokkur á svæðið til að sjá um veitingarnar. Það þarf að dekka borðið og skreyta sem ég fékk Sparifrænku til að gera og leysti hún það verkefni með sóma. Svo finn ég alltaf þörf hjá mér til að taka allt í gegn áður en húsið fyllist af fólki, þegar ég ætti í reynd að gera það eftir að liðið er farið....en ég er ekki dóttir pabba míns tuskuglaða fyrir ekki neitt . Fólkið fór að tínast inn í sparigöllunum uppúr hálfátta, allir í góðum gír. Maturinn klikkaði ekki hjá Braga frekar en fyrri daginn, snilldarkokkurinn sem hann er. Annars var afskaplega mikil föstudagsstemning í fólki, bara rólegheit og spjall. Ég og Esther frænkulíus vorum offkors alveg óheyrilega skemmtilegar og settum saman smá stjörnumerkjalesningu fyrir fólkið. Það var reyndar alveg merkilegt hvað þessir vinir manns eru annars, kynóðir, stelsjúkir, hórkarlar, latir og svo mætti lengi telja....nema konur í voginni voru náttúrulega bæði fallegar og klárar, svo ég tali nú ekki um kynþokkafullar. Vildi bara akkúrat þannig til að við frænkurnar erum fæddar undir stjörnu vogarinnar....merkilegt nokk segi ég nú bara. Lífið er fullt af tilviljunum.
Ætlaði í ræktina snemma á laugardagsmorguninn en sökum næturbrölts lágum við Folinn í bælinu til að verða ellefu. Stóra stelpan og tengdadóttirin buðu okkur þá í hádegisverð á Miklubrautina svo æfingin varð að bíða betri tíma. Þangað hélt litla fjölskyldan og gæddi sér á kræsingum í kílóavís. Sátum þar eitthvað frameftir degi og spjölluðum, Folinn hafði tekið verkfærakassann með og hamraði saman einhverja hurðarómynd sem hafði gert þeim stöllum lífið leitt undanfarið. Skrapp svo í eina búð sem ég hafði frétt að hefði glæsilega síðkjóla til sölu á fullvaxnar konur, þ.e. yfir 150 cm á hæð, en eins og flestir vita er ég í hærri kantinum og á því stundum erfitt með að fá fatnað sem nær mér niður fyrir miðja kálfa. Óþolandi, eins og ekki sé gert ráð fyrir að neinar konur séu bæði hávaxnar og grannar....ef þú ert hávaxinn hlýturðu líka að vera feit og ef þú ert lágvaxinn þá hlýturðu að vera ægilega petít....hálfvitar....
En ég semsagt fékk þennan guðdómlega síðkjól sem er dragsíður meira að segja þegar ég er komin á hælana, svo nú verð ég langflottust á árshátíðinni næstu helgi...eins og alltaf auðvitað
Fór svo á æfingu í Laugum seinnipart dagsins og svitnaði aðeins. Von var á Sparifrænku í mat sem hafði sagst ætla að koma í veisluafganga, sem hún og stóð við. Ekki var nú mikið um afganga þar sem vinkonur mínar og þeirra menn eru ekki bara fallegt fólk með afbrigðum heldur sælkerar miklir að auki og var litlu leift af kræsingunum frá kvöldinu áður. En við renndum niður restinni svo þetta fór nú ekki til spillis. Unglingurinn var í "pössun" hjá okkur þar sem amma og afi höfðu brugðið sér í bústað um helgina. Hann mætti til vinnu hjá Klassanum hálftíu og vann þar til hálftvö, renndi þá beint með gulu hættunni í seinni vinnuna í Nóatúni þar sem hann afgreiddi brýnustu nauðsynjar til klukkan níu um kvöldið. Folinn skaust eftir honum svo þetta grey þyrfti nú ekki að taka strætó frá Nóatúni í Grafarvoginn kl. hálftíu á laugardagskvöldi, sem hefði þýtt að hann væri kominn heim að nálgast miðnætti. Sat svo litla fjölskyldan og úðaði í sig laugardagsnamminu yfir myndinni Cinderella man með Russel Crowe og Renée Zellweger, sem btw er rosalega góð og mælum við eindregið með þeirri ræmu.
Sunnudagurinn byrjaði með æfingu í Spönginni rétt fyrir hádegið þar sem aftur var legið í bælinu til að verða ellefu. Er heim var komið rétt um eittleytið var Unglingurinn enn sofandi og Folinn enn í körfubolta. Prinsessan bað um að fara í heimsókn til Skottunnar sem hún og fékk. Um miðjan dag var haldið í veislu til fagnaðar 10 ára afmæli Prakkarans, þar sem Prinsessan var jú fyrir að snúllast með Skottunni, og fengum þar dýrindisveitingar enda Systir ekki þekkt fyrir að bera annað fram. Kvöldið rólegt og tiltölulega snemma í háttinn.
Og þá er helgarsögunni lokið að sinni....
Spretturinn kveður

10. febrúar 2006

2006-02-27T15:43:00.000Z

Æfingin í gær var fín, tíminn er svo afskaplega fljótur að líða þegar maður eru bara í cardioæfingum. Sérstaklega þegar eitthvað skemmtilegt er í sjónvarpinu, þá gleymir maður sér alveg og allt í einu..úps, búin að vera hér í 9 daga....
Grænmetislasagnað heppnaðist glimrandi vel og við Folinn gúffuðum því í okkar með bestu lyst. Það sama verður ekki sagt um alla aðra sem sátu við borðið. Prinsessan og G-strengur jr. voru í leiklistinni og fengu að leika á eftir. Prinsessan spændi í sig lasagnanu og spínatsalatinu með eins og hún er nú svosem vön að gera, en litli G-strengurinn er ekki vanur svona gribbum eins og mér þar sem enginn stendur upp frá borðum fyrr en hann er búin með matinn sinn og það er ekkert "má ég sleppa þessu" eða "ég borða ekki svona"....ef þú kúgast ekki þá bara borðarðu....Prinsessan var með þetta alveg á hreinu og sagði: ef þér finnst þetta ekkert sérstakt þá skaltu samt borða þetta af því þá venstu því og svo ef þú borðar þetta alltaf aftur þá verður það gott þegar þú ert búin að venjast því ....ég borðaði sko einu sinni ekki papriku en núna er hún bara góð sko . Ég lofaði litlunum að þær fengju venjulegan mat eftir tímann á þriðjudaginn og verð því að elda grjónagraut næst .
Ok, næsta mál....ég var klukkuð af Elvu Rut húsbyggjanda á Akureyri og mun því upplýsa landann um mína innstu hugsanir og þrár því samkvæmt....eða svona allt að því....here goes:
4 störf sem ég hef unnið um ævina:
Ingólfur Arnarson ehf.
Betra Líf ehf.
Viðskipta- og tölvuskólinn
LOGOS lögmannsþjónusta – þar sem ég starfa nú
4 bíómyndir sem ég gæti horft á aftur og aftur:
Ég er afskaplega mikill dipló þegar kemur að bíómyndum svo þær eru ansi margar sem ég hef og get horft á aftur og aftur, en hér koma fjórar:
Trainspotting
Lord of the rings
Forrest Gump
Pulp Fiction
4 staðir sem ég hef búið á:
Þeir eru offkors þónokkuð fleiri en þetta eru þeir bestu J
Hjá mömmu og pabba á Suðurgötunni á Sigló
Hjá mömmu og pabba þegar flutt var í borgina
Framnesvegur með Folanum og afleggjurum
Fannafoldin með Folanum og afleggjurum
4 sjónvarpsþættir sem mér líkar:
Desperate housewifes
C.S.I.
Friends
Will & Grace
4 síður sem ég skoða daglega, fyrir utan blogg:
www.mbl.is
www.textavarpid.is
www.kbbanki.is
www.google.com
4 staðir sem ég hef heimsótt í fríum:
London - Englandi
Nice - Frakklandi
Berlín – Þýskalandi
Annecy – Frakklandi
4 matarkyns sem ég held uppá:
Alla villibráð sem Folinn matreiðir
Ungversk gúllassúpa
Skötuselur með kókos og basil
Heimatilbúin kjúklingapizza
4 staðir sem ég vildi heldur vera á núna:
Heima hjá mér
World Class
New York
Í nuddi í Laugum Spa
8 bloggarar sem ég klukka og VERÐA að standa sig....verst ég þekki svo fáa bloggara:
G-strengurinn sem er í massaátaki í ræktinni
Esther sem hefur hvort eð er ekkert betra að gera
Gunna litla frænka sem tístir svo skemmtilega þegar hún hlær
Halla hin sem getur tekið sér frí frá brjóstagjöfum og bleyjuskiptum
Dísin sem er í brjáluðu Boot Camp prógrammi
Maríanna af því hún er frá Sigló
Stóri bróðir G-strengsins sem les kannski aldrei síðuna en hver veit J
Londonwall sem er latasti bloggarinn á svæðinu og þarf að taka sig á í því
Ég sé að ég verð að fara að kynnast fleiri bloggurum. Ætli það sé ekki best að vanrækja bara vinina og fjölskylduna og fara að vafra um á netinu í leit að slíkum, ég held það sé best.
Jæja, pjöllupartýið í kvöld svo það er best að skella MP3 spilaranum í eyrun og gíra sig upp í tjúttið með brjálaðri tónlist að hætti Radio WC
Spretturinn á hraðri leið inn í helgina.

9. febrúar 2006

2006-02-27T15:42:00.001Z

Mamma, ég elska þig meira en allt í heiminum, öll fötin og inní öllum húsum og gardínum og út um alla Evrópu...eða hvað það heitir þarna sem plútó og það er allt þú veist, stjörnurnar eru....(mamman: meinarðu alheimurinn eða geimurinn?) Já það sko...en hvað er þá aftur Evrópa? Prinsessan að tjá móður sinni ást sína og heldur því fram að ekkert barn elski foreldra sína jafnmikið og hún elskar okkur .
Fór í algjört dekur og slökun í Laugum Spa í gær sem var alveg einstaklega ljúft og slakandi...eins og það á að sjálfsögðu að vera. Systir og Oddurinn voru á svæðinu þegar ég skreið kremuð og slök inn um dyrnar. Þau þurftu að skreppa á eitthvað leyndardómsfullt flakk svo við Folinn tókum Prakkarann og Skottuna að okkur í nokkra tíma. Þau voru eitthvað hálfþreytuleg bæði tvö svo ég veit ekki hvort þau þurftu bara að fara að hvíla sig, en persónulega held ég að þau hafi bara þurft góðan drátt og smá frið til að sinna þeim málum....
Folinn eldaði kjúklingabringur og núðlur handa mér og börnunum sem rann ljúflega niður með vatnsblönduðum egilsdjús . Folinn fór síðan að hamast í körfubolta með félögunum á meðan við Prinsessan létum fara vel um okkur í sófanum og horfðum á hommana á skjá einum sem taka að sér að dekkoreita og sjæna gagnkynhneigða karlmenn. Í gær var reyndar alveg einstaklega dramatískur þáttur þar sem karlmennið sem þeir tóku að sér var hermaður á leið til Íraks í tæp tvö ár. Var nýgiftur með lítið barn og hafði voða áhyggjur af hinum ýmsu hlutum þar sem hann væri á leið í burtu í svo langan tíma. Hommarnir létu nú ekki á sér standa og þvílík huggulegheit, dramatík og alles í þessum þætti, svei mér ef við mæðgur felldum ekki bara eins og tvö tár yfir þessu öllu og vanalega er það nú á hinn veginn þegar maður horfir á þá, þ.e.a.s. ekki langt í húmorinn og brosið. Hvað um það, hann snýr nú vonandi heill heim aftur til konu og barns.
Leiklist hjá þeim litlu í dag svo það er æfing í Laugum. Cardiovikan í hámarki og ég læt ekki mitt eftir liggja í þeim málum, tek reyndar alltaf smá maga með og kannski nokkrar armbeygjur. Ég sem ætlaði að vera komin í 30 í lok febrúar svo það er eins gott að taka sig á í beygjunum, hafa svolítið gleymst og drukknaði í öðrum æfingum .
Annað kvöld munu fegurstu gyðjur höfuðborgarsvæðisins mæta í Fannafoldina ásamt mökum. Þar er á ferð árlegur fagnaður þar sem körlum okkar er náðasamlegast boðið að taka þátt. Bragi meistarakokkur hefur séð um að töfra fram ljúfar veitingar fyrir okkur, sem við rennum niður með eðaldrykkjum frá hinum ýmsu heimshornum. Allir uppstrílaðir í sínum bestu klæðum svo við höldum okkur yfirleitt bara í Fannafoldinni fram á nótt í stað þess að fara á bæjarflakk þar sem múgur og margmenni myndi sjálfsagt hópast að okkur úr öllum áttum, enda slíkt magn fegurðar og kynþokka hefur líklegast aldrei sést innan borgarmarkanna. Þetta myndi að sjálfsögðu ógna öryggi okkar og því höfum við ákveðið að á almannafæri yrði aldrei farið þegar þessar hátíðar eru haldnar. Þess í stað erum við duglegar að festa fegurðina og skemmtilegheitin á filmu og munum kannski sýna útvöldum við tækifæri .
Annars er ég að fara á námskeið í næstu viku í HR, kynning á helstu réttarheimildum íslensks réttar og aðferðum við skýringu á settum lagaákvæðum. Farið í feril einkamála, opinberra mála, fullnusturéttarfar ofl. Einstaklega spennandi. Þarna mun ég slá í gegn næstu fjórar vikur og fylla heilabúið af fróðleik.
Mun töfra fram grænmetislasagna a la Sigga Þ. í kvöld. Smakkaði á því hjá henni og ranghvolfdi augunum af eintómri sælu svo ég ætla að sjá hvaða áhrif þetta hefur á Folann.
Sprettur fagri

7. febrúar 2006

2006-02-27T15:42:00.000Z

Fórum í keilu í gær með bekkjarfélögum Prinsessunnar sem var ægilega gaman og skemmti hún sér konunglega með vinum sínum. Eftir keiluna var eiginlega orðið of seint að elda kryddlegnu smálúðuna sem átti að kitla bragðlaukana svo það var komið við á American Style og keyptur hammari handa Folanum og ég fékk mér kjúklingasalatið þeirra sem er alveg óheyrilega gott, held að þetta sé eina búllan í bænum sem sörverar ógó góða hamborgara og býður líka uppá eitthvað aðeins minna kransæðastíflandi fæðu sem smakkast líka vel. Mæli óhikað með því, sérstaklega þar sem þeir eru búnir að opna þennan líka fína stað á Bíldshöfða sem er ekki langt frá minni heimabyggð, Grafarvogi. Síðan var bara setið og glápt á kassann fram eftir kvöldi. Hlógum okkur máttlaus yfir American Idol og Sirkus í smátíma, ég sem hélt að íslensk ungmenni væru að gera sig að fífli fyrir alþjóð með þátttöku sinni í Idolinu, en þetta er bara óraunverulegt á köflum svei mér þá. Kíktum á LOST eftir tíufréttir en það var afskaplega tíðindalítill þáttur að þessu sinni og lítið meira um það að segja.
Í dag er leiklist hjá Prinsessunni og G-streng jr., svo ég bruna í Heimsklassann í Laugum að þessu sinni og mun taka á svo um munar. Er að hugsa um að taka cardio viku núna, alltaf gott að stokka upp prógrammið annað slagið svo maður staðni ekki. Í síðasta leiklistartíma settu þau upp stórverkið Rauðhettu og úlfinn og stefna litlurnar á Golden globe á næstu misserum .
Það verður semsagt ekki takeout í dag eins og gert er ráð fyrir á þriðjudögum þar sem lúðunni var skipt út fyrir slíkt í gær.
Folinn á afmæli þann 6. mars nk. og er ég lengi búin að velta fyrir mér hvað ég á að gefa honum eða gera fyrir hann og úr varð að við ætlum að skrollast til Parísar í 5 daga. Systir og Oddurinn eru að fara þangað 8.-13. mars og við hjónin ætlum að hitta þau þann 10. mars og vera síðan tveim dögum lengur, þ.e. til 15. mars. Hef aldrei komið til Parísar áður en með mér vinnur belgísk blómarós sem hefur mikið verið í Frakklandi og þá París, og hefur hún gefið mér heilmörg skemmtileg tips varðandi gistingu, must see, restauranta osfrv. Ekki leiðinlegt það, sérstaklega þar sem við systur höfum aldrei farið til útlanda saman .
BTW, tók bitch testið og útkoman er eftirfarandi....ég meina, á þetta við mig....hvað finnst ykkur....????
You are 44 % bitch
I see a little spark of nastiness in you, but on the whole you’re a good egg. You’ve just got to decide which way you want to go. Do you want to live a nice, pleasant life with just the odd giggle at someone else’s expense, or do you want to stride ahead getting what you want in life but remain friendless. You’re on the cusp, my friend, choose wisely.
Spretturinn out

6. febrúar 2006

2006-02-27T15:40:00.000Z

Gleðilegan mánudag elskurnar mínar og velkomin á fætur og út í kuldann. Helgin var bara nokkuð góð, nóg að gera í félagslífinu að minnsta kosti. Tók samviskuæfingu á föstudaginn þar sem miðvikudagsæfingin var í léttari kantinum heima við. Eftir sturtu og snyrtingu hélt fjölskyldan í matarboð til tengdó þar sem stórfjölskyldan var stödd og foreldrar mínir einnig. Eftir ljúfar veitingar og létta drykki settist hópurinn niður og horfði á Idolið í nýja 50” skjánum þeirra gömlu. Hvað er eiginlega málið með þessi tvö þarna, Eirík og Tinnu? Þau eru ósköp ágæt bæði tvö en þau hljóta að hafa heilu kaupstaðina með sér úr því þau komast svona áfram viku eftir viku....á engu. Lögreglumál eins og einhver dómarinn sagði, að Angela skyldi detta út í stað annarshvors hinna tveggja. En hvað um það, litla fjölskyldan hélt síðan heim á leið og Prinsessan sofnaði nú fljótt en við hjónin létum fara vel um okkur það sem eftir lifði kvölds.
Á laugardagsmorguninn var vaknað rúmlega níu og byrjaði að gera mig klára í ræktina. Nú skyldi haldið í Laugar og Jóna grjóna tekin með. Hinar pjöllurnar ætluðu svo að hitta okkur í brunch í Café Laugum. Jóna mín er ekkert sérstaklega vön því að vera að lyfta og hamast í tækjasal svo hún var á taugum yfir því að ég skyldi pína hana um of og að hún gæti þá ekki gengið um kvöldið, hvað þá dansað, en ég fór varlega með han. Fengum við tútturnar síðan dásemdarmat og höfðum það huggulegt, slúðruðum og hlógum hver af annarri, því við erum jú allar svo einstaklega fyndnar og miklir gleðipinnar. Skrapp svo í Kringluna og keypti mér topp, hálsmen og ógó flott stígvel í GS. Seinnipartinn komu svo mamma og Esther í smákíkk og Selma fljótlega þar á eftir. Þar sem við erum svo ógurlega miklar skemmtitúttur þá settum við saman snilldarpistil um hana Jónu, sem var að fara að halda 40 ára afmælið hátíðlegt um kvöldið. Prinsessan var sett í geymslu hjá tengdó og við Folinn brugðum okkur í bæinn til að hitta allt þetta skemmtilega fólk sem í veisluna kom, flestir náskyldir mér og því skemmtilegri og fallegri en fólk er flest, þó voru þarna lágstéttarmótmælendur inn á milli eins og kennarar sem hún Jóna vinnur með, en þeir eru nú samt ágætir líka. Mikið fjör og mikið dansað, pistillinn sló í gegn og var mikið hlegið....offkors Þar sem Prinsessan er einstaklega mikill foreldrafíkill var hún búin að taka sjöfalt loforð af foreldrunum um að hún yrði sótt og þyrfti ekki að gista, svo við héldum í Jötnaborgir rétt fyrir klukkan eitt og sóttum hana, steinsofandi að sjálfsögðu.
Sunnudagurinn, uss uss...vill helst ekkert minnast á þá staðreynd að ég fór ekki á æfingu eins og lög gera ráð fyrir. Vöknuðum þegar klukkan var að slefa í hálfellefu og Folinn gerði sig kláran í sína sunnudagskörfu. Ég tók mig til og fór að sinna verkamannastörfum heimilisins svosem að þvo þvott, ryksuga og allskyns svoleiðs störf sem mér eru ekki samboðin. Folinn kom heim og ég bara NENNTI ekki að gíra mig á æfingu svo við fórum bara í smásunnudagsbíltúr eins og hver önnur fjölskylda. Hundurinn tekinn með og honum hleypt á sprettinn í Geldinganesinu, sem honum finnst ægilega fínt. Sóttum Unglinginn og keyrðum hann í Heimsklassann eftir rúntinn þar sem hann ætlaði að horfa á stórleik Liverpool og Chelsea. Mínir menn unnu 2-0 og púlarinn grét sig í svefn.... Annars bara týpískur sunnudagur í alla staði utan æfingaleysis ykkar einlægrar. Prógrammið riðlast því aðeins þar sem ég stökk á æfingu á föstudaginn sem á að vera frídagur og ætli ég renni mér ekki í Spöngina á eina stutta í dag þar sem ekkert varð úr slíku í gær. Næsta föstudag erum við fallegustu konur á höfuðborgarsvæðinu að halda árlegan fagnað þar sem við bjóðum mökum okkar að taka þátt í að tjútta með ”sauma”klúbbnum. Segi ykkur síðar frá því svo þið verðið bara að halda í ykkur og anda djúpt.
Silvía Nótt til Aþenu segi ég, sá endurtekið atriðið hennar í gær og fannst hún bara flottust. Það er líka bara húmor í því að senda svona atriði í þessa austantjaldskeppni úr því við erum að bögglast við að vera með í þessu.
Farin að sinni, en vel farin þó
Sprettur

Föstudagur til fjár...vill ekki einhver gefa mér svoleiðis

2006-02-18T13:35:00.000Z

Allo allo Æ em still alæf. Uss uss, ma´r bara búin að liggja heima með hæsi og hor, ekki haft nokkra rænu á því að bloggast eitthvað. Lítið að frétta nema þið hafið einhvern sérstakan áhuga á því að fræðast frekar um veikindi mín sem ég efast um. Er búin að liggja heima í tvo daga og horfa á Friends í sófanum og rúminu til skiptis. Er enn frekar tuskuleg en þar sem árshátíðin er á morgun verð ég að hrista þetta úr mér því ekki nenni ég að vera konan með horinn á gleðinni miklu. Keypti ógó flottan kjól sem fólk mun taka andköf yfir, en ég er svosem vön því. Fékk mágkonu Systur til að kíkja í kvöldheimsókn í Fannafoldina þar sem ég fékk þessa ægilega góðu fótsnyrtingu a la french. Ekki slæmt að vera með svona heimsendingarþjónustu á snyrtifræðingum.

Eins og gefur að skilja hafa æfingar ekki verið stór hluti af lífi mínu þessa vikuna sökum slappleika og ætla ég að hafa hægt um mig fram yfir helgina en mun þá vonandi geta byrjað af krafti. Merkilegt hvað vikufrí úr ræktinni hefur mikil áhrif á andlegu hliðina. Á þriðjudagskvöldið ákváðum við nokkrar gamlar bekkjarsystur að hittast. Var einstaklega gaman að hitta þessar túttur þar sem sumar hafði ég ekki séð í um það bil átján ár eða svo. Þær voru hver annarri hressari og var ákveðið að hittast aftur er vora tæki, sem ég hlakka ægilega mikið til því á dagskránni er að skipuleggja allsherjarhitting árgangsins á næsta ári þar sem við verðum 20 ára gagnfræðingar þá.

Prinsessan og G-strengur jr. fóru í leiklistina í gær og settu upp leikþátt um nornir ef ég hef skilið þær rétt. Þær eru aldeilis að skemmta sér vel þarna og eru búnar að finna það út að boðið er upp á hin ýmsu námskeið hjá Mími og vilja fara á enskunámskeið næst.

Í vikunni hefur staðið yfir vinavika á vinnustað mínum. Þetta er í fyrsta skipti sem slíkt hefur verið gert og hefur mælst misvel hjá starfsfólki. Sumir eru ægilega virkir og senda huggulega tölvupósta úr leyninetfangi, leggja pakka á borð vinarins og hrósa á báða bóga, en auðvitað verður að hrósa fleirum svo ekki uppgötvist hver leynivinurinn er. Ég persónulega hef verið voða virk og beið smurt rúnstykki í morgunverð á skrifborði vinar míns fyrsta daginn, súkkulaði og krúttlega orðsendingu fékk hann þann næsta, miðvikudagurinn fór alveg fyrir ofan garð og neðan sökum hors og heimasetu, en sérlegur sendiboði minn lagði góðan vindil með orðsendingu í bakka vinarins í gær, svo nú er bara dagurinn í dag eftir svo það er best að leggja höfuð í hveiti eins og brallarabörnin myndu orða það.

Minn leynivinur er greinilega að reyna að vera voðalega fyndinn því í morgun beið mín hálfskílóa poki af súkkulaðihúðuðum lakkrís.....en hann bíður bara (nammipokinn sko) eftir laugardeginum svo þetta er allt í lagi....hmmmm..kannski má maður bara alveg borða nammi alla daga þegar maður er veikur, ég fékk að minnsta kosti alltaf eina kók í gleri þegar ég var veik sem krakki...því miður (að því er mér fannst þá) þá var ég afskaplega sjaldan veik sem krakki, man eftir tveimur skiptum. Fyrra skiptið var ég um 11-12 ára og fannst þetta bara fínt þar sem mamma sagði að ég væri veik en mér fannst ég voða hress svo þetta varð bara hálfgert frí fyrir mig þó ég þyrfti að vera inni allan daginn. Seinna skiptið var ég að verða þrettán ára og fékk svona heiftarlega magapest að mér hefur sjaldan liðið jafn hræðilega illa eins og þá. Hún stóð í rúma viku og ég hélt ég væri að deyja. Ég hef verið afskaplega heppin hvað þetta varðar með mín börn og verða þau sjaldan veik. Stundum verður Unglingurinn ímyndunarveikur og þá alltaf í maganum. Aldrei hiti eða neitt slíkt, engin uppköst/niðurgangur og matarlystin alveg á sínum stað. Við foreldrarnir viljum nú bara skrifa þetta á ”nenni ekki í skólann” syndrome. Hann varð aftur á móti einu sinni veikur sem barn. Var rúmlega eins árs þegar hann fékk heiftarlegan hita og var nánast meðvitundarlaus í nærri þrjá sólarhringa. Ég sem ung og mátulega kærulaus móðir á þessum tíma var bara heima hjá þessari elsku og gaf honum að drekka þegar hann opnaði sljó augun annað slagið. Einhvern veginn hvarflaði aldrei að mér að fara með hann til læknis. Í dag fengi ég sjálfsagt nett áfall og hlypi með hann á næstu læknavakt....svona breytist maður með aldrinum.

Það eina sem ekki breytist er fegurð mín og kynþokki, alltaf jafn brjálæðislega flott og æðisleg, ójá

Sprettur út

Nýtt nýtt

2006-02-17T13:31:00.000Z

Bara testa hvort þetta sé ekki örugglega að virka :)